د ڤێ قۆناغێ دا کورد هه‌موو ل سه‌ر یه‌کرێزیا کوردان ل ڕۆژاڤایێ کوردستانێ ئه‌رێنی دفکرن و باوه‌ری ئه‌وه کو، ژ بۆ کورد ل ڕۆژاڤایێ کوردستانێ بگەهن ئارمانجا خوه و د سووریا نوو دا ببن خوه‌دی ستاتوویه‌کی، دڤێ یه‌کرێزیا خوه پێکبینن و بێ کو بکه‌ڤن د بن باندۆرا هنده‌ک ئالیێن سیاسی دا ب ئیرادا خوه ژ بۆ به‌رژه‌وه‌ندیێن کوردێن ڕۆژاڤایێ کوردستانێ ب بریاربن.
ژ بۆ ڤێ گاڤا پیرۆز سه‌رۆک بارزانی نوونەرێ خوه ڕێکر ڕۆژاڤایێ کوردستانێ، په‌یاما خوه گەهاند فه‌رماندارێ هەسەدێ و ئه‌و ژ بۆ هه‌ڤدیتنه‌كێ ڤه‌خواند هه‌ولێرا پایته‌ختێ کوردستانێ. مەزلوم ئه‌بدی ل سه‌ر داخوازا سه‌رۆک بارزانی هاته هه‌ولێرێ هه‌ڤدیتنه‌ک گه‌له‌ک گرینگ د ڤێ قۆناخا هه‌ساس دا پێکانی.
ژ بۆ یه‌کرێزیا کوردان ل ڕۆژاڤا دڤێ پەكەكە خوه ژ ڤێ ده‌ڤه‌رێ ڤه‌کشینه. وه‌ک تێ زانین ژ به‌ری نها د قۆناخێن جودا دا ژ بۆ یه‌کرێزیا کوردێن ڕۆژاڤا سه‌رۆک بارزانی ۳ جارا هه‌ولدان کرن و هه‌رسێ جاران ژی ناڤبه‌را ئالیێن کورد دا ل ڕۆژاڤایێ کوردستانێ په‌یمان هاتن ئیمزا کرن. لێ چو جارا پەكەكێ نه‌هشت کو ئه‌ڤ په‌یمان بکه‌ڤن ژیانێ. نه هه‌وجه‌یه کو مرۆڤ به‌هسا ڕه‌وشا کوردستانا ڕۆژاڤا د بن ده‌ستهلاتا پەكەكێ دا بکه، هه‌تا وه‌ک ڤێ گاڤێ گرتیێن کورد د زیندانێ پەیەدێ دا هه‌نه. لێ نها ڕه‌وشه‌ک ل سووریێ و رۆژاڤایێ كوردستانێ
دا هەیە کو، دڤێ کورد ژ ده‌ڤ هه‌موو به‌رژه‌وه‌ندیێن ڕێخستنی و خزبی به‌ردن به‌رژه‌وه‌ندیا کوردستانێ ل سه‌ر هه‌رتشته‌کی را بگرن و یه‌کرێزیا خوه ئاڤا بکن.
د ڕه‌وشا ئیرۆ هه‌یی دا ئاسته‌نگا هه‌ری مه‌زن د ڕێیا یه‌کرێزیێ دا سیاسه‌تا پەکەکێ یه. پەكەكە ناخوازه خوه ژ ڕۆژاڤایێ كوردستانێ
دا بکشینه و پراڤاکاسیۆنا دکه کو یه‌کرێزیا کوردا پێکنه‌یێ. ئامه‌ریکا، فرانسا و ده‌ستهلتا باشوورێ کوردستانێ هه‌ولدده کو، هەسەدێ ژ بن باندۆرا پەکەکێ خلاس بکن ژ بۆ کو کورد بگەهن مافێن خوه یێن ڕه‌وا. لێ پەكەكە ژ بۆ ئه‌ڤ یه‌ک پێکنه‌یێ ل به‌ر خوه دده.
به‌رپرسه‌کی پەکەکێ ڕاگەهاند، ئه‌گه‌ر ئیداره‌یا “باکور و ڕۆژهلاتێ سووریه‌یێ” د ده‌ستێ هێزێن سووریه‌یا ده‌مۆکراتیک (هەسەد) دا بمینه ئه‌و دێ شه‌رڤانێن خوه ڤه‌کشینن.
به‌رپرسه‌کی پارتیا کارکه‌رێن کوردستانێ (پەكەكە) ژ ئاژانسا رویتەرێ را گۆت:
“ئینیسیاتیڤه‌ک کو برێڤه‌برنا باکور و ڕۆژهلاتێ سووریه‌یێ بخه ده‌ستێ هەسەدێ یان ژی ئه‌گه‌ر سه‌رۆکاتیا هه‌ڤبه‌ش هه‌به، دێ ئه‌ڤ ببه سه‌ده‌م کو ئه‌م هێزێن خوه ژ هه‌رێمێ ڤه‌کشینن.”
