ل باژارێ ستۆكهۆلمێ پایتەختێ سوێدێ، ل رۆژا ٢٠٢٣/٣/١٢ێ، ١٢٠ سالیا ژداییکبوونا سه‌رۆکێ نەتەوەیی مسته‌فا بارزانی یێ نەمر كو، ژ ئالیێ پارتیا ده‌مۆکراتا کوردستانێ، لیژنا ناڤچەیا سوێدێ ڤە هاتبوو ئامادەكردن، ب مەراسمەكا بژارتە هات پیرۆز كرن. کوردێن ژ هەموو پارچەیێن كوردستانێ به‌شداری مەراسمێ بوون. مەراسمێ ب ده‌قیقه‌یه‌کێ رێزگرتن ژ بۆ گیانێ پاکێ بارزانی و شه‌هیدێن کوردستانێ ده‌ست پێ کر. سروودا نه‌ته‌وی ئەی رەقیب هاته خوه‌ندن.
د به‌شا یه‌که‌م دا، عیسا فه‌یلی به‌رپرسێ لیژنەیا سوێدێ یا پارتیا ده‌مۆکراتا کوردستانێ بخێرهاتنا ئاماده‌بوویان کر، ئه‌نوه‌ر مه‌سیفی به‌رپرسێ لقێ ٦ یێ پەدەکێ یێ ئه‌ورۆپایێ ب ڤێ هەلكەفتێ گۆتاره‌ک پێشکێش کر.
پەرلەمه‌ته‌رێ ژ پارتیا لیبه‌رال ئا سوێدێ فره‌دیرک مالم و سه‌رۆکێ کۆمیته‌یا هه‌ڤکاریا هێزێن سیاسی یێن کورد و کوردستانێ ل سوێدێ عەلی جومعە گۆتارێن خوە پێشكەش کرن.
د به‌شا دویه‌مین دا، پانه‌له‌ک ب رێڤەبەریا رۆژنامه‌ڤان نەسرەت حاجی و ب به‌شداریا نڤیسکار حامید گەوهه‌ری ژ رۆژهلاتێ کوردستانێ، سیاسه‌تمه‌دار عه‌بدولباست سه‌یدا ژ رۆژاڤایێ کوردستانێ و ئاکاده‌میست ئه‌کره‌م ئونه‌ن ژ باکورێ کوردستانێ برێڤه چوو. هه‌ر سێیان ئالیه‌ک ژ ژیان و ته‌کۆشینا سه‌رۆک بارزانی ژ ئاماده‌بوویان را شرۆڤه کرن.
