مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن مالپەرا مە ددن کو، یەک ژ وان ژی برێز ئیحسان ئامێدی یە.
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
ئیحسان ئامێدی: شۆرەشا گولانێ ژ بو من هیڤی و باوەری و بەرخوەدان بوو، درێژیدان بوو ب خەباتا رزگارخوازا نەتەوەیی ل سەر رێبازا پارتی و بارزانی، رەدکرنا رێکەفتنا جەزائیرێ و کارەساتا شۆرەشا ئیلۆنێ بوو، خوەنووکرن و نووکرنەڤەبوو پێناڤی سەرفرازیا مللەتی.
٢- تو چ ژ وێ شۆرەشێ فێر بووی؟
ئیحسان ئامێدی: شۆرەشا گولان خاندنگەها بیروباوەرێن کوردایەتیا رەسن و زانینا سیاسەتێ و خەباتا چەکداری و روشەنبیریا شۆرەشگێری بوو، شۆرەشێ ئەم فێری خوەروشەنبیرکرنێ، سیاسەتێ، شەرێ چەکداری، فرەپارتایەتیێ، کارێ هەڤپشک و بەرەیی و سەرەدەریەکا گونجای دگەل مللەتی و هەڤالان و لایەنێن سیاسی کرین.
شۆرەشێ ئەز فێری پارتایەتیێ و شۆرەشگێریێ و سیاسەتێ و بەرپرسیاریێ و هەستکرن ب بەرپرسیاریی و رێزگرتنێ وخزمەتا گەل و وەلاتی و قوربانیدانێ و خوە ل بەرگرتنێ و سەبر و هەدارێ .
٣- تە چ دا شۆرەشێ و شۆرەشێ چ دا تە؟
ئیحسان ئامێدی: من سەر و مال و شیان و پێچێبونێن خوە دانە شۆرەشێ، ل بەراهیێ ئەز پرۆژێ شەهیدبوونێ بووم بو پارتی و شۆرەشێ و مللەتی، مە شەهید دان و مال و ملکەت ژ دەستدان، لێ مە رێزگرتن، سەرفرازی و ئازادی و هەرێما کوردستانێ بدەستڤەئینا.
