ل سوریێ و ڕۆژاڤایێ کوردستانێ ڕۆژانه گوهه‌رتنێن گرینگ چێ دبن. ڕوسیا، ئه‌مریکا و ترکیێ ڕۆلێ ئه‌ساسی دله‌یزن. ئه‌مریکا سیاسه‌ته‌ک گه‌له‌ک شێلوو رێڤە دبە ژ بۆ ڤێ سیاسه‌تا ئه‌مریکایێ گه‌له‌ک جاران هێزێن کو ئه‌مریکا پشتگریا وان دکه نزانن دێ چ بکن. ئه‌ڤ یه‌ک ژی تایبه‌تی ژ بۆ کوردا سەرگێژیەکە.
ڕوسیا و ئیران سیاسه‌تا خوه ل سوریێه ل سه‌ر مایین و پاراستنا ڕژێما ئه‌سەد ئاڤاکرنه. نها ل سه‌رعه‌ردێ سیاسه‌تا وان سه‌رکه‌فتی دیارە.
ترکیا ب ڕێیا چه‌کدارێن موخاله‌فه‌تا سوریێ ده‌ڤه‌رێن وه‌ک عه‌فرن، گرێ سپی و سه‌رێکانیێ وه‌رگرتنه و ب حێجه‌تا پاراستنا سنۆرێ خوه سیاسه‌ته‌کێ ڕێڤه دبن. لێ ئاشکەرایە ترکیا دێ پاشه‌رۆژێ دا ل سوریێ و ڕۆژاڤایێ کوردستانێ دەرکەڤە.
ژ بۆ کوردا یا هه‌ری گرینگ پرسا کورده. گه‌لۆ د پاشه‌رۆژێ دا د بن سها سیاسه‌تا کو ئه‌ڤ وه‌لات ڕێڤه دبن ،دێ
چاره‌نووسێ کوردا چبه ؟
پشتی ئێریشا ترکیێ یا
گرێ سپی و سه‌رێکانیێ و تایبه‌تی ئۆپه‌راسیۆنا کوشتنا ئه‌بوبه‌کر به‌غدادی، کوردا
پشتگریه‌ک مه‌زن ژ ئه‌مریکا و ئه‌ورۆپایێ وه‌رگرت. گه‌له‌ک ئالیێن سیاسی پشتگری
ددن کوردان. لێ ڕه‌وشا کوردا ده‌ست ناده کو پێشوازیه‌ک سیاسی ل ڤان پشتگریا بکن و
پشتگریا هه‌یی بێخن د خزمه‌تا ده‌ستکه‌تنا مافێن ڕه‌وا یێ گه‌لێ کوردستانێ دا.
مخابن باندۆرا پارتیا کارکەرێن کوردستانێ (پەکەکە) ل سه‌ر
پەیەدێ و هەسەدێ دبه ئاسته‌نگ د ڕێیا ده‌ستخستنا مافێن ڕه‌وا یێن کوردان دا. بڤێ
نه‌ڤێ پەکەکە وه‌ک هێزه‌ک “ته‌رۆرست“ ژ ئالیێ جهانێ ڤه تێ ناساندن. ترکیا ژی ڤێ
ئارگومه‌نتێ د قادا ناڤنه‌ته‌وی دا گه‌له‌ک ب شارازایی ب کار تینه و ڕێ ل گه‌له‌ک
تشتان دگره.
د ڕاستیا سوریێ و ڕۆژاڤایێ کوردستانێ دا ژی سیاسه‌تا پەکەکێ ژ بۆ کوردا ونداکرنا مافێن نه‌ته‌وەینه و پەکەکە ئاسته‌نگا هه‌ری مه‌زنە د رێیا ده‌ستخستنا ستاتویه‌کی ژ بۆ کوردستانا ڕۆژاڤا.
ئه‌مریکا و هنه‌ک وه‌لاتێن هه‌ڤپه‌یمان گه‌له‌ک هه‌ول ددن کو پەیەدە و هەسەدە ژ بن باندۆرا پەکەکێ ده‌رکه‌ڤن و د گه‌ل ئه‌نەکەسێ هه‌ڤکاریه‌کێ پێکبینن دا کو بکاربن ژ بۆ ده‌ستخستنا مافێن ڕه‌وا یێن کوردا ل ڕۆژاڤایێ کوردسیانێ هنده‌ک ئه‌نجامێن ئه‌رێنی ده‌ستڤه بینن.