به‌رپرسێ کو ل قه‌ندیلێ یه، دا زانین ئه‌گه‌ر هێزێن وان ژ سووریه‌یێ ڤه‌کشن ئه‌و دێ ژ دوور ڤه چاڤدێریا ڕه‌وشێ بکن و ئه‌گه‌ر پێویست بکه، ئه‌و دێ ل دژی هێزێن ترکیه‌یێ هه‌لوه‌ستێ نیشان بدن.
پەكەكە باش دزانه کو، ده‌ما یه‌کرێزیه‌ک چێببه دێ کوردێن ڕۆژاڤایێ کوردستانێ بریارا ده‌ستهلاتا خوه بدن. هه‌روه‌ها ئه‌و یه‌کرێزی دێ ژ بۆ ده‌ستخستنا مافێن خوه یێن ڕه‌وا ل گه‌ل شامێ پێوه‌ندیان پێکبینن و د سورییا نوو دا به‌رژه‌وه‌ندیێن خوه بپارێزن.
ڤێجا چو بهایێن مه‌رجێن پەكەكە داتینه نینە و ئه‌و ب خوه ژی ڤێ یه‌کێ باش دزانن.
دێ د داویێ دا بڤێ نه‌ڤێ پەكەكە مه‌جبوور ببه ژ ڕۆژاڤا ده‌رکه‌ڤه. لێ ته‌نێ نها ل به‌ر خوه ددن کو ڤێ ده‌ستهلاتێ به‌رده‌وام بکن. ناخوازن ده‌ڤ ژ ڕانتا کو دخون به‌ردن.
پەكەكە شه‌رێ دژی ترکیێ د ڤێ پێڤاژۆیێ دا ژ خوه را دکه هێجه‌ت. ڕوودانێن ناڤبه‌را ده‌وله‌تا ترک و ئۆجەلان دا چێدبن ڕۆژه‌ڤا سیاسی ل ترکیێ دگوهه‌رە. ئۆجەلان دگه‌ل ده‌وله‌تێ د ناڤا هه‌ماهه‌نگیه‌کێ دا لهه‌ڤهاتنه‌کێ یان ل ده‌ستژێبه‌ردانا چه‌کان دگه‌ره. ئه‌و هه‌ول ددن کو پەكەكە دەست ژ چه‌کان به‌رده و هه‌تا پەكەكە خوه هلوەشینە. د پێڤاژۆیه‌ک ب ڤی ڕه‌نگی دا داخوویانیێن به‌رپرسێن پەکەکێ بێ واته دمینن.
پشتی هه‌ڤدیتنا سه‌رۆک بارزانی و فه‌رماندارێ هەسەدێ، ڕه‌وش دکه‌ڤه قۆناخه‌ک دن دا. ئه‌گه‌ر فه‌رماندارێ هەسەدێ ئینسییاتیفێ وه‌ربگره و ژ بۆ یه‌کرێزیێ گاڤێ باڤێژه، دێ هنگێ بکاربه خزمه‌تا هه‌ری مه‌زن ژ بۆ ڕۆژاڤایێ کوردستانێ بکه.
یه‌کرێزیا کوردا ل ڕۆژاڤایێ کوردستانێ گه‌له‌ک تشتێن باش ده‌ستڤه تینه. ژ به‌ری هه‌رتشته‌کی دێ ل شامێ یه‌کده‌نگبن و ئه‌ڤ به‌پتر ده‌ستکه‌فتیان ژ بۆ کوردا ده‌ستڤه تینه. ژ ئالیه‌ک دن ته‌هدیتێن ترکیێ داوی تێن و ئه‌و سه‌ده‌مێن ترکیه ددێ پێش و ئێریشێ ڕۆژاڤا دکه ژ هۆلێ ڕادبن. وه‌ک دن پێوه‌ندیێن ناڤبه‌را باشوور و ڕۆژاڤایێ کوردستانێ گه‌له‌ک باش دبه و ڕه‌نگێ ژیانا کوردان ل ڕۆژاڤا تێ گوهه‌رتن و ژیانا وان گه‌له‌ک باشتر و خوه‌شتر دبه. هه‌تا پێوه‌ندیێن باشوور، رۆژاڤا و باکور خوه‌شتر دبن.
هێڤی ئه‌وە کو هه‌ڤدیتنا سه‌رۆک بارزانی و مه‌زلوم ئه‌بدی ببه ده‌ستپێکه‌کا باوه‌ریه‌ک مه‌زن ژ بۆ ئاڤاکرنا یه‌کرێزیا کوردان ل ڕۆژاڤایێ کوردستانێ.
۱۷.۰۱.۲۰۲٥
نێرین/شرۆڤه
