میرێ کوردێن ئێزدی میر حازم ته‌حسین به‌گ گۆت،مە ب مسلمانێن کوردستانێ را دیرۆکه‌کا هه‌ڤپار هه‌یه، باڤ و باپیرێن مه ب هه‌ڤ را ژیانه.”
میرێ کوردێن ئێزدی میر حازم ته‌حسین به‌گ ژ تۆرا مه‌دیایی یا رووداوێ را ل سه‌ر روودانێن ڤێ داویێ ئاخڤی و گۆت: “ئه‌م سپاسیا هه‌ر که‌سی دکن کو د ئارامکرنا ره‌وشێ دا رۆلا وان هه‌بوو. ئه‌م ب تایبه‌تی ژی سپاسیا سه‌رۆکایه‌تیا هه‌رێما کوردستانێ، به‌رپرسێن حکومه‌تا هه‌رێما کوردستانێ و که‌سایه‌تێن جڤاکی و دینی دکن.”
“باڤ و باپیرێن مه ب هه‌ڤ ڕه ژیانه”
میر حازم ته‌حسین به‌گ ل سه‌ر پەیوه‌ندیێن کوردێن ئێزدی و مسلمانان ژی وها ئاخڤی: “ب مسلمانێن کوردستانێ را دیرۆکه‌که مه یا هه‌ڤپار هه‌یه. باڤ و باپیرێن مه ب هه‌ڤ را ژیانه و نابه کو ب ئاخافتنێن چو که‌سی ئه‌و پەیوه‌ندیێن دیرۆکی تێک بچن.”
“دڤێ یاسایه‌ک هه‌به”
میرێ کوردێن ئێزدی خوه‌ست کو ل پەلامه‌نتۆیا کوردستانێ یاسایه‌ک وه‌ره ده‌رخستن و بهه‌ڤره‌ژیانا ل کوردستانێ ب ڤێ یاسایێ وه‌ره پاراستن و گۆت” دڤێ یاسایه‌ک هه‌به و کی دبه بلا ببه ده‌ما یه‌کی حه‌قاره‌ته‌ک کر ل گۆری وێ یاسایێ بهێتە سزا دان.”
وەکە تێ زانین، چه‌ند رۆژ به‌رێ ڤیدیۆیه‌کا فه‌رماندارێ هێزێن شنگالێ قاسم شه‌شۆ به‌لاڤ بووبوو و هنده‌ک که‌سان ئانگاشت کربوو کو شه‌شۆ د ڤێ ڤیدیۆیێ دا حه‌قاره‌ت ل پێخه‌مبه‌رێ ئیسلامێ کریه.
پشتی به‌لاڤبوونا ڤان ئانگاشتان گه‌له‌ک ئیسلامیستێن فاناتیک قاسم شه‌شۆ و کوردێن ئێزدی کربوون هه‌ده‌ف.
میر هازم ته‌حسین به‌گ دیار کو ته‌ڤگه‌رێن شه‌خسی ب جڤاکێ را نه پێوه‌ندیدارن و گۆت: دڤێ ئه‌م هشیارتر بن
“ته‌ڤگه‌رێن شه‌خسی ل سه‌ر شۆپینه‌رێن دینه‌کی و خه‌لکێ هه‌ساب نابن.
دڤێ ئه‌م ل به‌رامبه‌ری وان که‌سان هشیارتر بن کو دخوازن پرسگرێکان چێبکن. ئه‌م ل سه‌ر خورتکرنا حه‌زکرنێ، روحێ براتیێ و ئاڤاکرنا پرا ئاشتیێ و خه‌باتا ب روحێ به‌رپرسیاریێ ب بریارن. دیسا ئه‌م ل سه‌ر ڤێ یه‌کێ رژدن کو ئه‌م ل هه‌مبه‌ری هه‌موو ته‌ڤگه‌ر و گۆتنێن رق و کینێ تێبکۆشن.”
“مه ده‌ستێ خوه درێژ کریه”
میرێ کوردێن ئێزدی میر حازم ته‌حسین به‌گ دیار کر کو ئه‌و دێ ل هه‌مبه‌ری گه‌فێن ل سه‌ر ئه‌وله‌هی و ئاشتیا جڤاکی تێکۆشینێ بکن و گۆت:
مه ده‌ستێ خوه درێژی وه هه‌موویان کریه دا کو ئه‌م ژ بۆ خێر، ئاشتی، خورتکرنا براتیێ و ئاشتیا جڤاکی بخه‌بتن
