نڤیسار

لیندزی گراهام ل رۆژاڤا سەرکەفتی نابە

د ڤان رۆژان دا سەناتۆرێ ئەمریکایی لیندزی گراهام سەردانا دەڤەرێ کر و د ڤێ گەرا خوە یا دپلۆماسی  دا سەردانا بەغدا، هەولێر، ئەنقەرە و رۆژاڤایێ کوردستانێ کر. 

سەناتۆرێ ب ناڤودەنگ یێ دەولەتێن یەکگرتیێن ئەمریکایێ، کو یەک ژ وان کەساتی و سەناتۆران بوو یێ گەلەک ب دژواری دژی بریارا سەرۆکێ بەرێ یێ ئەمریکایێ دۆنالد ترامپ یا ڤەکشینا هێزێن ئەمریکایی ژ رۆژاڤایێ کوردستانێ هەلوەست وەرگرت و ل دژی وێ بریارێ لۆبیەک خورت چێکر. هەروەسا، گراهام یەک ژ وان سەناتۆرانە کو زێدە گرنگیێ ب پرس و پرسگرێکێن رۆژهلاتا ناڤێن و ب تایبەتی ژی ب پرسگرێکا رۆژاڤایێ کوردستانێ دگەل ترکیێ ددە. د ڤێ گەرا خوە یا هەرێمی دا، وی  پرۆژەیەک  هەیە کا چەوا پرسگرێکا ناڤبەرا رۆژاڤایێ کوردستانێ و ترکیێ چارەسەر بکە ب ئاوایەکی کو ئەو چارەسەری د بەرژەوەندیا تەڤ ئالیان دا بە. 

ئەڤ پرۆژەیێ چارەسەریێ یێ گراهام دایە پێشیا خوە و ل سەر کار دکە، بەری چەند سالان سەرۆک مەسعود بارزانی هزر د ڤی پرۆژەیێ چارەسەریێ دا کربوو و پرۆژەیێ سەرۆک بارزانی زەنگینتر و  بەرفرەهتر بوو. هەروەسا زێدەتر د خێرا گەلێ کورد ل رۆژاڤایێ کوردستانێ دا بوو، سەرۆک بارزانی دخوەست تەڤی دیتنا چارسەریەکێ ژ بۆ ئاریشەیێن سەر تخووبێ ترکیێ و رۆژاڤا، دخوەست ئاریشەیێن ناڤخوەیی ژی چارەسەر بکە. 

سەرۆک بارزانی سێ جارا پارتیێن سیاسی یێن رۆژاڤاێی کوردستانێ ڤەخواندن باشوور، ئەو لهەڤ جڤاندن داکو ل سەر بەرنامەیەکێ هەڤبەش رێکبکەڤن. هەر سێ جڤین ژی ب سەرکەفتی بدیماهیک هاتن و سێ رێکەفتن هاتن ئیمزا کرن کو ب رێکەفتنێن هەولێر ١ و هەولێر ٢ و دهۆک هاتنە ناس کرن. 

2022.06.18 کۆنگرەیێ پەیەدێ

ئارمانجا سەرۆک بارزانی ئەو بوو کو:

 یەک: پارتیێن سیاسی یێن رۆژاڤایێ کوردستانێ ل هەڤ بکن و بێ جوداهی هەموو ئالی د پرۆسەسا سیاسی و ئیدارەکرنا رۆژاڤاێ کوردستان دا بەشدار بن و مافی هەموو ئالیان یێ پاراستی بە.

 دو: پارتیا یەکێتیا دەمۆکراتیک (پەیەدە) د بریار و تەڤگەرێن خوە دا ئازاد و سەربخوە بە، ئانکو پەیەدە خوە ژ بن باندۆر و کۆنترۆلا پەکەکێ و قەندیل رزگار بکە، وێنە و درووشم و سلۆگانێن پەکەکێ ل رۆژاڤاێی کوردستان بکار نەئینە داکو چو بەهانە د دەستێ ترکێی دا نەمینن و ببە هێزەک دەمۆکراتیک و نیشا ترکیێ بدە کو چو تێکەلیا وێ ب پەکەکێ ڤە نینە و ژ بۆ سەر ئەمن و ئاسایشا ترکیێ نە گەڤ و مەترسی یە.

