سیاسی

مە کراسەک شۆر بۆ ئەحمەد تورک کەردکر لێ

ل قوسه‌رێ، کوردستانا باکور، ئەحمه‌د تورک پشکداری د جڤینه‌کا رێخستنا گرێدایێ پەکەکێ دا کر. تورک د وێ جڤینێ دا ئاخاڤتنه‌ک کر. وی د ئاخاڤتنا خوه‌ دا به‌حسا پێوستیا یه‌کتیا کوردا کر و هه‌روه‌ها بەحسا ئێریشێن ترکیێ یێن سەر باشوورێ کوردستانێ و د ڤێ چارچۆڤەیێ دا به‌هسا پەدەکێ ژی کر و کینا د دلێ خوه‌ دا فه‌رشت. تورک ب ته‌مامی وەک پەکەکی یه‌ک به‌هسا پەدەکێ کر و وی ڤه‌کری گۆت کو، پەدەکە خیانه‌تێ دکه‌.

د به‌شه‌ک ئاخاڤتنا خوه‌ دا، ئەحمەد تورک، گۆت: “ئیرۆ ڕۆژا یه‌کێتیێ یه‌، ئه‌م ناخوازن وه‌کی به‌رێ خیانه‌ت بکه‌ڤه‌ ناڤا کوردان دا”. تورک به‌حسا هه‌لوه‌ستا پەدەکێ ژی کر و گۆت: “ئیرۆ ئه‌م ڤێ خیانه‌تێ دبینین. هه‌ر کی به‌ خیانه‌تێ ل گه‌لێ خوه‌ بکه‌، دێ رۆژه‌کێ حه‌سابێ وێ خیانەتێ بده‌. ژ بۆ ڤێ یه‌کێ ئه‌ز دبێژم کو، ل هەمبه‌ر یه‌کێتیا کوردان نه‌بن ئاسته‌نگ. ئه‌م باش دزانن گه‌لێ باشوور ل دژی ڤان ئێریشایه‌. ل دژی خیانه‌تا پەدەکێ نه‌ ژی. ژ بۆ ڤێ گه‌ره‌کە ئه‌م د هه‌موو قادان دا ل دژی ڤێ خیانه‌تێ ده‌رکه‌ڤن”.

ئه‌ڤە هەلوەست و دیتنا ئەحمه‌د تورک ه‌، مخابن گه‌له‌ک سیاسه‌تمه‌دار و که‌ساتیێن کورد کو، سیاسه‌تا پەکەکێ راست نابینن و رەخنە دکن، ئەحمەد تورک وه‌ک که‌ساتیه‌ک ئه‌رێنی دنرخینن. هه‌ر ژ بەر ڤێ یه‌کێ ژی گه‌له‌ک که‌س رێزێ ل ئەحمەد تورک دگرن و به‌حسا وی وه‌ک که‌ساتیه‌ک کورد و نشتمانپه‌روه‌ر دکن.

لێ مخابن، پەکەکە ب ڤان فێلبازیێن خوە دکاره‌ خه‌لکه‌کی بخاپینه‌. هه‌ر که‌سێ ته‌ڤلی پەکەکێ ببه‌ مه‌جبووره‌ ئیرادا خوه‌ راده‌ستی پەکەکێ و ئۆجەلان بکه‌ و سیاسه‌تێ ژی د چارچۆڤەیا به‌رژه‌وه‌ندیێن پەکەکێ دا بکه‌. یێن وه‌ک ئەحمەد تورک گه‌له‌ک جارا دکارن که‌ساتیا خوه‌ یا راست ڤه‌شێرن و وه‌ک که‌ساتیەک ئه‌رێنی خوه‌ بدن ناساندن دا کو بکاربن هندەک جاران کێماسیێن پەکەکێ ڤه‌شێرن و ب ڤێ فێلبازی و ته‌کتیکێ خه‌لکه‌کی بخاپینن.

ئەحمەد تورک گه‌له‌ک جاران ب ئه‌رێنی به‌حسا پەدەکێ کریه‌ و سیاسه‌تا پەدەکێ ژ بۆ کوردستانێ و ژ بۆ گه‌لێ کورد وه‌ک سیاسه‌ته‌ک سه‌رکه‌فتی نرخاندیه‌. لێ ئیرۆ بێی کو شه‌رمێ ژ خوه‌ بکه‌ پەدەکێ ب خیانه‌تێ ئتیهام دکه‌. تورک د هەلوەست و سیاسه‌تا خوه‌ دا نه‌ که‌ساتیەک خوه‌دی باوه‌ریه‌ک سه‌ربخوه‌یه‌ و ئه‌و ژی وه‌ک هه‌ر که‌سه‌ک دن د ناڤا پەکەکێ دا، ئێخسیر و دیلێ سیاسه‌تا پەکەکێ یه‌.
پەدەکێ پتر ژ هەر ئالیەک دن گه‌له‌ک قه‌درێ تورک گرتیە و ئه‌و وه‌ک که‌ساتیه‌ک ئه‌رێنی دنرخاند و راستی ژی هه‌ر ده‌مێ وی سەردانا باشوورێ کوردستانێ کریە گەکەک ب گەرمی ژ ئالیێ پەرپرسێن حکومەتێ و ب تایبەتی بەرپرسێن پەدەکێ ڤە ب گەرمی هاتیە پێشوازی کرن. . لێ ئیرۆ تورک بێ کو شه‌رمێ ژ خوه‌ بکه‌، وه‌ک جاهله‌کێ پەکەکێ رادبه‌ پەەدکێ ب خیانەتێ تاوانبار دکه‌.

بێ گومان گه‌له‌ک تشت هه‌نه‌ کو، مرۆڤ به‌حسا که‌ساتیا ئەحمەد تورک و رۆلێ وی یێ خراب بکه‌. لێ ئه‌ڤ نڤیس نه‌ جهێ وێیه‌ و ژ خوه‌ ژی هه‌وجه‌ ناکه‌ مرۆڤ به‌حسا ڤان که‌سێن کو ب ئاوایه‌ک دوورووتی سیاسه‌ته‌ دکن بکه‌. لێ پێدڤیە راستیا تورک ژی بێ دیتن و زانین و ل گۆرا وێ ژی قیمەت پێ بهێتە دان.

سه‌د حه‌یف و مخابن هه‌تا وه‌ک ڤێ گاڤێ ژی سیاسه‌تا گەمار و قرێژ یا پەکەکێ ژ ئالیێ گه‌له‌ک که‌سان ڤه‌ باش نه‌هاتیه‌ فام کرن و ژ بەر هندێ ژی قه‌درێ یێن وه‌ک ئەحمەد تورک گه‌له‌ک تێ گرتن.

سیاسه‌تا پەکەکێ قرێژ به‌ ،که‌سایه‌تێن وێ رێڤه‌ دبن و یێن خزمه‌تا وێ سیاسه‌تێ دکن نکارن پاقژ بن.

پێشیا گۆتیه‌: “بان کون به‌ بنبان شله‌”

Back to top button