ل باکورێ کوردستانێ گه‌له‌ک کۆمک، ڕێخستن و پارتی هه‌نه کو سیاسه‌تا خوه وه‌که نه‌ته‌وی – ده‌مۆکرات پێناسه دکن. لێ ئه‌م دزانن کو پێوستیێن ڤێ خه‌تێ ژی باش بجیھ نائینن. هه‌تا نوها ژی، ب ڤێ هه‌لوه‌ستا شه‌لوولی خوه خاپاندنه، ئالیگرێ خوه خاپاندنه، دلخوازێن خوه خاپاندنه. ڕێ و چاره‌سه‌رییێن ب رێکووپێک نیشانی هه‌ڤالبه‌ندێن خوه نه‌دانه. ل مقابلی ڤێ شه‌لوولییێ ئه‌ز ژی دبێژم؛ دڤێ ئه‌ڤ خه‌ت باش زه‌لال ببه و ل باکورێ کوردستانێ ببه ئالته‌رناتفه‌که شێنبه‌ر! ببه هێڤیه‌ک به‌ربچاڤ د ناڤا کوردان دا. ئه‌م دزانن کو هه‌تا نوها ئه‌ڤ خه‌تا کو گه‌له‌ک مرۆڤێ کورد ناسنامایا خوه یا سیاسی پێ دیار دكن، ب ئه‌رکا خوه یا نه‌ته‌وی و سیاسی ڕانه‌بوویه سه‌ر پیان و نه‌بوویه خوه‌دییێ گرسه‌ییه‌کا گه‌له‌ری.
به‌ریا هه‌ر تشتی ئه‌ڤ کێماسی، کێماسیا مرۆڤێن کو خوه وه‌که نه‌ته‌وی-ده‌مۆکرات ددن نشاندان نه. ئه‌و هه‌تا نوها نه‌بوونه به‌رسڤ ژ ڕه‌وشێ ڕها و چاره‌سه‌ر ژی پێشکێشی کوردێن باکور نه‌کرنه.
ئاشکه‌ره‌یه کو خه‌تا نه‌ته‌وی – ده‌مۆکرات ژ به‌ر گه‌له‌ک پرسگرێکێن ناڤخوه‌یی ل باکورێ وه‌لێت قه‌ت بهێز نه‌بوویه. ژ به‌ر گه‌له‌ک سه‌ده‌مان ئه‌ڤ خه‌ت قه‌لس ما یه. هه‌موو که‌س ژی ژ به‌ر ڕه‌وشا کو هه‌یه، ل گۆرا پراتک و دێروونیا خوه هنده‌کان تاوانبار دکن. “ئه‌ز باشم و یێن دن خه‌رابن” دبێژن. لێ ژبیر دکن کو، ئه‌م هه‌موو ب هه‌ڤره خه‌راب دبن! ئه‌م هه‌ڤره ژ ده‌رب دکه‌ڤن. د ڤێ ته‌ڤگرێدانێ ده ئه‌م پێوستییێن خوه یێن دیرۆکی، نه‌ته‌وی و جڤاکی نائینن جھ. وه‌که ته‌ڤگه‌ر ئه‌م نه‌بوونه پێشه‌نگێ جڤاکا خوه و مه ڕۆله‌که نه‌ته‌وی ژی نه‌له‌یستیه.
