ل رۆژاڤایێ كوردستانێ خیانەتا ھەڤبەش
ژئه‌نجاما په‌یمانا لۆزانێ، کوردستان ژ ئالیێ ئه‌مپه‌ریالیستان ڤە هات داباش کرن. کوردستان بوو ٤ به‌ش و که‌ت بن باندۆر و ده‌ستهلاتداریا چار ده‌وله‌تان: ده‌وله‌تا ترک، ده‌وله‌تا ئیرانێ، ده‌وله‌تا عیراقێ، ده‌وله‌تا سووریێ.
ده‌وله‌تا ترک، باکوورێ کوردستانێ داگیر كر. ل باکوورێ کوردستانێ سیسته‌مه‌کا کۆلۆنیالیست ئاڤا کر. هه‌موو مافێن نه‌ته‌وه‌یا کورد پشتگوھ خستن. ل هه‌مبه‌ری سیسته‌ما کۆلۆنیالیست هه‌موو خه‌بات، مخاله‌فه‌ت، سه‌رهلدانێن ملی یێن نه‌ته‌وه‌یا کورد ب زۆر و شده‌تێ ته‌مراندن.
ل کوردستانێ، كومكوژیێن مه‌زن ل دار خستن. میلیۆنه‌ک کورد کووشتن. ژ بۆنا کو کوردستان ژ کوردان ڤالا ببه، کورد ژ کوردستانێ کۆچبه‌ر کرن. ژ بۆنا کو کورد و کوردستان ببه ترک، ترک ئانین ل کوردستانێ جیوار کرن.
فه‌لسه‌فه‌یا دامه‌زراندنا ده‌وله‌تا ترک که‌مالیزمێ، نه‌ته‌وه‌یا کورد وه‌ک دژمن په‌ژراند. نه‌ته‌وه‌یا کورد و کوردستان، هه‌ر ده‌مێ ژ بۆنا خوه ته‌هلووکه و ته‌هدید دیت.
هه‌ر ده‌م ترسیا کو کوردستان دێ ژ بن باندۆر و ده‌ستهلاتداریا وێ ده‌رکه‌ڤه. لۆما ژی هه‌موو سیاسه‌ت و ستراته‌ژیا خوه ژ بۆنا کو نه‌ته‌وه‌یا کورد و کوردستان ئازاد و سه‌ربخوه نه‌به ته‌سپیت کر.
ده‌وله‌تا ترک، به‌س باکوورێ کوردستانێ نه، هه‌موو به‌شێن دن یێن کوردستانێ ژی، ژ بۆنا خوه ته‌هدید و ته‌هلووکه په‌ژراند.
لۆما ژی ژ بۆنا کو ل به‌شێن دن ژی کورد ئازاد نه‌بن و نه‌بن ده‌وله‌ت، سیاسه‌تاکا کلاسیک نژادپه‌ره‌ستی و کۆلۆنیالیست مه‌شاند، ب ده‌وله‌تێن داگیرکه‌ر و کۆلۆنیالیست ڕا هه‌ر ده‌م د ناڤ پێوه‌ندیه‌که ستراته‌ژیک دا بوو.
ده‌وله‌تێن دن یێن کۆلۆنیالیست ژی هه‌مان سیاسه‌ت په‌ژراند. وان ژی ب ده‌وله‌تا ترک ڕا تیفاق و هه‌ڤکاری کرن، ل هه‌مبه‌ری ته‌ڤگه‌را ملی یا کوردستانێ ته‌ڤگه‌ریان.
ده‌وله‌تا ترک، لۆما د سه‌رهلدانا ئاگریێ دا، ب ئیرانێ ڤه ئاخا کوردستانێ د ناڤ هه‌ڤ دا پێك گوھارت.
ده‌وله‌تا ترک لۆما:
*ل دژی ده‌وله‌تا کوردستان یا مه‌هابادێ (۱۹٤٦)،
*ل دژی ئۆتۆنۆمیا کوردستانێ (۱۹۷۰)،
*ل دژی ڕه‌فه‌راندووما سه‌رخوه‌بوونا کوردستانێ (۲۰۱۷) ده‌رکه‌ت.
