ل هەولێرا پایتەختا هەرێما کوردستانێ سەرۆک مەسعود بارزانی و فەرماندارێ گشتی یێ هەسەدێ مەزلووم عەبدی جڤیان و پەیاما یەکیتیا کوردان دان.
مەدیایا کوردستانی و جیهانی ئەڤ جڤین ب جڤینەک دیرۆکی و دلخوەشکەر ب ناڤ کر و خەلکێ رۆژاڤایێ کوردستانێ دەرکەتن کۆلانان و کێفخوەشیا خوە نیشان دا.
د مەدیایا جڤاکی دا ژی هەما بێژە هەر کوردەکێ وەلاتپارێز و یێ\یا دلێ وی\وێ ژ بۆ مافێن رەوایێن کوردان و یەکرێزی و یەکهەلوەستیا کوردان دشەوتە ئەڤ جڤین ب ئەرێنی و پێنگاڤەک بە رب ئارستەیەکی راست و درواست وەسف کر.
نەیار ونەحەزێن کوردان ب ڤێ جڤینێ دلخوەش نەبوون و نەرازیبوونا خوە ل هەمبەر ڤێ جڤینێ نیشان دا.
لێ یا هەری بالکێش هەلوەستا مەدیایا پەکەکێ بوو ل هەمبەر جڤینا سەرۆک بارزانی و مەزلووم عەبدی کو پەکەکێ د هەموو سازی، ئاژانسێن نووچەیان و کانالێن خوە یێن مەدیایا خوە دا قیمەت و گرنگی ب ڤێ جڤینێ نەدا.
ل گۆر مالپەرا دارکامازی، ئاژانسا رۆژنیوس یا پەکەکێ کو ل سلێمانیێ وەشانێ دکە،
وەکە مانشێت نڤیساند کو مەزلووم عەبدی ل هەولێرێ یە و د ناڤەرۆکا نووچەیا خوە دا ژی گۆت، “عەبدی هاتیە کو دگەل هندەک ئالیێن کوردان هەڤدیتنان چێکە” و ناڤێ سەرۆک بارزانی د نووچەیا خوە دا دەرباس نەکر، هەمان دەمێ د نووچەیا خوە دا گۆت پەدەکێ رێکەفتن دگەل ترکان هەیە و ئێریشێن ترکا شەرمەزار ناکە. ب ڤی شێوەی خوەست کو قیمەتا هەڤدینێ بچووک نیشان بدن و هێڤیێن کوردان ژ بۆی یەکیتیێ ژی تێکببن.
وەشانا پەکەکێ یا ب ناڤێ ئانەفێ کو وەکە وەشانەکە ناڤەندییە ئەڤ هەڤدیتن د بەشا خوە یا ترکی دا ب تەنێ ب چار رستەیان باس کر، هەمان ئاژانسێ د بەشا خوە یا ئینگلیزی دا گۆت، “مەزلووم عەبدی دێ دگەل گەلەک ئالیێن کوردی ل هەولێرێ هەڤدیتنا پێک بینە” وان خوەست ب ڤی ئاوا ڤەشێرن کو مەزلوومم عەبدی ب تەنێ ژ بۆی هەڤدینا دگەل سەرۆک بارزانی هاتیە هەولێرێ. ئانەفێ ژی وەکە رۆژنیوس خوەست ڤێ هەڤدیتنێ وەکە هەڤدیتنەکە سادە بدە نیشاندان.
پشتی هەڤدیتنێ ب چەند دەمژمێران دیمەنێن ڤێ هەڤدینێ هاتن وەشاندن، ب هەزاران کەسان ل سەر سۆسیال مەدیایێ ڤیدیۆ و وێنەیێن هەڤدیتنێ پارڤە کرن و گۆتن، دیمەنێن هێڤیا کوردان، لێ بەلێ مەدیایا پەکەکێ ئەڤ دیمەن ژی پارڤە نەکرن.
رۆژنامەیا پەکەکێ کو ل ئەورۆپایێ وەشانێ دکە، یەنی ئۆزگۆر پۆلۆتیکا، یەک نووچە ژی ل سەر ڤێ هەڤدیتنێ چێنەکر، رۆژنامەیا پەکەکێ، یەنی یاشام، کو ل ترکیێ وەشانێ دکە یەک نووچە ل سەر هەڤدیتنێ پارڤە کر و تێ دە گۆت، “فەرماندارێ هەسەدێ مەزلووم عەبدی کو پڕ جاران بانگەوازیا یەکیتیێ دکە، هات هەولێرێ و دگەل ئالیێن کوردان هەڤدیتن چێکر.”