ئه‌م باش دزانن کو میراتا کو خه‌تا نه‌ته‌وی- ده‌مۆکرات ل سه‌ر ئاڤابوویه ژ هێلا فکری و پرۆگرام دا نه باش زه‌لاله. ئه‌ڤ خه‌ت ل باکورێ کوردستانێ کوور نه‌بوویه، فه‌لسه‌فی نه‌بوویه، د جڤاکا مه دا گۆشت نه‌گرتیه. ڕێھا خوه به‌رنه‌دایه ناڤا جڤاکا کوردان. خه‌تا نه‌ته‌وی-ده‌مۆکرات، ژ به‌ر پرسگرێکێن ناڤخوه‌یی قەلس مایه. ئالیگر و دلخوازێن خوه د ئاسته‌که کو پێوستی پێ هه‌یه برێخستن نه‌کرنه. ئه‌زه‌زتی و نه‌کرکێر که‌تیێ ئاسته‌که گه‌له‌ک بلند. نه خه‌تا نه‌ته‌وایه‌تی و نه ژی خه‌تا ده‌مۆکرات هینا ژی خوه ل گۆرا ده‌مێ باش نکارن پێناسه بکن. زه‌غه‌لیه‌که مه‌نتال هه‌یه، زوھابوونه‌که فکری هه‌یه، قه‌رماندنه‌که سیاسی هه‌یه. یا هه‌ری گرنگ ژی ته‌یۆری و پراكتیکا نه‌ته‌وی-ده‌مۆکرات هه‌تا نوها ل هه‌ڤدوو نه‌بانییا یه.
لێ ئه‌م دبینن کو کۆمک و پارتییێن کو ل سه‌ر میراتا نه‌ته‌وی- ده‌مۆکرات فۆرماتا خوه گرتنه هه‌تا نوها یێکرێز ژی نه‌بوونه. هه‌ر کو دچه هه‌ژمارا ڤان ڕێخستن و کۆمکان ژی زێده دبه. هه‌موو ب هه‌ڤدوو ڕا دبێژن؛ ده‌ریێ مه ژ هه‌موو که‌سان ڕه ڤه‌کرییه. هه‌موو ب هه‌ڤ ڕا دبێژن؛ ئه‌م ل سه‌ر ڕێبازا بارزانی سیاسه‌تێ دکن! ئووهو…
نه ته‌نێ ئه‌و لێ ئیرۆ ل باکورێ کوردستانێ خالتیکا حه‌فسۆ و خالێ محۆ ژی ڤان گۆتنان ل هه‌ر ده‌ڤه‌رێ و د هه‌ر ڕه‌وشێ دا دوباره دکن! لێ ئه‌نجام ژی گه‌له‌کی به‌لۆق و مه‌کرۆھ ل مقابلی مه ڕاوه‌ستیا یه! ئه‌نجامێ کو هه‌یه حه‌نه‌کێ خوه ب مه دکه: دبێژه؛ ما ئه‌ز خوه‌شکم یا هوون؟!
د پراكتیکا سیاسه‌تێ دا مرۆڤ باش دبینه کو ژ ڕێبازا بارزانی پێتر، کۆمک و پارتییێن مه وه‌که دیکێن عه‌لۆکان ل ده‌ردۆرا خوه دزڤرن و ژ خوه ڕا دخه‌بتن. ئان ژی قه‌ت ناخه‌بتن! هه‌ما هه‌نه و هه‌و! دبێژن؛ بلا بچووک به، بلا ژ من ڕا به! ژ بۆنا کو ڤێ ڕه‌وشا مالکامباخ بپارێزن ژی هنده‌ک شه‌لاف و نه‌کرکێران ل دۆرا خوه ڤه‌دحه‌وینن و کارێ به‌تالان دکن. بێ هه‌مپا په‌سنێ هه‌ڤدوو ددن. خوه ل به‌ر بارانێ بلا سه‌به‌ب شل دکن!..
ئه‌ز دبێژم؛ دڤێ خه‌تا نه‌ته‌وی- ده‌مۆکرات خوه ژ ڤێ ڕه‌وشا مالکامباخ زوو ئازاد بکه. مرۆڤێن خێرخواز هەلبه‌ت وێ بپرسن؛ چاوا گه‌لۆ؟ ئه‌ز ژ دل و جان دبێژم؛ پێشی دڤێ ئه‌م هه‌موو ب هه‌ڤرا ڤێ ڕاستیا کو هه‌یه قه‌بوول بکن، ڤێ ڕاستیێ د ناڤا هناڤێن خوه دا بسه‌رفینن و دیڤرا ژی ل سه‌ر چاره‌سه‌رکرنا ڕه‌وشێ ده‌نگێ خوه ب هه‌ڤرا بلند بکن.