ده‌وله‌تا ترک، د ڤێ مه‌رهه‌له‌یێ ده ژی، ل ڕۆژاڤایێ کوردستانێ، ئازادی و سه‌رخوه‌بوونا نه‌ته‌وه‌یا کورد ژ بۆنا خوه خه‌ته‌ر دبینه.
ڤێ یه‌کێ ژی گه‌له‌ک ئاشکه‌ره دیار دکه.
دبێژە کو “ ده‌ستهلاتداریا کوردان ل ڕۆژاڤایێ کوردستانێ، ژ بۆنا مه خه‌ته‌ر دبه.”
ئه‌ڤ ده‌ستهلاتداریا، دێ ڕۆژێن پێش دا ژ بۆنا کو کوردێن ل ترکیێ ببه مۆده‌ل.
لۆما عه‌فرین داگیر کر. لۆما دخوازه کو هه‌موو ڕۆژاڤایێ کوردستانێ داگیر بکه.
ئه‌ڤ ته‌ڤگه‌را ده‌وله‌تا ترک، ل دژی حقووقا ناڤنه‌ته‌وه‌یی یه. ل دژی مافێن چاره‌نڤیسیا نه‌ته‌وه‌یا کورده.
چ ده‌ما ئه‌ڤ ته‌ڤگه‌را داگیرکه‌ری ژ ئالیێ کوردان ڤە نایێ قه‌بوول کرن و نایێ په‌ژراندن.
دڤێ هه‌موو کورد ل دژی داگیرکه‌ریا ده‌وله‌تا ترک یا ڕۆژاڤایێ کوردستانێ ده‌رکه‌ڤه.
ئه‌ڤ ته‌ڤگه‌ر ل دژی گه‌لێ ترکه ژی. لۆما دڤێ ئه‌و ژی ل دژ ده‌رکه‌ڤن.
ئه‌ڤ ته‌ڤگه‌ر دبه سه‌ده‌مێ فه‌لاکه‌تا ئابۆری ژی، به‌ده‌ل ژی دێ ل سه‌ر پشتا گه‌ل بار ببه.
مخاله‌فه‌تا دژمنێ حکوومه‌تا ئه‌ردۆگان، گه‌له‌ک ب هێسانی ده‌نگ دا کو ده‌وله‌تا ترک، ڕۆژاڤایێ کوردستانێ داگیر بکه.
ئه‌ڤ ژی ده‌ردخه هۆلێ کو ژ بۆنا پارتیێن سیاسی یێن ترک ژی کورد و کوردستان دژمنه.
دڤێ کو ده‌وله‌تا ترک ده‌ڤ ژ ئۆپه‌راسیۆن و داگیركرنا خوه یا ل ڕۆژاڤایێ کوردستانێ به‌رده.
خیانه‌تا ئه‌مریکایێ و پەكەكێ/پەیەدێ…
ئه‌مریکایێ ب ڕیا پەكەكێ نه‌ته‌وه‌یا کورد ل ڕۆژهلاتا کوردستانێ خست بن خه‌ته‌ریێ. نووها ژی ده‌ڤ ژ کوردان به‌ر دده. کوردان دده به‌ر ده‌ڤێ ده‌وله‌تا داگیرکه‌ر یا ترک. ئه‌ڤ جاره‌کا دن خیانه‌ته‌کا مه‌زن یا ئه‌مریکایێ ل هه‌مبه‌ری کوردانه.
پەكەكە/پەیەدێ ژی سیاسه‌ته‌که گه‌له‌ک خه‌ته‌ر، تفاقێن گه‌له‌ک خه‌ته‌ر مه‌شاند. بوو سه‌ده‌م کو ده‌وله‌تێن کۆلۆنیالیست گه‌له‌ک ب هێسانی ئێرشی ڕۆژاڤایێ کوردستانێ بکن..
