مه‌سرور بارزانی، جیگرێ سه‌رۆکێ پارتییا ده‌مۆکراتا کوردستانێ (پدک)، ڕۆژا پێنجشه‌مێ ١٦\١٠\٢٠٢٥ ل هه‌وله‌رێ بەشداری مەراسما بانگەشەیا پەدەکێ کر و پەیڤەک پێشکەشی ئامادەبوویان کر..
مه‌سرور بارزانی د پەیڤا خوە دا بەحسا گرنگیا ڤێ هلبژارتنێ، هلبژارتنێن پارلەمەنتۆتۆیا ئیراقێ کر و گۆت:
– ل کوردستانێ کەس رکابەرێ پەدەکێ نینە، تشتێ کو نها مایه شه‌رێ پەدەکێ ل به‌غدایێ یه، ژ به‌ر ڤێ یه‌کێ دڤێ ئه‌م بچن به‌غدایێ و ژ بۆ مافێن ده‌ستووری یێن گه‌لێ کوردستانێ شه‌ر بکن.
– دڤێ ئه‌م هه‌وله‌کا جدی بدن دا کو پەدەکە ببه ئامووره‌ک ژ بۆ گەهشتنا ئارمانجا سه‌ره‌که یا نه‌ته‌وه‌یا مه. سه‌رخستنا ڤێ لیسته‌یێ، سه‌رخستنا لیسته‌یا پەدەکێ ژ بۆ وێ یه‌کێ یه کو هه‌موو خه‌ونێن گه‌لێ مه ببن ڕاستی.
– ل کوردستانێ چو ڕکه‌به‌ره‌ک ژ پەدەکێ را نه‌مایه، یێن کو مانه نها ل به‌غدایێ هه‌ڤرکیێ لگه‌ل مە دکن. ژ به‌ر ڤێ یه‌کێ، پێویسته ئه‌م بچن به‌غدایێ و ل وێرێ شه‌رێ ل سه‌ر مافێن ده‌ستووری یێن گه‌لێ کوردستانێ بکن. به‌خدا بوویه جهه‌ک ژ بۆ هه‌موو وان ئالیێن کو چاڤێ وان ب سه‌رکه‌فتنا کوردستانێ ڕانابه، یان ژی ژ بۆ وان که‌س و ئالیێن کو نه‌کارینه ل کوردستانێ هه‌ڤرکیا پەدەکێ بکن. وان به‌غدا هلبژارتیه دا کو ل ور دژمناتیا هه‌رێما کوردستانێ بکن و ڕێ ل به‌ر پرۆژه و سه‌رکه‌فتنێن کوردستانێ بگرن. ژ به‌ر ڤێ یه‌کێ دڤێ ئه‌م بچن وێرێ.
– ده‌ما ئه‌م ڤان نوونه‌ران دشینن به‌غدایێ، نه ته‌نێ ژ بۆ کو به‌ره‌ڤانیێ ل مافێن گه‌لێ کوردستانێ بکن، دڤێ ئه‌و به‌ره‌ڤانیێ ل مافێن هه‌ر تاکه‌که‌سه‌کی ڤی وه‌لاتی، ب هه‌موو پێکهاته و ئۆلان ڤه بکن. دڤێ به‌ره‌ڤانیێ ل ده‌مۆکراسیێ، ل ده‌ستوورێ و ل فه‌ده‌رالیزمێ بکن. دڤێ به‌ره‌ڤانیێ ل گه‌لێ سته‌ملێکری بکن.
– به‌رێ ژی گۆتن ئه‌م دێ وه “برووخینن”، ئه‌م دێ وه “ڕاوه‌ستینن”، مه گۆت “هوون نکارن” و وان ژی نه‌کاری مه ڕاوه‌ستینن. نها ژی دخوازن گومانان چێبکن کو گه‌لۆ ئه‌م دکارن ده‌ستکه‌فتیێن زێده‌تر ب ده‌ست بخن، کو ئه‌م دکارن هه‌ر بهۆسته‌که داگیرکری یا کوردستانێ ڤه‌گه‌رینن. لێ ئه‌م جاره‌که دن دبێژن: ئه‌م دکارن. ئه‌م دکارن سه‌رکه‌فتنێن زێده‌تر ب ده‌ست .
– ئه‌م فه‌رق و جوداهیێ ناخن ناڤبه‌را چو ده‌ڤه‌ره‌کا کوردستانێ. هه‌ر بهۆسته‌ک ژ ڤێ ئاخێ ژ بۆ پەدەکێ پیرۆزه و ئه‌م ئاماده‌نە خزمه‌تا هه‌ر بهۆسته‌کێ بکن.
– ئه‌رکا مه گرانه، هێژ گه‌له‌ک کار مایه. پرسگرێکا مه نه ته‌نێ مووچه یه؛ پرسگرێکا مه ئاخه، پرسگرێکا مه ناسنامه یه، پرسگرێکا مه دادپه‌روه‌ری و وه‌کهه‌ڤی یه. که‌رکووک، مه‌خموور، شنگال؛ هه‌ر بهۆسته‌ک ژ ڤێ ئاخێ ژ بۆ مه نه ته‌نێ به‌شه‌ک ژ جۆگرافیایێ نه، ئه‌و هه‌ست و ڕوحێ مه نه.
ژ بۆ کو کوردستان بکه‌ڤه قۆناخه‌که مسۆگه‌رتر، گه‌شتر و پێشکه‌تیتر، تکا دکم ده‌نگێ خوه بدن لیسته‌یا ۲۷٥ئان ئا پارتیا ده‌مۆکرات ئا کوردستانێ. هه‌ر سه‌رکه‌فتی بن، کوردستان هه‌ر ئاڤا به.