د ڤێ مژارێ ده ئه‌م هه‌وجه‌دارێ هه‌موو ده‌نگانه!
ب ڕایا من دڤێ ئه‌م ب هه‌ڤدوو ڕا سیوانه‌کا نه‌ته‌وی-ده‌مۆکرات ئاڤا بکن. ئه‌و سیوان ئان ژی ئاڤانی دڤێ ل سه‌ر كێمترین ماف (فه‌ده‌راسیۆن، مافێ زمان، ناسناما، کولتور) و داخوازێن نه‌ته‌وی – ده‌مۆکراتک وه‌ره جه‌م هه‌ڤدوو و پره‌نسیبێن ده‌مۆکراتیک ژ خوه ڕا بکه بنگه‌ھ. باوه‌ری دڤێ ب کارێ کۆله‌کتیف، ئۆرگان و سازیان وه‌ره و سیاسه‌ت ل سه‌ر ڤی ئه‌ساسی بێ مه‌شاندن. ئه‌ز دبێژم؛ دڤێ خه‌تا نه‌ته‌وی – ده‌مۆکرات ببه باژاری و ئه‌نته‌له‌لکتوه‌ل. نرخێن ده‌مۆکراسی، ده‌مۆکراتیکبوون، ده‌مۆکراتیزه کرن، ڕێباز و هه‌لوه‌ستێن سیاسی دڤێ ل گۆرا مافێ گه‌ردوونی بره‌ڤه بچن. دڤێ ئه‌م ب ڕامان و نرخێن هه‌مده‌می ڕا ئه‌نته‌گره ببن. ئه‌م هه‌ڤره ببن ته‌ڤگه‌ره‌که کوردستانی و جیهانی.
هه‌موو که‌سێن کو خوه د وارێ سیاسی دا ل سه‌ر خه‌تا بارزانی پێناسه دکن، خوه وه‌که نه‌ته‌وی- ده‌مۆکرات ددن ناساندن دڤێ د ناڤا ڤێ ته‌ڤگه‌رێ ده جهێ خوه بگرن. ئه‌م دزانن کو خه‌تا بارزانی خه‌تا دروستیێ یه، دلداریێ یه و فه‌داکاریا نه‌ته‌وی یه. به‌ریا هه‌ر تشتی وه‌که که‌س دڤێ مرۆڤ تخوبێن خوه یێن شه‌خسی ده‌رباس بکه، ئانگۆ ببه نه‌ته‌وی و گه‌ردوونی. هه‌ر که‌س ل گۆرا که‌دا خوه، ل گۆرا ژێهاتبوونا خوه، ل گۆرا تایبه‌تمه‌ندیێن خوه دڤێ خوه ژ بۆنا ڤی کاری ئاماده بکه. چ که‌سایه‌تی، کۆمک، پارتی، ڕێخستن بلا ل ده‌رڤه‌یی ڤێ خه‌باتێ نه‌مینن. هه‌موو کارێن مه بلا شه‌فاف و ئاشکه‌ره برێڤه بچن و ئه‌م چ که‌سان، پارتییان و کۆمکێن کو ئاشکه‌ره ل سه‌ر خه‌تا بارزانی نه و د ناڤا هه‌لوه‌سته‌که نه‌ته‌وی-ده‌مۆکرات دا سیاسه‌تێ دکن ژی ده‌ستهه‌رامۆ نه‌کن. دڤێ هه‌لوه‌ستا مه همبێزکار به، دۆستانه به، دورست به، گه‌رم به و کوردپه‌روه‌ر به!
گۆتنه‌ک باڤ و کالان هه‌یه، دبێژه؛
“یێ کو نه‌بێژه و بکه، شه‌ره!
یێ کو بێژه و بکه، مێره!
یێ کو بێژه و نه‌که، نه‌کرکێره!”
ڤه‌جا ئه‌م چ بکن، ئه‌م ئه‌و ئن!
شه‌ره‌فخان جزیری
24.03.2019
