كەنەكە و ھەولدانێن ئاشتیێ ل رۆژئاڤا
کۆنگره‌یا نه‌ته‌وی یا کوردستانێ (کەنەکە) دخوازه پارتیا یه‌کێتیا ده‌مۆکراتیک (پەیەدە) و ئه‌نجومه‌نا نشتمانیا کورد ل سوریێ (ئه‌نەکەسە) ل ھەڤ بینه.
کەنەکە کو ناوه‌ندا وێ ل ئه‌ورۆپایه و گرێدایێ پەکەکێ یه و هه‌ر سیاسه‌تا پەکەکێ ڕێڤه دبه و ژ ده‌رڤه‌یێ بیر و باوه‌ریێن پەکەکێ نکاره ته‌ڤبگه‌ره و گاڤەكا ب تەنێ ژی پاڤێژە.
کەنەکە کۆمته‌یه‌ک پێک ئانیه كو ئالیێن سیاسی ل ڕۆژاڤایێ کوردستانێ بینە با هه‌ڤ. تایبه‌تی ژی دخوازه پەیەدێ و ئه‌نەکەسێ بینە با هه‌ڤ، داکو د ناڤا خوه دا یه‌کتیه‌کێ پێک بینن.
ئه‌ندامه‌کێ کۆمته‌یا کەنەکێ دایه خویاکرن کو، ئه‌ودێ دگەل هه‌موو پارتی، رێخستن و سازیێن ڕۆژاڤا ڕا هه‌ڤدیتنا بکن و هه‌ول بدن وان پێكبینن.
د ڤێ ده‌ربارێ دا ئه‌ندامێ مه‌کته‌با سیاسیا پارتیا دەمۆكراتا كوردستانێ-سوریێ، محه‌مه‌د ئیسمال دا خویاکرن کو، ئه‌و ژی دخوازن پارتی و ئالیێن سیاسی ل ڕۆژاڤایێ کوردستانێ وه‌رن با هه‌ڤ و یه‌کرێزیه‌کێ ل سه‌ر هنده‌ک پره‌نسیبا د ناڤا کوردان ده ئاڤا بکن. ژ به‌ری هه‌ر تشته‌کی دڤێ پەیەدە گرتیێن ئالیێن سیاسی، ب تایبەتی یێن ئه‌نەکەسێ د زندانا دا ئازاد بکه و ڕێ بده ئۆفسێن وان ڤه‌بن.
د ڕاستیا خوه دا، ل ڤێ ده‌رێ پرسه‌ک گرینگ ده‌ردکه‌ڤه هۆلێ. گه‌لۆ چما پەیەدە ب ڕێیا کەنەکێ دخوازه یه‌کتیه‌کێ د ڤێ قۆناخێ دا ل ڕۆژاڤایێ کوردستانێ پێک بینە؟ د ڤێ پرسێ دا هه‌تا چ راده‌یێ ئەو راستگو نە؟ به‌ری هه‌ر تشته‌کی کەنەکە ده‌زگه‌هه‌ک یێ پەکەکێ یه و چ جوداھی د ناڤبەرا ڤێ ڕێخستنێ و پەیەدێ دا نینە. ل سه‌ر هه‌مان زه‌مینی و پره‌نسیبا سیاسه‌تێ د بن باندۆرا پەکەکێ دا دکن.
ژ ئالیه‌ک دن، ئه‌نکەسە و پەیەدە ۳ جارا جڤیانه . جڤینێن به‌رفره‌ھ کرنه و ل سه‌ر هه‌موو تشته‌کی ل هه‌ڤ کرنه و د ڤێ ده‌ربارێ دا داخویانی دانه. لێ چ جارا پەیەدە ل سه‌ر یا خوه نه‌مایه و د جهده ئه‌و یه‌کێتی و لھەڤھاتن خراب کرنه.
په‌یمانا هه‌ولێر یا یه‌که‌م و دویه‌م ، په‌یمانا دوهۆکێ ژ ئالیێ هه‌ردوو هێزان ڤه هاتیه ئیمزه‌کرن. لێ ناڤەرۆكا وان پەیمانا چ جارا نەھاتن جێبەجێ كركن. ڤێ داویێ ژی د بن چاڤدێریا ئه‌مریکایێ دا هێزێن پێشمه‌رگه‌یێن ڕۆژ ل ڕۆژاڤایێ کوردستانێ د گه‌ل یەپەگێ جڤیان. یەپەگێ داخواز ژ وان کر کو، دڤێ سه‌مبۆلا ئالایا کوردستانێ ل سه‌ر ملێن خوه ڕاکن، نابە ژ بلی سه‌مبۆلێن یەپەگێ چ سه‌مبۆله‌ک دن ب کار بینن و نابە چ پێوه‌ندیه‌کێ د گه‌ل خه‌لکێ ده‌ینن. ئه‌ڤ داخوازی ژ بۆنا كو نه‌گهن چ ئه‌نجامه‌کی بوون.
نها چ هاتیه گوهه‌رتن كو کەنەکە داخوازا یه‌کتیێ دکه؟ ئه‌و نه راستگۆ نە و دڤێ ده‌ربارێ دا نه جدی نە. ئه‌ڤ هه‌ولدان له‌یزتکه‌کا سیاسی یه و ژ ته‌نگاسیه‌کا سیاسی پێکهاتیه. د ڤێ ده‌ربارێ دا دڤێ ئه‌نەکەسە هه‌موو هه‌ڤدیتنا ڤه‌کری ب ئاوایه‌ک زه‌لال بکه و ئه‌نجامێ هه‌ر جڤینه‌کێ ژی ژ ڕایا گشتی را ڕاگەهینه. وه‌کی دن دێ له‌یزتکه‌ک قرێژ بێ له‌یزتن. چ ئه‌نجام ژ ڤان هه‌ولدانان ژی دەرناكەڤە