 سێ: پارتیێن سیاسی یێن رۆژاڤایێ کوردستانێ ل سەر بەرنامەیەک هەڤبەش ل هەڤ بکن و داخوازا فدەرالیێ د چوارچۆڤەیێ سووریێ دا بکن.

لێ مخابن، پەیەدێ ب گۆتنا سەرۆک بارزانی نەکر و ئەو هەر سێ رێکەفتن بن پێ کرن و  پشتی ژ ئاڤێ دەرباسی رۆژاڤا بوون ئەو رێکەفتن ژی ب ئاڤێ دا بەردان.  هەتا رەوش گەهشتە وێ یەكی کو ترکیە ل بەر چاڤێن جیهانێ ئێرێش بکە سەر رۆژاڤا و عەفرین و چەند باژارێن دن داگیر بکە و کەسەک دەنگی خوە نەکە.

ئیرۆ ژی، سەناتۆرێ ئەمریکایی لیندزی گرهام هەر هەمان داخواز ژ پەیەدێ و هەسەدێ  هەیە کو خوە ژ پەکەکێ و قەندیل دوور بکن، نیشانا ترکیێ بدەن کو ئەو ژ بۆ سەر ئەمن و ئاسایشا ترکێی نە گەف و خەتەرن. دا رێ  ل پێشیا ڤەکرنا دەرگەهێ دیالۆگی ڤەبە.

ل گۆر گراهام ئەو دخوازن هەڤپەیمانێن خوە ل “باکۆرێ رۆژهلاتا سوریێ” هەسەدێ بپارێزن کو د دەما شەرێ دژی داعش دا هەسەدە رۆلەکا مەزن هەبوو و ئەمریکا دخوازە وێ هەڤپەیمانیێ راگرە. د هەمان دەم دا دخوازە ئەمن و ئاسایشا ترکیی ژی یا پاراستی بە. گراهام دبێژە: “چاره‌سه‌ریا کو ئه‌ز گەلەک مناسب دبینم ئه‌وه‌ کو به‌رژه‌وه‌ندیێن ئاسایشا نشتمانی یا ترکیێ چاره‌سه‌ر ببه و د هه‌مان ده‌مێ دا پەیوه‌ندیا بازرگانی د ناڤبه‌را حکومه‌تا ترکیێ و نشته‌جهێن باکورێ رۆژهلاتێ سووریێ دا پێشڤه‌ ببه‌”.

دیماهیێ ئەز دبێژم کا چەوا پەیەدێ ب گۆتنا سەرۆک بارزانی نەکر و هەر سێ رێکەفتن ب ئاڤێ دا بەردان و ل بەر ئاوازێ قەندیل سەما کر، ئها وسا ب یا سەناتۆری ئەمریکایی ژی ناکن  ژ بەر:

١- پەیەدێ د کۆنگرەیا خوە یا داویی دا، کۆنگرەیا ٩ێ دا (٢٠٢٢/٦/١٨) ئیسپات کر کو پارچەیەک ژ پەکەکێ یە، ژ بەر کو  کۆنگرە ب وێنەیێن ئۆجەلان و درووشمێن پەکەکێ هاتبوو خەملاندن. پەیەدە ناخوازە یان نکار خوە ژ بن کۆنترۆلا قەندیل رزگار بکە.

٢- پەیەدە،نها، گەلەک ب لەزوبەز بەر ب رژێما سووریێ ڤە دچە،  هەول ددە دگەل حکومەتا شامێ ل هەڤ بکە و هەسەدە ببە بەشەک ژ لەشکەرێ سوریێ و تخووبێ خوە یێ دگەل ترکیێ بپارێزن. 

ل گۆر رەوشا هەیە گراهام دێ دەست ژ پیا درێژتر ڤەگەرە

Nasrat Hacî

نسرەت حاجی

٢٠٢٢/٧/٧

Back to top button