تێ گۆتن کو “ئه‌مریکا ده‌ما هات سووریێ ژ بۆنا کوردان نه‌هات. ژ بۆنا کو ل دژی داعشێ شه‌ر بکه هات سووریێ. چ وه‌ختا نه‌گۆت کو ‘ئه‌ز ژ بۆنا کوردان هاتمه سووریێ. ئه‌زێ مافێن وان و وه‌لاتێ وان بپارێزم. ئه‌مه‌ریکا نووها ژی ڤێ ستراته‌ژیێ دمه‌شینه. دەلیڤێ دده ده‌وله‌تا ترک کو ڕۆژاڤایێ کوردستانێ داگیر بکه. گه‌لۆ ئه‌مریکا چما خیانه‌تکار تێ ب ناڤ کرن؟”
من ژی د گه‌له‌ک ماقه‌له‌یێن خوه دا نڤیساند کو ئه‌مریکا ژ بۆنا کوردان نه‌هاتیه سووریێ. ژ بۆنا سووریێ و کوردان و کوردستانێ ژی خوه‌دیێ پرۆژه‌یه‌کێ نینه.
لێ ده‌ما کو ل هه‌مبه‌ری داعشێ ده‌ست ب شه‌ر کر؛ نه‌خوه‌ست کو له‌شکه‌رێ خوه ب کار بینه و بده کوشتن. ژ بۆنا خوه ل له‌شکه‌ران گه‌ریا کو شه‌رێ خوه ب وه‌کاله‌تێ بمه‌شینه.
پەكەكێ/پەیەدێ ل سووریێ له‌شکه‌ری ژ ڕژێما فاشیست و کۆلۆنیالکیست یا بەعسی و ده‌وله‌تا ئیرانێ و ڕووسیایێ ڕا دکر.
پشتی ده‌مه‌کێ ئه‌مرکایێ پەكەكێ/پەیەدە کری. پەكەكێ/پەیەدێ ژی گۆر ئاقلێ خوه یێ سڤک پلانا ده‌ستهلاتداریا خوه د سه‌ر ئه‌مریکایێ ڕا کر. بوو له‌شکه‌رێ ئه‌مریکایێ.
ده‌ما کو پەكەكێ/پەیەد بوو له‌شکه‌رێ ئه‌مریکایێ، ئه‌مریکایێ گه‌له‌ک ئاشکه‌ره دیار کر کو “پلانا مه یا کو ئه‌م کوردستانه‌کێ ئاڤا بکن و سووریێ پارچه بکن نینە. پەكەكێ/پەیەد به‌س ب په‌ره ژ مه ڕا له‌شکه‌ری دکن. له‌ورا پەكەكێ/پەیەد له‌شکه‌رێن ئه‌رزانن.”
پەكەكێ/پەیەدێ ژی له‌شکه‌رێن خوه ژ جوانێن کورد چێکربوو.
وێ ده‌مێ هه‌ر کاره‌کی پەكەكێ/پەیەد وه‌ک کارێن کوردان هات شرۆڤه کرن.
له‌شکه‌ربوونا پەكەكێ/پەیەدێ ژ بۆنا ئه‌مریکایێ ژی، ژ کوردان ڕه وه‌ک ئالیکار هات په‌ژراندن.
ژ ڤێ ژی ئه‌و ئه‌نجام هات ده‌رخستن کو ئه‌مریکا دخوازه کوردان بپارێزه. هه‌تا دکاره کوردستانێ ژی ئاڤا بکه.
لێ گه‌له‌ک ئاشکه‌ره بوو کو ئه‌مریکا ل عیراقێ ژ ده‌وله‌تا کوردستانێ ڕه پشتگری نه‌کر کو کوردان ب رێیەكا گه‌له‌ک ده‌مۆکراتیک و ب ڕێیا ڕه‌فه‌راندوومێ بریارا ده‌وله‌تئاڤاکرنێ دابوون.