تایبه‌تی د ڤێ داوییێ داه هه‌لوه‌ستا سه‌رۆکێ هه‌رێما کوردستانێ و پێوه‌ندیا د گه‌ل فه‌رماندارێ گشتێ یێ هەسەدێ زه‌مینه‌ک پێیدا کریه کو ل ڕۆژاڤا یه‌کێتیه‌ک د ناڤا کوردان ده ئاڤا ببه. نێچیرڤان بارزانی سیاسه‌ته‌ک ڕاسته‌قینە ژ بۆ به‌رژه‌وه‌ندیێن کوردێن ڕۆژاڤایێ کوردستانێ مەشاندیە. لێ مخابن ئالیێن وه‌ک پەکەکێ ب مزایەدا سیاسی هه‌ولددن ڕێ ل پێشیا سیاسه‌تا سه‌رۆکێ هه‌رێما کوردستانێ بگرن. لێ سیاسه‌تا واقعی و کوردستانی د گۆتنێن بارزانی دا ڕاستیا خوه دبینه. داخوویانیێن مەزلوم عه‌بدی ژی د ڤێ ده‌ربارێ دا ڕۆله‌ک ئه‌رێنی دله‌یزه و مەزلوم هاریکاریا بارزانی دخوازه.
تێ زانین کو پەکەکە ل دژی باشوورێ کوردستانێ گه‌له‌ک خراب سیاسه‌تێ دکە و هه‌تا ڕاده‌یه‌کی دبه ته‌هدیده‌ک مه‌زن ل سه‌ر باشوورێ کوردستانێ. لێ فه‌رماندارێ گشتێ یێ هەسەدێ ل دژێ سیاسه‌تا پەکەکێ گاڤا دئاڤێژه و ب ڤێ یه‌کێ پشتگریه‌ک ب هێز په‌یدا دکه. فه‌رماندارێ هسدێ ژ ئالیێ ئه‌مریکا و ڕوسیا ڤه ژی هاتیه قه‌بوول کرن.
نها ڕه‌وشا ده‌رکه‌تی هۆلێ ژ بۆ کوردا ل ڕۆژاڤایێ کوردستانێ دەلیڤەک دیرۆکی یه. ئه‌گه‌ر کورد ڤێ فدەلیڤا زێرین ب کار نه‌ینن، هێدی د خه‌یالان دا ژی مرۆڤ دێ نکاربه به‌حسا ستاتویه‌کی کوردستانی ژ بۆ ڕۆژاڤایێ کوردستانێ بکه.
ئه‌ڤ دەلیڤە ژی ئه‌وه کو، پەیەدە و هەسەدە ب ڤه‌کری ڕه‌دا سیاسه‌تا پەکەکێ بکن و باندۆرا قه‌ندیلێ بشکینن و ل گۆر مه‌رجێن وه‌لاتێ خوه و ژ بۆ به‌رژه‌وه‌ندیێن مله‌تێ خوه یێن نه‌ته‌وەیی ته‌ڤبگه‌رن. ل گۆر مه‌رجێن ڕۆژاڤایێ کوردستانێ د گه‌ل ئه‌نەکەسێ په‌یمانه‌ک سیاسی و ڤێ یه‌کێ ڤه گرێدایێ هێزێن یەپەگێ و پێشمه‌رگه‌یێن ڕۆژ بکن یه‌ک و ل گۆرا به‌رژه‌وه‌ندیێن کوردستانا سوریێ ته‌ڤبگه‌رن.
دێ ئه‌ڤ یه‌ک هێڤیه‌ک مه‌زن په‌یدا بکه و ببه سه‌ده‌مه‌ک کو کورد ل هه‌موو ده‌ڤه‌ران پشتگریه‌ک مه‌زن بکن. ئه‌ڤ یه‌ک داخوازیا ئه‌مریکا و وه‌لاتێن هه‌ڤپه‌یمانە ژی.
پێوسته سیاسه‌تمه‌دار، ڕه‌وشه‌نبیر و هه‌موو کورد پشتگریا ڤێ یه‌کێ بکن دا کو، کورد ل ڕۆژاڤا به‌ده‌لێ خوینا ڕژاندین بستینن. به‌ده‌لێ ڤێ خوینێ ستاتویه‌ک کوردستانی ده‌ستخستنا مافێن نه‌ته‌وەی یه.
ئه‌گه‌ر ئه‌ڤ یه‌کێیتی د ناڤا کوردێن ڕۆژاڤا دا چێ ببە و سیاسه‌تا پەکەکێ به‌رته‌راف ببە، دێ له‌یزتکێن ترکیێ ژی تێکهه‌رن و مه‌جبور ببه ژ هه‌رێمێ و ژ ئاخا کوردستانێ دوور بکه‌ڤە.
١١/١١/٢٠١٩
ئەنالیز/ ن. فرات
