سیاسی

مەسرور بارزانی: عەرەبكرنێ راوەستینن

مەسرور بارزانی سەرۆكوەزیرێ كوردستانێ د پەیامەكێ دا داخواز ژ حكوومەتا عیراقێ كر كو عەرەبكرنا دەڤەرێن كوردستانێ یێن دەرڤەیی ئیدارەیا ھەرێما كوردستانێ و ب تیابەتی ل پارێزگەھا كەركووكێ  راوەستیە.

پەیما سەرۆكوەزیر ل ژێرە:

ئه‌م گەلەك ب دلگرانی و نەرەحەتی  ڤه‌ چاڤدێریا ڕه‌وشا ده‌ڤه‌رێن کوردستانی یێن ل ده‌رڤه‌یی ئیداره‌یا هه‌رێما کوردستانێ دکن، ب تایبه‌تی ل تخووبێ پارێزگه‌ها که‌رکووکێ، کو مخابن سیاسه‌تا عه‌ره‌بکرن و گوهه‌رتنا ده‌مۆگرافیێ ب ئاوایه‌کی کو ژێ ڕا به‌رنامه‌ هاتیه‌ دارشتن، ل وان ده‌ڤه‌ران به‌رده‌وامه‌، كو ئەو ژی  دوباره‌کرنا هه‌مان سیاسه‌تا عه‌ره‌بکرنێ یا ڕه‌ژیمێن به‌رێ یێن عیراقێ یه‌   ل دژی خه‌لکێ وان ده‌ڤه‌رانه‌. تشتێ کو پتر جهێ دلگرانیێ یه‌ و مه‌ ئه‌جێبمایی دهێله‌ ئه‌وه‌ کو ئه‌ڤ کریار د عیراقه‌کا‌ ده‌مۆکرات دا دھێنە ئه‌نجامدان، کو ل گۆر ده‌ستوورێ نه‌خشه‌رێ و چەوانیا ئاساییکرنا ڕه‌وشا ده‌ڤه‌رێن جهێ ناکۆکیێ و ئاساییکرنا چاره‌نووسا وان هاتیه‌ دیارکرن.

 ته‌ڤی کو ئەم  ب دژواری سیاسه‌تا عه‌ره‌بکرنا ده‌ڤه‌رێن کێشه‌ ل سه‌ر و ب تایبه‌تی ل که‌رکووکێ، شه‌رمه‌زار دکن، ئه‌م جارەك دن ئا‌شکه‌ره‌ دکن کو حکوومه‌تا هه‌رێما کوردستانێ چ جار سیاسه‌تێن ب ڤی ڕه‌نگی قه‌بوول ناکه‌، ب تایبه‌تی ڤه‌گه‌راندن و بجھکرنا که‌سێن کو نه‌ ژ نشته‌جیێن ڕه‌سه‌ن ئێن وان ده‌ڤه‌رانن.

 ژ بلی ڤێ ژی   گوند و ده‌ڤه‌رێن کوردستانی  دھێنە داگیر كرن و وه‌لاتیێن کورد و ترکمه‌ن  كو ل سه‌ر ئاخا خوه‌نە دھێنە دەرخستن و  زه‌ڤیێن چاندنیێ دھێنە داگیر كرن و جارەك دن ددەنە وان عەرەبان یێن كو بەری 35 سالان ب ئالیكاریا رەژێمێن بەرێ ئەو زەڤی داگیر كربوون.

ژ بۆ چاره‌سه‌رکرنا ڤان مژاران، شانده‌کا‌ حکوومه‌تا هه‌رێما کوردستانێ هاتیە راسپارتن کو سه‌ردانا به‌غدایێ بکه‌.

ئه‌م ژ حکوومه‌تا فه‌ده‌رالی داخواز دکن کو ل گۆر وان ده‌ستهلاتێن ده‌ستوورێ  ژێ ڕ‌ا  دانە ڕێکارێن پێویست بگرە بەر  و  ڕێگریێ ل هنده‌ک ئیداره‌یێن خوه‌جهی بکه‌ کو سیاسه‌تێن خوه‌ یێن ب ڤێ ئاوایی ڕاوه‌ستینن. حكوومەتا فەدەرال هه‌روسا دڤێ بریارا دوورخستنا هێزێن سه‌ربازی بده‌ ژ به‌ر ئه‌نجامێن ڤێ سیاسه‌تێ و بکارانینا وان د ڤێ پێڤاژۆیێ دا‌.

ئەم جارەكا دن تەئكیدێ ل سەر داخوازێن خوە دكن  ژ بۆ ئاساییکرنا ڕه‌وشا وان ده‌ڤه‌ران و جیبجیکرنا ماده‌یا 140  ئا ده‌ستوورێ. هه‌روها ئه‌م ژ نوونه‌رێ تایبه‌ت ێێ نه‌ته‌وه‌یێن یه‌کبوویی یێ ل عیراقێ داخواز دکن کو بله‌ز هه‌ول بده‌   ڤان بنپێکرنێن ترسناک کو ده‌رحه‌قێ خه‌لکێ ڕه‌سه‌نێ وان ده‌ڤه‌ران دا‌ ژ ئالیێ ئیداره‌یێن خوه‌جهی ڤه‌ تێنه‌ کرن، ڕێگری بکه‌.

سه‌پاندنا سیاسه‌ت و ڕه‌فتارێن ب ڤێ ئاوایی  گه‌فێ ل ئاشتیا جڤاکی یا وان ده‌ڤه‌ران كە‌ کو به‌ره‌ڤاژی داخوازا مه‌ یێن  ژ بۆ پێکڤه‌ژیانا ئاشتیانه‌ و برایانه‌ یا د ناڤبه‌را هه‌موو پێکهاته‌یان دا‌ یە.

مه‌سرور بارزانی

سه‌رۆکوه‌زیرێ هه‌رێما کوردستانێ

2020.09.22

Back to top button