ئه‌مریکایێ ل باشوورێ کوردستانێ ژ ده‌وله‌تا کوردستانێ ڕا ئالیکاری نه‌کر کو باشوورێ کوردستانێ وه‌لاته‌ک ده‌وله‌مه‌ند یێ په‌ترۆلێ بوو، دێ چه‌وا ل ڕۆژاڤایێ کوردستانێ بخوازه ده‌وله‌ت ئاڤا بکه؟
ب سالانه کو ئه‌ز ڤان نێریناندنڤیسم، هه‌زار مخابن سیاسه‌تڤان و ڕه‌وشه‌نبیرێن مه ڤێ یه‌کێ بیر نابن و فاهم ناکن.
پشتی ئه‌ڤ فاهماندنێ پەكەكێ/پەیەدێ ئه‌و ده‌وله‌تێن ژ پەكەكێ/پەیەدێ ڕا ئالیکاری دکرن، بوون دژمنێن کوردان.
ژ ئالیێ دن ڤە ئه‌مریکایێ ب ده‌ستێ پەكەكێ/پەیەدێ باژارێن عه‌ره‌بان ژی داگیر کربوو.
عه‌ره‌ب ژی ب ته‌ڤایی بوون دژمنێ پەكەكێ/پەیەدێ و کوردان.
لۆما پشتی جڤینا ئاستانا ، من نڤیساند کو ڕووسیایێ و ئیرانێ بریار دان کو ژ بۆنا کو ژ ئه‌مریکایێ و پەكەكێ/پەیەدێ خه‌لاس ببن و یه‌کیتیا سووریێ بپارێزن؛ پشتگریا ئۆپه‌راسیۆن و داگیرکرنا ده‌وله‌تا ترک یا ڕۆژاڤایێ کوردستانێ کرن.
ڕژێما بەعسێ ژی به‌ریا جڤینا ئاستانا یێ ژ نه‌ته‌وه‌یا یه‌کگرتی ڕا نامه‌یه‌ک شاند کو “پەكەكێ/پەیەد ڕێخستنه‌که ته‌رۆریسته.”
ئه‌ڤ داخویانی و بریارا سووریێ ژی ده‌رفه‌ت ددا ده‌وله‌تا ترک کو ڕۆژاڤایێ کوردستانێ داگیر بکه.
له‌ورا كو ئیرانێ د جڤینا ئاستانایێ دا بنخه‌ته‌که قالند کر کو دڤێ په‌یمانا ۱۹۹۸ یا ئه‌ده‌نه‌یێ د ناڤبه‌ینا ده‌وله‌تا ترک و سووریێ د جی ب جی ببه.
د وێ په‌یمانێ دا تێ گۆتن کو ده‌وله‌تا ترک، ده‌ما کو ژ سووریێ ل هه‌مبه‌ری وان ته‌ڤگه‌ره‌کا ته‌رۆری پێک بێ، ده‌وله‌تا ترک دکاره بکه‌ڤه ناڤ ئاخا سووریێ و ل هه‌مبه‌ری ته‌ڤگه‌را ته‌رۆری شه‌ر بکه.
ئه‌نجاما ڤێ په‌یمانێ ئۆجەلان ژ سووریه‌یێ ده‌رکه‌ت.
ئەڤ په‌یمان ڕێ ژ داگیرکه‌ریا ده‌وله‌تا ترک ڕا گه‌له‌ک ئاشکه‌ره ڤه‌دکه.
ئه‌و بریارا ده‌وله‌تا سووریێ داگیركركنا عه‌فرینێ ژی ڕه‌وا دکه.
ده‌ما ئه‌ڤ هه‌موو قه‌وماندن ب هه‌ڤ ڕا بێن ئانالیز کرن و شرۆڤه کرن، گه‌له‌ک ئاشکه‌ره خویا دکه کو ل ڕۆژاڤایێ کوردستانێ، پشتی داخویانیا قه‌سرا سپی، خیانه‌تا ئه‌مریکایێ و /پەكەكێ/پەیەدێ یا هه‌ڤبه‌ش هه‌یه.
ئامه‌د، 2019.10.11
ئیبراهیم گوچلو
