ھەلبەستڤانێ كورد، مەحفوظ مایی، د مالپەرا خوە یا فێسبوكێ دا، ب نڤیسەكا كورت ل ژێر ناڤێ (تیڕۆژکێت ڕۆژێ ب مۆخلێ ناهێن گررتن) بەرسڤا وان كەسان ددە یێن كو ھەبوونا چەكدارێن پەكەكێ ل باشوور دپارێزن و ب تشتەك راست دزانن.
پارتیا كاركەرێن كوردستانێ (پەكەكە) گەلەك رەوشا باشوورێ كوردستانێ ئالۆز كریە. ژبەر ھەبوونا چەكدارێن وێ پارتیێ ل ناڤ گوند و ئاڤاھیان، ھەما بێژە رۆژانە، گوندێن سەرتخووب، ژ ئالیێ بالەفر و تۆپێن لەشكەرێ تركیێ ڤە دھێن بۆمبەباران و تۆپباران كرن و د ئەنجامدا خەلكێ بێ گونەھێ وان گوندان دبن قوربانێ شەرێ ناڤبەرا تركیێ و پەكەكێ دا.
د ڤان رۆژان دا چەند گوندێن دەڤەرا بەرواری بالا سەر ب پارێزگەھا دوھۆكێ ڤە وەكی: مایێ، بێدوهێ، ئورە، دێریشکێ و چەند گوندێن دن بوونە ئارمانجا تۆپ و بالەفرێن تركیێ. ئەو گوند ئاڤادانن و خەلكێ وان گوندان كارێ خوە یێ رۆژانە د ناڤ زەڤی ئاقارێ خوە دا دكە.
ل سەر تۆپبارانا وان گوندان مناقەشە چێ بوو و ھندەوك پەكەكلی یێن شەرمنوك كو ب ھەر ئاوایی ھەبوونا چەكدارێن پەكەكێ ل باشوور د ناڤ گوند و ئاڤاھیاندا، دپارێزن. ل سەر ڤێ پرسێ، ھەلبەستڤانێ كورد، مەحفوظ مایی، د مالپەرا خوە یا فێسبوكێ دا، ب ڤێ نڤیسا كورت دیتنا خوە دیار دكە و بەرسڤا وان كەسان ددە یێن كو ھەبوونا چەكدارێن پەكەكێ لئ باشوور دپارێزن:
تیڕۆژکێت ڕۆژێ ب مۆخلێ ناهێن گررتن
خەلکێ وان گوندێت دهێنە توپبارانکرن؛ مایێ، بێدوهێ، ئورە، دێریشکێ و هەمی ئەو گوندیت سەر
تخویبی.. باب و باپیر و ئەم هەمی یێ ل وان گوندان مەزن بووین.. ژیانا مە دناڤ وان
چیادا بوو.. سالانە بابێت مە دناڤ وان چیادا ل نێچیرا پەزکوڤیا دگەڕان، بشەڤ ژی ل
وان دول و چیا دمان. ئەم خەلکێت وان گوندا، هەمی بهارا لسەرێ وان چیا ل گیایێت
بوهارێ و ڕێڤاسا دگەڕیاین.. ژن و مێر حەتا ژ زاخۆ ژی دهاتن بۆ چنینا گیایێ بوهارێ.
گەلەک جاڕا ژی ل سنووری دەرباز دبوون..
بلا یەک کەس بۆ من نموونەکێ بینیت کو جارەکێ ژی لسەر وان سنوورا
جەندرمەکی تەقە ل کەسەکی کربیت..!
د دەستپێکا شۆڕشا گولانێ دا، سەردەمێ (قیادەیا موەقەت) ژی ئەو
هەمی مەفرەزەیێت پێشمەرگەی دناڤ وان دول و چیا و سنوورا دا دهاتن و دچوون، بلا
کەسەک بێژیت کو ڕۆژەکێ جەندرمەکی تەقە ل ئێکی کربیت، ژبلی قەچاخچییا.
گەلۆ خێرە ئەڤرۆ هنداڤ گوندێت هەمی بوونە ڕەبیعەیێت لەشکەرێ
تورکی و ڕۆژانە تۆپبارانا گوندێت مە دهێتەکرن..؟
هەرکەسەکێ خوە ل بەرسڤا ڤێ ڕاستیێ لال و کورە بکەت دیارە وی ئەو
هەمی چەکدارێت پەکەکێ نەدیتنە کو ڕۆژانە دناڤ دەحل و کولانێت وان گوندادا دگەڕن. و
دیارە گوهنەدایە سەرکردێت پەکەکێ کو دگووت ئەم دێ سوپایێ تورکیێ ڕاکێشینە باشوور..
یان ئەوێت دگووتن.. کارێ مە پاراستنا سنوورێت وان وەلاتایە و خەتەرا مەزن ل بەر
ئارمانجا مە پێشمەرگە و حکومەتا باشوور ە.
