لێگەرن پەرلەمان ب کارێ خوە رابە
نڤیسین: سەردار هێتوتی
بەرژەوەندخازێن تاریپەرێس، دیڤەلانکێن تێکدەر، خرابکەرێن هزرا نەتەوەیی، هەوە ژ مێژە وەرە دارشتن بۆ پلانێن خو یێن چەپەڵ کرینە و دگەل بەگزادێن خوە هەوە خوەستیە هەبوونا ڤێ هەرێما کوردی، ھەرێما كوردستانێ، ژ ناڤ ببەن.
ژ بۆ ژناڤبرنا قەوارەیا ھەرێما كوردستانێ و ڤێ ئەلندا کوردی گەلەک ژ مێژەیە داگیرکەران ب ڕێکا کوردێن دیڤەلانکێن خوە پلانێن خرابکەر داڕشتینە و نوکە ژی ل سەر هێلا گەرمن و ژ بۆ نەهێلانا ڤێ ڕوناهیێ هەردەم ب پلانن.
ل سالا 1992ێ دەما پەرلەمان هاتیە ئاڤاکرن، خەباتا کوردینیێ کەفتە د قوناغەکا گەش دا و د ڤی پەرلەمانی دا بریار ل سەر بهەرێمبوونا کوردستانێ وەک پشکەک ژ عیراقێ هاتە دان و ئێدی گاڤێن باش هاتن هاڤێتن و یاسا ژێ دەرکەفتن.
ڕاستە هەر زوو هەرێما كوردستانێ کەفتە د شەڕەکێ گڕانێ نافخوەیی دا لێ پەرلەمانێ كوردستانێ هەرێ ل سەر کارێ خوە بەردەوام بوو و دگەل کو زێدە ڕێگری ژی هەبوون، لێ دەستەیا سەروکاتیێ ژ بەر خەمخۆریا خوە یا نەتەوەیی و کوردبوونێ گرانیا بهایێ پەرلەمانی وەک خوە هێلا.
پشتی کەفتنا بەعسیێن عیراقێ ل بەغدا و لھەڤھاتنا هەر دوو پارتیێن مەزن یێن کوردستانێ (پارتیا دەمۆكراتا كوردستانێ و یەكێتیا نشتمانیا كوردستانێ)، ئێدی گەلەک ب زەڵالی پەرلەمان ببوو ناڤەندا ئێکڕێزیا تەڤاهیا پارتیێن باشوور، ل ڤی پەرلەمانی یاسا دهاتنە دەرئێخستن و د بزاڤێ دا بوون کو بشێن ل سەر کارێن حکومەتێ ببن چاڤدێر و بشێن ببنە لێڤەگەر بۆ مافێن وەڵاتیان. لێ هێدی هێدی پەرلەمان هاتە بێ بهاکرن و دەستپێکێ وەک ناڤەندەکا هزرا ناڤچەگەراتیێ لێهات و پاشان کەسێن کێمشیان و ئەزمون هاتنە ڕاکێشان بۆ ناڤا پەرلەمانی و د دووڤ دا ب هند ئەگەرێن دەستتێڤەدانا هند پارتیێن سیاسی ئێدی ئەڤ ناڤەندا هندە گرنگ هاتە لەنگ کرن تا کو گەهشتیە بێهێزبوونا پێنگاڤێن وی.
نوکە ژی پشتی لهەڤهاتنا پارتی و ئێکەتیێ و گرێدانا کومبوونەکا ئێکگرتنێ، بلا هیڤیا گەش هەر ب گەشی بمینە و چ کەس و هێز و لایەنان ئەو شیان نەبن دووبارە پەرلەمانی لاواز و ژار و بێ دەستهەڵات بکەن، لێ د هەمان دەم دا دڤێت ئەندامێن پەرلەمانی ژی د دەرحەق ئەرک و کارێن خوە دا بن و بشێن ب بهێز کار ل سەر یاسایا بکەن و ببنە چاڤدێرێن هەمی ئەرک و کارێن حکومەتێ و یا ژ هەمیان ژی باشترین خالا چاڤدێریێ بلا ژ سندوقا داهاتێ نەفتێ و گازێ دەست پێ بکە.
2020.07.27
