ل ھەمبەر ئێریشێن پەكەكێ خوەدی ھەلوەست بن
ل ده‌ڤه‌را قه‌زا ئامه‌دیێ ل چیایێ مه‌تینا، پێشمەرگە یێن كوردستانێ كەتنە كەمینا چەكدارێن پەكەكێ و د ئەنجامدا پێنج پێشمەرگە شەھید بوون و ھەفت ژی برینداربوون كو برینا ھندەك ژ وان گرانە.
ئه‌ڤە نه جارا ئێكێ یە کو، چه‌کدارێن پەکەکێ ب زانه‌بوون و ب ئاوایەكی پێشوەخت پلانكری ئێریشێ سەر پێشمه‌رگه‌یان دکن. لێ هه‌ر جارێ ب هنده‌ک داخوویانیان بوویه‌را ئێریشکاریا پەکەکێ ل دژی پێشمه‌رگه‌یان هاتیه ده‌رباس کرن.
پێشمه‌رگه زارۆکێن ڤی وه‌لاتینه و ئه‌و خاکا ئازاد یا کوردستانێ دپارێزن. لێ پەکەکە ب زانه‌بوون ئارتێشا ترکیێ رادکێشه هه‌رێما کوردستانێ و شه‌رێ خوه ل سه‌ر خاکا کوردستانا یا ئازاد دکه. ئارمانجا پەکەکێ ته‌نێ تێکدانا ڕه‌وشا هه‌رێما کوردستانێ یه و تێکبرنا ده‌ستکه‌فتیێن کوردان ل باشوورێ کوردستانێ یه. که‌سه‌ک یان ژی ئالیه‌ک نکاره به‌روڤاژیا ڤێ یه‌کێ بێژه.
خوینا پیرۆزا پێشمه‌رگه ب ده‌ستێ قرێژ یێ چه‌کدارێن پەکەکێ تێ ڕژاندن و ئه‌ڤ یه‌ک ڕاستیه‌که. هنده‌ک هێز و ئالیێن سیاسی ل باشوورێ کوردستانێ ب ئاوایه‌کی شریکێ ڤان ئێریشێن پککێ نه . ئه‌و ئالی ب هه‌لوه‌ست و تێكەلیێن د گه‌ل پەکەکێ دبن شریکێ ڕژاندنا خوینا پێشمه‌رگه یێن کوردستانێ.
د گه‌له‌ک داخویانیان دا تێ گۆتن کو، بلا پەکەکە خوه ژ خاکا کوردستانێ دوور بێخه و شه‌رێ خوه ل قادا خوه بکه كو قادا خەباتا وێ یا راتەقیەن تركیێ و باكورێ كوردستانێ یە. بلا پەکەکە و ئارتێشا ترکیێ خوه ژ باشوور دوور بێخن.
مخابن، چو باندۆرا ڤان داخویانیا نینە و ڤان داخویانیان باندۆرا خوە نەمایە، پێدڤیە ئه‌و ده‌زگه‌ھ یان ژی ئالیێن به‌حسا شه‌رێ پەکەکێ و ترکیێ ل سه‌ر خاکا باشوورێ کوردستانێ دکن گه‌له‌ک ب زه‌لالی ڤێ ڕه‌وشێ بەر چاڤ بكن و ڤه‌کری به‌حسا رۆلا پەکەکێ د ئالۆزكرنا رەوشێ دا بکن. بلا هه‌رکه‌س بزانه كو زه‌ره‌را پەکەکە دده هه‌رێما کوردستانێ چو که‌سه‌ک دن نادەتێ. هێشا ڤه‌کریتر، پەکەکە گەفا هه‌ری مه‌زنه ل سه‌ر سه‌روه‌ریا کوردستانێ. هه‌تا کو ئالیێن سیاسی و حوکومی ل باشوورێ کوردستانێ ڤێ ڕاستیێ نه‌بینن و ل گۆرا وێ ژی ته‌ڤ نه‌گه‌رن، دێ هه‌ر ده‌می دگەل ڤێ تراژه‌دیا کو پەکەکە پێکتینه بژین.
نها ل سه‌ر ڤان گۆتنا هنده‌ک ئالیێن هه‌ڤالبه‌ندێن ئا‌شکه‌ره و ڤه‌شارتی یێن پەکەکێ دکارن بێژن کو، دێ شه‌رێ براکوژیێ چێبه و گه‌ره‌ک مرۆڤ د ڤی واری دا هشیاربه. پەکەکە ب زمانه‌ک ڤه‌کری و ئا‌شکه‌ره دبێژه کو شه‌رێ ل دژی پەدەکێ نه شه‌رێ براکوژییێ یە. هه‌ر هێزه‌ک کو ببه گەف ل سه‌ر سه‌روه‌ریا هه‌رێما کوردستانێ ، ئه‌و نه برانه و هه‌لوه‌ستا کو ل هەمبه‌ر وان پاراستنا سه‌روه‌ریا کوردستانێ ئه‌رکه‌ک نه‌ته‌وەیی یه و پێوسته. ڤجا کی چ ناڤی ل ڤێ دکه که‌یفا خوه یه.
پارتیێن باشوورێ کوردستانێ یێن ڤه‌کری شریکاتیا پەکەکێ دکن دڤێ بزانبن ئه‌ڤ ئێریش ل دژێ وان ب خوه یه ژی. داخویانیا پەرله‌مه‌نتۆیا کوردستانێ د ده‌ربارێ ئێریشا ته‌رۆریستی یا چه‌کدارین پەکەکێ دا،گه‌له‌ک یا ئالۆزه و چو واته‌یا وێ ژی نینە. تو دبێ ژی قه‌ی ب دارێ زۆرێ ئه‌و داخویانی ده‌رێخستنه. ژ به‌ر کو هندەک فراکسیۆنێن پەرله‌مه‌نتۆیێ ناخوازن پەکەکێ شه‌رمه‌زار بکن. داخویانییێ ب ڤی ئاوایی پتر جه‌ساره‌تێ دده پەکەکێ كو ل سەر ئێریچێ خوە ییێ ل سەر پێشمەرگەیێ كوردستانێ بەردەوام بە و ده‌رنه‌که‌تنا داخویانیێن ب ڤی ئاوایی ژ ده‌رکه‌تنا وان باشتره.
جاردن دبێژن گەفا ل سه‌ر سه‌روه‌ریا هه‌رێما کوردستانێ پەکەکە ب خوه یه و ئه‌و ده‌ستێ داگیرکه‌رایە ل باشووری کوردستانێ…..
2021.06.06
