سیاسی

مەترسی ل سەر باكورێ كوردستانێ ھەیە

هه‌ژمارا توشبویێن ب پەژیكا کۆرۆنایێ/ کۆڤید-19 ترکیێ ڕۆژانه‌ پێش دکه‌ڤه‌ و مه‌ترسیه‌کا مه‌زن ل ترکیێ ب گشتی و باکوورێ کوردستانێ ب تایبه‌تی درووست دکه‌ ژ به‌ر کو هه‌تا نها ژی ل باکورێ کوردستانێ ئامێرێن تێستکرنێ نینن.

رۆژا 2020.03.26 ل گۆر ئامارێن جیهانی هاتیه‌ به‌لاڤکرن 471.829 که‌س توشی كۆرۆنایێ بوونه‌ و 21.297 که‌سان ژیانا خوه‌ ژ ده‌ست دایه‌. ترکیێ ژی ڕۆژ ب ڕۆژ هه‌ژمار بلند دبه‌ 2.433 که‌س توشی وێ پەژیكێ بوونه‌ و 59 که‌سان ژی ژیانا خوه‌ ژ ده‌ست دایه‌.

هه‌ر چه‌نده‌ گوومانه‌کا مه‌زن ل سه‌ر هه‌ژمارا که‌سێن توشبویی و که‌سێن مری ێن کو ژ ئالیێ وه‌زاره‌تا ته‌ندروستیا ترکیێ ڤه‌ تێنه‌ ڕاگەهاندن هه‌یه‌. ژ به‌ر کو گه‌له‌ک پسپۆر ژی ددن زانین کو ئامارێن ترکیێ نه‌ زانستی نه‌ و هه‌تا نها ته‌مه‌نێ وان که‌سێن مری و ل کیژان باژاری توشی كۆرۆنایێ بوونه‌ نه‌هاتیه‌ ڕاگەهاندن، لێ دھێتە پێشبینیکرن کو هه‌ژمار گه‌له‌ک زێده‌تر به‌.

ژ بۆ چ ل باکورێ کوردستانێ مه‌ترسی هه‌یه‌؟

ژ به‌ر کو هه‌موو توشبویێن بیانیێن ل چینێ ئاسێ مابوون، ب ته‌نێ ب ڕێیا ئیرانێ و ژ وێرێ ژی ب رێیا باژارێ وان و سته‌نبۆلێ ڤه‌ ڤه‌گه‌ریان وه‌لاتێن خوه‌. ئه‌ڤ هه‌ژمارا توشبویێن ب ڤیروسێ كۆرۆنایێ د ڕۆژهەلاتێ کوردستانێ و باکورێ کوردستانێ ڕا ده‌رباسبوون و ئەڤ پەژیك توشی خه‌لکێ ده‌ڤه‌رێ ژی کرن. هه‌تا نها ل ڕۆژهەلاتێ کوردستانێ 1.718 توشبویێن كۆرۆنایێ هه‌نه‌ و 140 که‌سان ژی ژیانا خوه‌ ژ ده‌ست دایه‌.

ئه‌ڤ هه‌ژمارا زێده ل ڕۆژهەلاتا کوردستانێ زه‌نگا مه‌ترسیا ل سه‌ر باکورێ کوردستانێ نیشان دده‌. مخابن ل باکورێ کوردستانێ هه‌تا نها ئامێرێن تێستکرنا ڤیروسا کۆرۆنا/ کۆڤید-19 نینن و ده‌وله‌ت ته‌نێ دبێژه‌ ب ده‌هان که‌س توشی كۆرۆنایێ بوونه‌. هیچ گومان نینه‌ کو ده‌وله‌تا ترکیێ ئه‌و گرینگیا دده‌ باژارێن خوه‌، باژارێن تركنشین، وێ گرینگیێ ناده‌ باژارێن کوردان.

مخابن ل گه‌له‌ک باژارێن باکورێ کوردستانێ کۆمبوون و خوه‌پێشاندان و ده‌رکه‌تنا بازار به‌رده‌وام هه‌یه‌ و ئه‌ڤه‌ ژی نیشانا وێ یه‌کێ یه‌ کو، پشتی هه‌فتیه‌ک دن ل باکورێ کوردستانێ ڕه‌وش گه‌له‌ک مه‌ترسیدار ببه‌ و ده‌وله‌تا ترکیێ ژی ناچه‌ هاوارا وێ هه‌ژمارا زێده‌یا توشبویێن کۆرۆنایێ.

پێویسته‌ باکورێ کوردستانێ ژی وه‌کی هه‌ر سێ به‌شێن دن یێن کوردستانێ پابه‌ند و گرێدایی ڕێنماییێن دۆکتۆرێن کورد ببن و خوه‌ بپارێزن و ژ مالێن خوه‌ ده‌رنه‌که‌ڤن.

Back to top button