پێڤاژۆیا کو ترکیێ ناڤێ “ترکیه‌یا بێ ته‌رۆر”لێ کری و ئالیێن دن و تایبه‌تی هنده‌ک کورد هه‌ولددن ڤێ پێڤاژۆیێ وه‌که پێڤاژۆیه‌ک ئا “چاره‌سه‌ریێ” بدن نیشاندان، به‌رده‌وام دکه.
بلا که‌سه‌ک خوه نه‌خاپینه و هه‌ول نه‌ده کو، ناڤێن دن ل ڤێ پێڤاژپیێ یان ژی نرخاندنێن ل گۆر دلێ خوە ل سه‌ر ڤێ قۆناغێ بکن. ڕاستی وه‌ک که‌له‌مه‌کی ل به‌رچاڤێ مه‌یه، یان ئه‌م دێ ڤی که‌له‌می ببینن خوه ژێ پارێزن یان ژی ئه‌و که‌له‌م دێ چاڤێ مه را هه‌رە و مه کۆر بکه.
به‌ری هه‌ر تشته‌کی، چەکدانین و هلوەشاندنا پەکەکێ گاڤەک ئه‌رێنیه، ژ به‌ر کو ئاسته‌نگا هه‌ری مه‌زن د ڕێیا ده‌ستخستنا مافێن ڕه‌وا یێن کوردان دا پەکەکە ب خوه یه. ڕابوونا سها چه‌کان دێ ببه ئەگەرەک کو، پتر خه‌لک واقعی بفکرن. مەترسییا چەکان و پەکەکێ ل سەر گەلێ مە رابە خەلک دێ ب مه‌ژییه‌ک ئازادتر بفکرن. پشتی ڤێ ته‌سبیتێ نرخاندنێن بێنه کرن هه‌می ژی نه وه‌کهه‌ڤبن ژی دێ ب نرخبن.
پێڤاژۆ ب ته‌مامی ل گۆر کو دەولەتا ترکیێ پلانکری بڕێڤه دچه. گه‌له‌ک به‌رپرس و ئالیگرێن پەکەکێ داخوویانییا ددن و هه‌ولددن کو، ڤێ پێڤاژۆیێ د قالبه‌ک دن دا بدن نیشاندان ب خەلکی بدن قەبوول کرن، لێ ڤاله‌یه. که‌سێن د ناڤ پەکەکێ دا ل دژی پێڤاژۆیێ و هه‌لوه‌ستا ئۆجەلان بن، دێ ڕۆژه‌ک ژ ڕۆژا جودا ببن و خوه ب ئاوایه‌ک دن یان ب ڕێخستن بێخن یان ژی دێ ل مالا خوه ڕوونن.
نها ئۆجەلان ل ئیمرالی یه و ئازاده. چو ته‌جریت ل سه‌ر وی نینە. ژ بۆ ئۆجەلان ئۆفیسه‌ک گه‌له‌ک به‌رفره ل ئیمرالیێ دهێتە ئاماده‌کرن و ئه‌و که‌سێن کو ئۆجەلان بخوازه، یێن ل جەم وی گرتی ی یان نه گرتی، دێ د ڤێ ئۆفیسێ دا بخه‌بتن. ئانکو ئیمرالی ژ بۆ ئۆجەلان دێ ببه باره‌گه‌هه‌ک به‌رفره و “پێڤاژۆ” ل وێ ده‌رێ بێ ڕێڤه‌برن. ئۆجەلان نه د بن چاڤدێریا ده‌زگه‌هێ ئیستخباراتا ترکیێ(میت) دا به گاڤه‌کێ ناڤێژه و داخوویانیه‌کێ ناده. ڤێجا کی ڤێ یه‌کێ چه‌وا دنرخینه ب که‌یفا خوه یه. ڕاستی ئه‌ڤه.
پرسه‌ک دن هه‌یه کو،ل باشوور، ڕۆژاڤا و ڕۆژهلاتێ کوردستانێ، دێ هه‌لوه‌ستا به‌رپرس و چه‌کدارێن پەکەکێ چه‌وابه و پاشه‌رۆژا وان چبه، هه‌ر چقاس هاتبە پلانکرن ژی نه گه‌له‌کی زه‌لاله.
٢٠٢٥/٧/٢٠
