ھەمەرەنگ

نامه‌یه‌کا ڤه‌کری ژ بۆ رێزدار مه‌سعود بارزانی

رێزدار من چاڤێن خوه‌ ب ته‌کۆشین و به‌رخوه‌دانا بارزانیێ مەزن و ھەمی بارزانیان ڤەکر.

ده‌ما من ل باکورێ کوردستانێ ده‌ست ب سیاسه‌تێ کر، من رێبازا بارزانی و ده‌ستوور و به‌رنامه‌یێن وان ژ خوه‌ ره‌ کر ره‌هبه‌ر، ئو د سالا 1975 ئان وه‌که‌ ئەندامێ پارتیا دەمۆکراتا کوردستاێ (پ.د.ک-ت)که‌تم ناڤا سیاسه‌تێ دا، کو رۆژه‌کێ ژ بۆنا ئازادیا گه‌لێ خوه‌ ببم چرووسکه‌ک ئاگر، دا کو دژمنێ خوه‌ بشه‌وتینم، ببم فنده‌ک، دا کو شه‌ڤره‌شا گه‌لێ خوه‌ رۆنی بکم.

من ئە ڤ هێز و قوه‌تا خوه‌ ژ شه‌رێ بارزانیان یا ل هه‌مبه‌ر داگیرکه‌ران وه‌رگرت. ژ سالا 1975 ئ و هه‌تا نها ب سایا وێ رێبازێ سیاسه‌تێ دکم. نها 64 سالی مه،‌ لێ هه‌تا هه‌بم، ئەڤ رێباز، ده‌ستوور، به‌رنامه‌ و به‌رخوه‌دانا بارزانیان دێ تم ببه‌ ره‌هبه‌را من، رێ و رێبازا من.

هه‌ر تشت ب گۆتنێ نابه‌ و دڤێ مرۆڤ ل گۆر گۆتنێن خوه‌ چالاک ژی به‌. هه‌گه‌ر گۆتن و کریارێن مرۆڤ هه‌ڤ نه‌گره‌، کارێ بێنه‌ کرن ژی، وێ نه‌ راست و ل گۆر وێ رێبازێ به‌.

ده‌ما جه‌نابێ وه‌ د 16 سالیا خوه‌ ده‌ چه‌کا ژ بۆنا ئازادیا کوردستانێ هلگرت، ل گۆر ڤێ باوه‌ریێ، ل سه‌ر رێبازا باڤێ خوه‌، هه‌تا رۆژا ئیرۆ وه‌ وه‌که‌ نه‌فه‌ره‌کی، وه‌که‌ پێشمەرگه‌یه‌کی ئەڤ ته‌کۆشین دایه‌ و ددن.
هه‌ده‌ف و ئارمانجا وه‌، به‌رخوه‌دان و ته‌کۆشینا وه‌ ھه‌می ژ بۆنا کوردستانه‌که‌ ئازاد و سه‌ربخوه‌ یه‌. ئە‌م کورد قه‌رزدارێ بارزانیانن.

ئەز و گه‌له‌ک کورد ئەم باش دزانن کو هه‌گه‌ر نه‌ ژ بارزانیان با، هن کەسان نها زووده‌ کوردستان فرۆتبانا. لێ مالا وه‌ ئاڤا به‌ کو هوون هه‌نن. وێ ب ده‌ستێ وه‌ کوردستانا سه‌ربخوه‌ بێ راگهاندن. ئە‌ڤ راستیه‌که‌ و ئەڤێ ببه‌ و ئەم هه‌می کورد ل به‌ندا وێ رۆژێ نه‌.

ئەم باش دزانم کو شه‌رێ هه‌ری مه‌زن و زۆر پشتی ئازادیێ یه‌. ئانگۆ ئاڤادانا وه‌لاتە. نها ژی هوون وێ دژین. د ناڤا ڤێ ژیانێده‌ هه‌لبه‌ت دکاره‌ هن کێمانی کو هوون پێ نه‌حه‌سن ببن. ئە‌ڤ تشته‌کی نۆرمالە.

د ئاڤادانا وه‌لاته‌کی ده‌ رۆل و ئەرکێن ره‌وشه‌نبیران، نڤیسکاران، هونه‌رمه‌ند و هۆزانان گه‌له‌کە. ژ به‌ر ڤێ ژی دڤێ خه‌باتێن وان بێنه‌ دیتن، باش بن بێنه‌ په‌سناندن و ئیمکان هه‌به‌ دڤێ ژ وان ره‌ ئالیکاری بێ داین، دا کو کارێ خوه‌ باشتر بکن.
هه‌گه‌ر د ئاڤادانا وه‌لاته‌کی ده‌ نڤیسکار، ره‌وشه‌نبیر، هۆزان و هونه‌رمه‌ند بێنه‌ ژ بیر کرن، ئان ئالیکاریا وان نه‌یێ کرن، د ڤرده‌ ژ بۆنا ئاڤادانا وه‌لاته‌کی ده‌مۆکرات دکاره‌ هن سه‌رئێشی په‌یدا‌ ببن. ژ بۆنا ئەو سه‌رئێشی و نه‌حه‌قی نه‌به‌، دڤێ هایا ده‌ستهلاتێ ب رێیا کۆمیته‌یان ژ هه‌می خه‌باتێن ڤان که‌سانا هه‌به‌ دا کو ئەو نه‌ئێشن و زولم‌ ل وان نه‌یێ.

