سه‌رۆکوه‌زیرێ کوردستانێ مه‌سروور بارزانی، ڕۆژا شه‌میێ 14ێ ئادارا 2020 ل سه‌ر بریارێن نوو یێن حکومه‌تا کوردستانێ یێن ده‌ربارێ ڤیروسا کۆرۆنایێ و باندۆرا وێ ل سەرهه‌رێما کوردستانێ گۆتاره‌کا تەلەڤزیۆنی پێشکه‌ش کر.
.بارزانی، د ده‌ستپێکا گۆتارا خوه دا، سپاسیا هه‌ڤوه‌لاتیێن هه‌رێما کوردستانێ کر کو ب رێنماییێن ڕێلبه‌رگرتنا ڤیروسا کۆرۆنایێ پابه‌ندن
سەرۆكوەزیر ده‌ستخوه‌شی ل وه‌زاره‌ت و ئالیێن په‌یوه‌ندیدار كر كو هه‌ولدانا پاراستنا هه‌ڤوه‌لاتیان دکن و ژ ئالیه‌کێ دن ڤه هه‌ولا دابینکرنا پێویستیێن ڕۆژانه بۆ خه‌لکی دکن و به‌رده‌وامی چاڤدێریا بازارێ ژی دکن. بارزانی، تایبه‌تی، سپاسیا وەزارەتا ناڤخوه، هێزێن پۆلیس و ئاسایشێ و وه‌زاره‌تا ته‌ندروستیێ كر کو ب ئاوایەكی بەردەوام، ب شه‌ڤ و ڕۆژ، خزمه‌تا هه‌ڤوه‌لاتیان دکن. سپاسیا بزیشکان كر کو ژیانا خوه ژ بۆ سه‌لامه‌تیا خەلكێ كوردستانێ ئێخستیە د بن مه‌ترسیێ دا و کار دکن.
ل گۆر سەرۆكوەز، هه‌رێما کوردستانێ به‌ری گه‌له‌ک وه‌لاتان ده‌ست ب به‌رگریێن ل دژی کۆرۆنایێ کرو ژ بۆ سنۆرداکرنا به‌لاڤبوونا ڤیروسا کۆرۆنایێ ژی بودچه‌یەكا تیابەت بەردەست كریە و پێنگاڤێن پێویست ئاڤێتنە وەكە: ڕاگرتنا خوه‌ندنێ ل دبستان، زانینگه‌ھ و په‌یمانگه‌هان، کێمکرنا ده‌وامێ، سنۆردارکرنا هات و چوونێ سەر سنۆران و نه‌هشتنا کۆمبوونێن گشتی و ئه‌مجاندانا پشکنینا گه‌رمایا لەش ل بالافرخانه و ده‌ریێن سنۆری.
بارزانی دا زانین کو هه‌موو رێكارێن حكومەتێ ژ بۆ پاراستنا سه‌لامه‌تیا خه‌لکێ هه‌رێما کوردستانێ یه، ب تایبه‌تی قه‌ده‌خه‌کرنا چوونووهاتنێ ژ بۆ وێ یه‌كێ یە داكو کێمترین تێكەلی د ناڤبەرا خەلكی دا ھەبن و که‌سێن هلگرێن ڤیروسێ نە ، ژ بۆ که‌سێن دن تووشی وێ نه‌بن. حكومەت ل هه‌مبه‌ر ھەڤوەلاتیان به‌رپرسیارە، دڤێ ھەڤوەلاتی ژی ل هه‌مبه‌ر خوه، که‌سووکار، ناس و وه‌لاتیێن دن به‌رپرسیار بن. ئه‌گه‌ر هه‌موو حکومه‌ت و وه‌لاتیان ڤە ل سه‌رانسه‌ری هه‌رێما کوردستانێ هه‌ڤکاریا هه‌ڤ بکن و ڕێنمایان بجھ بکن، دکارن ڕێگریێ ل به‌لاڤبوونا وێ په‌تایێ بگرن.
سەرۆكوەزیرێ كوردستانێ ژمالباتا وی كەسێ ب ڤایروسا كۆرۆنایێ جانێ خوە ژ دەست دای سەرساخێ خوەست و هێڤیا باشبوونێ ژ نه‌خوه‌شان ڕا خوەست وبمخابنی ڤە گۆت كو تەئسیرا نه‌رێنی یا ڤێ ڕه‌وشێ د ڕۆژێن بھێن دا زێده‌تر دبن. لێ هه‌ر یه‌ک دکاره ڕۆله‌کا ب باندۆر د ڕێگرتنا به‌لاڤبوونا ڤێ ڤایروسێ دا هه‌به.
سەرۆكوەزیر داخواز ژ ھەڤوەلاتیان كر كو ب ڕێنمایێن وه‌زاره‌تا ته‌ندورستیێ پابه‌ند بن، به‌رده‌وام ده‌ستێن خوه بشۆن، چوون وهاتنێ و تێکه‌لبوونێ د ناڤبه‌را خوه دا سنۆردار بکن و هه‌تا دکارن ل مالێ ژی ده‌رنه‌که‌ڤن.
بارزانی د گۆتارا خوە دا بەحسا گەفێن ڤێ رەوشێ بو سەر ئابۆریا ھەرێما كوردستانێ كر و گۆت كوگه‌فێن ڤێ ڤایروسێ ل سه‌ر ژیانا خه‌لکێ و ل سه‌ر ڕه‌وشا ئابۆری گه‌له‌کی جدی و گرانه. لێ خەلكێ كوردستانێ به‌رێ گه‌فێن گه‌له‌ک مه‌ترسیدار دەرباس كرنە و ڤێ جارێ ژی ب هه‌ڤکاریا تەڤ ئالیان و ب به‌رچاڤگرتنا ڕێنمایێن ته‌ندورستیێ، دکارن ڤێ ڕه‌وشا دژوار ده‌رباس بکن.
مەسروور بارزانی سەرۆكوەزیرێ كوردستانێ د داویا گۆتارا خوە دا گۆت كو حكومەت ب ھەموو ئاوایان دێ بخەبتە كو سه‌لامه‌تیا وه‌لاتیێن هه‌رێما کوردستانێ بپارێزە و داخواز ژ هه‌موو ئالیێن سیاسی كر كو د ڤێ رەوشێ دا هه‌ڤکار و پشته‌ڤانێن بن.
