ل بروکسەلێ پەکەکێ دلێ دژمنێن کوردا گەلەک خوەش کر
دچەند روژێن دەرباز بویی دا ل شێلا دزێ یا گرێدایی قەزا ئامێدیێ چەند گەنجەکێن وێ دەڤەرێ کەتنە بەر هێرشێن فروکێن لەشکەرێ تركیا ب بەهانە یا هەبونا بارەگایێن پەکەکێ ل دەڤەرێ و د ئەنجامدا 4 کەس هاتنە شەهید کرن . نە جارا ئێکێ یە کو ئەڤ جورە ریدانە ل دەڤەرێ د قەومن و خەلکێ سڤیل د بنە قوربانی د ناڤبەرا پەکەکێ و هێرشێن ئەسمانی یێن دەولەتا تركیا دا وەك میناك بەری هەیڤەکێ ل گوندێ ئەرەدنا ژی کو ئەو ژی سەر ب ێانێدیێ ڤەیە 3 وەلاتی ژ لایێ فروکێن ترکیا ڤە هاتنە شەهید کرن.
خەلکێ شێلادزێ ل سەر ڤان بویەران ئێدی هند شیا بێدەنگ بمینیت و د خوپیشاندانەکا جەماوەریدا داخاز ژ هێزین داگیرکەر ێن دەولەتا ترکیا و پەکەکێ کرن کو دەڤەرێن وان چول بکەن دا ئێدی خەلکێ سڤیل نە بنە قوربانی شەرێن وان و هەروەسا داخاز ژ پەکەکێ کرن کو خەباتا خویا چەکداری ببەتە ناڤ باکورێ کوردستانێ کو جهێ خەباتا وان یا سەرەکییە.
تێ زانین پشتی خوپیشاندەران پەیاما خو گەهاندیە جهێن پەیوەندیدار و خوپیشاندان ب دوماهیك هاتی کومەکا خەلکێ دەڤەرێ هێرش برن سەر بنگەهێ لەشکەری یێ ترکا کو نێزیکی 20 سالایە ب بەهانەیا پەکەکێ ل دەڤەرێ نە و د ئەنجامدا بنگە هێ وان ب تانك، زریپوش و هەمی ئالاڤێن وانڤە هاتنە سوتن زەرەرا وان ب نێزیکی 30 ملیون دولارا دهێتە تەخمین کرن .
نە دەولەتا ترك و نەژی هەڤوەلاتیێن ترك ل سەر ڤێ بویەرێ کارڤەدانێن جەماوەری یێن نێگەتیڤ دژی کوردا بگشتی ئەنجام نەدان، لێ مخابن هندەك کوردا ل بروکسەل یا پایتەختێ بەلجیکا و ئەوروپا هێرش برە سەر بارەگایێ نوێنەراتییا حکومەتا هەرێما کوردستانێ و ل پێش چاڤێن کارمەندێن بالیوزخانەیا کومارا ترکیا ئالایێ کوردستانێ ل سەر بارەگایێ حکومەتا هەرێما کوردستانێ ئینا خارێ و بەر د پەنجەرێن بارەگای وەرکرن و بڤێ کریارا ژ کوردا ب خو نە چاڤەرێکری دلێ دوژمنێن کوردا گەلەك خوشکر…
هەلبەت نێزیکی 30 سالا یە کو هێزێن پەکەکێ بنگەهێن خو دانانینە سەرانسەری وان دەڤەرێن کو بەری 1988ێ د بن کونترولا پێشمەرگەی دا بون و ب دەڤەرێن ئازادکری د هاتنە نیاسین، 30 سالە پەکەکێ پتریا گوندنشینێن باشور ژ ئاڤەدانکرنا گوندێن وان بێ بەهر کرینە و کرینە دەڤەرێن لەشکەری، لەوا خەلکێ باشور ژی پەکەکێ ب داگیرکەر د زانیت،
دیسان ب بەهانەیا هەبونا بنگەھ و بارەگایێن هێزێن پەکەکێ دەولەتا ترکیا ژی ژ سالا 1992ێ هەتا نوکە بەردەوام کریارێن جودا جودا ل دژی هێزێن پەکەکێ ئەنجام ددەت و ب تنێ خەلکێ سڤیل بەردەوام د بنە قوربانی.
ھشیار توڤی
31.01.2019