ئەز وه‌که‌ بووبێ ئە‌سه‌ر کورده‌کی باکورێ کوردستانێ مه‌ و ل سوێدێ دژیم. ژ بۆنا کاره‌سه‌تا ئەنفالێ بنڤیسینم، ئەز ژ سوێدێ سالا 2007ئەز هاتم وه‌لاتێ خوه‌ ئێ ئازاد، ل ده‌ڤه‌را بارزان و ل باژارۆکێ بلێ ب جی بووم. من قه‌ده‌ره‌کێ ساله‌کێ کارێ خوه‌ ل وێدەرێ هه‌تا کو ژ من هات کر.

د ڤه‌گه‌را خوه‌ یا سوێدێ ده‌ من شانۆیا ئەنفالا بارزانیان یا ب ناڤێ ”دیرۆکا روره‌ش” وه‌شاند. هن ژ باشوورێ کوردستانێ ره‌ ژی شاندن. لێ مخابن تو ده‌نگ ده‌رنه‌که‌ت و ئەڤ که‌دا من نه‌هات دیتن.

لێ ئەز وه‌که‌ یه‌کی ل سه‌ر خه‌ت و رێبازا بارزانیێ نه‌مر، بێ هێڤی نه‌بووم من هه‌ر کارێ خوه‌ دۆماند و پشتی خه‌باتا 7 سالان من رۆمانا 8000 ئەنفالێ بارزانیان ل باکورێ کوردستانێ ژ ته‌ره‌ف وه‌شانخانه‌یا سیتاڤێ دا وه‌شاند. من ئەڤ ژی شاند باشوورێ کوردستانێ و خوه‌دیێ وه‌شانخانێ ب ده‌ستێ خوه‌ ئەڤ دا هن به‌رپرسیاران. لێ مخابن تو ده‌نگه‌که‌ک، سپاسیه‌ک ژ ڤێ ژی ده‌رنه‌که‌ت.

من هه‌ر کارێ خوه‌ دۆماند و ئەو هه‌ڤپه‌یڤینن د سالا 2007ئان ده‌ من ل گه‌ل مالباتێن که‌سێن وان هاتبوون ئەنفالکرنێ ژی وه‌که‌ پرتووک حازر کری یه‌. لێ مخابن ژ به‌ر بێ ده‌رفه‌تی ئەو هه‌ر د ئەمبارا وه‌شانخانه‌یا سیتاڤێ ده‌ سه‌کنی یه‌ و تو ئیمکانێن کو ئەم بکاربن وێ بدن وه‌شاندن ب مه‌ ره‌ نه‌ما.
ژ به‌ر کو پرتووک 320 روپه‌لن و نێزی 100 وێنه‌یێن ئەنفالێ ب ره‌نگ تێده‌ هه‌یه‌. ب ڤێ پرتووکێ ژی من هه‌تا نها 3 پرتووک و برۆشره‌ک ل سه‌ر ئەنفالێ بارزانیان وه‌شاند ئانگۆ پشت ”قێرینا بارزان” وێ ببه‌ 4 به‌رهه‌مێن من ل سه‌ر ئەنفالا بارزانیان. لێ ئەزێ ل ڤر رانه‌وه‌ستم، کار و خه‌باتێن خوه‌ یێن ل سه‌ر بارزانیان هه‌ر به‌رده‌وام بکم.

رێزدار من کارێ خوه‌ هه‌تا ڤر قه‌داندیه‌ و ڤان به‌رهه‌مانا ئێدی نه‌ یێن من ئێن بارزانیانن. هه‌گه‌ر ڤانا بێنه‌ وه‌شاندن، ببه‌ ب زمانێ بیانیان ئەڤ دکاره‌ ته‌سیره‌که‌ ئەرێنی ل ئەورۆپیان ژی بکه‌ دا کو ژ نووده‌ ئێدی ئەنفال بالا وان ژی بکشینه‌.

هه‌تا گه‌له‌ک کۆمه‌له‌ و ده‌زگه‌هێن ئینسانی یێن ل ئەورۆپا دکارن ل بلێ نه‌خوه‌شخانه‌ و هن ده‌زگه‌هان ژی ڤه‌کن.

من ته‌نێ خوه‌ست ڤی ده‌نگێ خوه‌ بگهێژینم جەنابێ وه‌. هوون وه‌که‌ سه‌رۆکێ کوردستانێ، که‌سایه‌تیه‌کن کو د قادا ناڤنه‌ته‌وه‌یی ده‌ خوه‌دی گۆتن و سۆزا خوه‌نه‌، تێ ناسین.
د ناڤا کوردان ده‌ وه‌که‌ سه‌رۆکێ کوردان تێنه‌ پێشیوازیکرن. هه‌گه‌ر ئیمکان و ده‌رفه‌ت هه‌به‌، ده‌ست باڤێژن ڤان به‌رهه‌ما، وان ل باشوورێ کوردستانێ بدن وه‌شاندن. وان بکن زمانێ بیانی و ل جیهانێ به‌لاڤ بکن. ئە‌ڤ به‌رهه‌مانا; دیرۆکا رووره‌ش (شانۆ)، بارزان دگری (رۆمان) و قێرینا بارزان (هه‌ڤپه‌یڤین) ئێدی یێن بارزانیان و گه‌لێ کوردن.

ژ جه‌نابێ وه‌ ره‌ ته‌مه‌ندرێژیێ دخوازم. ب هێڤیا کو وێ کوردستانا ئازاد و سه‌ربخوه‌ ب مزگنیا وه‌ بێ راگهاندن. ئە‌م هه‌می کورد ل گه‌ل وە و ل به‌ندا وێ رۆژێ نه‌.

سلاڤ و رێز
بووبێ ئە‌سه‌ر


Back to top button