گه‌له‌ک جارا ل سه‌ر دیتن و ھزروبیرێن سیاسه‌سه‌تمه‌دار، ڕه‌وشه‌نبیر، نڤیسکار و که‌سایه‌تیێن ترک د ده‌ربارێ پرسا کورد دا گۆتوبێژ هاتنه کرن و دھێنە كەن، گەلەك جاران ئه‌ڤ پرس هاتیه ڕۆژه‌ڤێ و ب ئاوایەكێ پرئالی هاتیه گۆتوبێژ کرن. لێ مخابن ژ هه‌زارا یه‌ک ژ سیاسه‌تمه‌دارێن ترک نینە کو، مرۆڤ بکاره بێژه ئەو پرسا کورد تێدگه و ب ئاوایه‌ک ئۆبژه‌کتیف به‌هسا چاره‌سه‌ریا پرسا کورد دکە.
ل ترکیێ ب پرانی و ب زانه‌بووب پرسا کورد هه‌موویێ د که‌سایه‌تتا سیاسه‌تا پەكەكێ و ده‌ردۆرا پەكەكێ دا ددن ناساندن و ل گۆرا ڤێ یه‌کێ ژی کوردا دنرخینن و به‌هسا چاره‌سه‌ریه‌کی دکن یان ژی ب ته‌مامی هه‌موو مافێن کوردا ڕه‌د دکن و کوردا وه‌ک ته‌رۆریست د جڤاکا خوه دا ددن ناساندن. ل ترکیێ ئالیێن سیاسی دزانن کا چه‌وا ڤێ ڕه‌وشێ بێخن ڕۆژه‌ڤێ و سیاسه‌تا خوه یا د ده‌ربارێ پرسا کورد دا بئافرینن. ژ بۆ ڤێ یه‌کێ ژی پرانیا جاران پرسا کورد و ئاوایێ چاره‌سه‌ریا وێ ل به‌ر چاڤێ کوردا ب خوه ژی دکارن وندا بکن و به‌هسا به‌رژه‌وه‌ندیێن هه‌ڤبه‌ش بکن.
ل ترکیێ سیاسه‌تمه‌دار، ڕه‌وشه‌نبیر و نڤیسکار، ڕۆژنه‌مه‌ڤان و که‌سایه‌تی، خوه‌دیێ ئدیۆلۆژیێن جودا نه. پرانی د جڤاکێ دا به‌هسا پرسگرێکان دکن و به‌هسا ده‌مۆکراسیێ، مافێ مرۆڤا، وه‌کهه‌ڤیێ و ئه‌داله‌تێ دکن. لێ چو جارا پرسا کورد ناخن د ناڤ ڤان بابه‌تان دا. ژ به‌ر کو هه‌ڤبه‌شیه‌ک یا وان هه‌موو ئالیان هه‌یه و ئه‌و ژی ئه‌وه کو، د ده‌ربارێ کوردان دا ھوموو خوه‌دیێ دیتنه‌ک هه‌ڤبه‌شن. یانی چه‌پن، ڕاستن، ده‌مۆکراتن، پارێزه‌رێن مافێ مرۆڤانن، نژادپه‌ره‌ستن، ئۆلدارن هه‌ڤوودن ڕه‌خنه دکن ، ل دژێ هه‌ڤ دنڤیسینن، هه‌ڤ تاوانبار دکن، لێ ده‌ما پرسا کورد تێ ڕۆژه‌ڤێ هه‌موو دکارن ببن یه‌ک دەنگ و ل همبه‌ر داخوازیێن کوردا بسه‌کنن و کوردا ڕه‌د بکن.
مخابن پرانیا کوردا ل باکورێ كوردستانێ د چارچۆڤەیا پەكەكێ دا پرسا کورد دنرخینن و نێزکی ڕاستیا پرسا خوه یا نه‌ته‌وی نابن. وه‌ک میناک؛ ئه‌گه‌ر مرۆڤ د ده‌ربارێ چاره‌سه‌ریا پرسا کورد ل باکور دیتنا هه‌ڤسه‌رۆکه‌ک ئا ھەدەپێ، یان ژی سیاسه‌تمه‌داره‌ک چه‌پێ ترک و که‌سایه‌تیه‌ک کو ده‌مۆکرات تێ ناسکرن بپرسە، دێ ژ هه‌موویان یه‌ک به‌رسڤێ بگره. دێ به‌هسا ده‌مۆکراسیێ، وه‌کهه‌ڤییێ و مافێن مرۆڤا یێن گلۆبال بکن. دێ هه‌زار تشتا بێژن. لێ به‌هسا مافێ کوردا یێ نه‌ته‌وی ناکن، به‌هسا ده‌وله‌تبوونا کوردا ناکن، به‌هسا مافێ کوردا یێن ڕه‌وا ناکن. ژ خوه ئه‌ڤه کو زهنیه‌تا خه‌لکه‌کی هاتیه داگیرکرن و مه‌ژیێ وان ژنگارێ گرتیه و ڕێ ناده ڕاستیا جڤاکی و سیاسی ل باکورێ کوردستانێ ببینن.
ل ترکیێ پرانیا جارا هنده‌ک که‌سێن چه‌پ ده‌ما به‌هسا پرسا کورد دکن، دەسپێكێ پەكەكێ دنرخینن و پشترا ژی د ده‌ربارێ کوردان دا دیتنا خوه دبێژن. د ده‌ربارێ پرسا کورد دا، که‌سایه‌تیێن کو ده‌مۆکرات تێن ناڤکرن و یێن نژادپه‌ره‌ست و فاشیست تێن ناسکرن وه‌ک هه‌ڤ به‌هسا کوردا دکن. تایبه‌تی ده‌ما به‌هسا ده‌وله‌تبوونا کوردا تێ کرن هه‌موو ب یه‌ک زمانی و یه‌ک گۆتن ل دژ ده‌ردکه‌ڤن.
کورد ل هەمبه‌ر ڤێ یه‌کێ دڤێ ب ئیسرار و ب بریار به‌هسا مافێن خوه یێن نه‌ته‌وی بکن. به‌هسا ده‌وله‌تبوونا خوه بکن. براتیا گه‌لا ژ بۆ کوردا بوویه وه‌ک ژه‌هره‌کێ ئه‌و ژ داخوازیێن وان یێن نه‌ته‌وی دوور خستنه. ئه‌گه‌ر ئه‌م برانن چ مافێ ترکا هه‌یە بلا یێ کوردا ژی هه‌به. یان دێ ده‌وله‌ت ده‌وله‌تا هه‌ردو مله‌تان به و وه‌لێ بێته ناڤکرن یان ده‌وله‌تا وان هه‌به ، بلا یا کوردا ژی هه‌به و کورد و ترک وەكە دو دەولەت براتیا هه‌ڤ هه‌تا قیامه‌تێ بکن.
