حكومەتا باشوورێ كوردستانێ گەلەك جاران داخواز ژ پەكەكێ كریە كو ژ سەر تخووبێ باشوورێ كوردستانێ ئێریشان نەبە سەر بنگەھێن لەشكەرێ تركیێ ل باكورێ كوردستانێ و داخواز ژێ كریە كو رەوشا باشوور ل بەرچاڤان بگرە و رێزێ ژ قانوون و سەروەریا باشوورێ كوردستاێ را بگرە. لێ پەكەكێ چ جارا گوھ نەدایە حكومەتا باشوور و ب زانین و پلان دخوازە رەوشا سەر تخووبان ئالوز بكە و باشوورێ كوردستانێ بكە مەیدانا شەر و دەستكەفتیێن باشوور تێك بدە.
چه‌کدارێن پارتیا كاركەرێن كوردستانێ ( پەکەکە) رۆژا 4ێ گولانێ، ژ کوردستانا باشوور ب تۆپێن هاون ئێریشی بنگه‌هه‌ک ل لەشكەرێ ترکیێ کر. د ئه‌نجاما ڤێ ئێریشێ ده 3 ئه‌فسه‌رێن ترک هاتن کوشتن و هنده‌ک ژی بریندار بوون.
وه‌زاره‌تا به‌رگریا ترکیی ڕاگەهاند کو پشتی ڤێ ئێریشێ، ل باشوورێ کوردستانێ ل ده‌ڤه‌رێن سنۆر ل هەمبه‌ر چه‌کدارێن پەکەکێ وان ده‌ست ب ئۆپه‌راسیۆنه‌کێ کریه.
ل گۆرا ئاگاهداریا ئەو ئۆپه‌راسیۆن به‌رده‌وامه و سنۆرێ باشوورێ کوردستانێ ل ده‌ڤه‌را مێرگه‌سۆرێ د ناڤبه‌را چه‌کدارێن پەکەکێ و ئارتێشا ترک دا شه‌ر ده‌ردکه‌ڤه و ترکیێ د ڤێ ئۆپه‌راسیۆنێ دا هه‌لیکۆپته‌رێن شه‌ر ژی ب کار تینه.
ل گۆرا داخوویانیا وه‌زه‌ره‌تا به‌رگریا ترکیێ هه‌تا نها 5 چه‌کدارێن پەکەکێ د ڤان ئۆپه‌راسیۆنان دا ژیانا خوه ژ ده‌ست دانه.
پەکەکە داخوویانیا خوه دا دبێژه کو پشتی چالاکیا وان ل هەمبه‌ر بنگه‌هێ له‌شکه‌ریێ ئارتێشا ترکیێ، ترک ده‌ڤه‌را باشوورێ کوردستانێ به‌رده‌وامی تۆپباران دکن و ڤێ تۆپبارانێ زه‌ره‌ره‌ک مه‌زن دایە ده‌ڤه‌رێ.
چالاکیێن پەکەکێ یێن کو ژ باشوورێ کوردستانێ ئێریشێ ئارتێشا ترکیه دکه، ژ زه‌ره‌رێ پێڤه تر فه‌یدا وێ نینە. ئه‌ڤ ئێریش ب زانه‌بوون ژ بۆ کو ترک ژی ئێریشێ باشوورێ کوردستانێ بکن تێنه کرن. ئارمانجا پەکەکێ ئه‌وه کو، به‌رێ ترکیێ بده باشوورێ کوردستانێ. ژ به‌ر کو گوندێن ده‌ڤه‌را سنۆر و خه‌لکێ سڤیل زه‌ره‌ره‌ک مه‌زن ژ ڤان ئێریشان دبینن و ئه‌ڤ یه‌ک نه خه‌ما سه‌رێ پەکەکێ یه، لێ مخابن، پلانێن وان ئالۆزکرنا ڕه‌وشا هه‌رێما کوردستانێ یه.
