حکومەتا نوو یا سوێدێ کو حکومەتا بلۆکێ برجوازایە ب پشتەڤانیا پارتیا راسترەو، دەمۆکارتێن سوێدێ، هاتیە ئاڤا کرن، هەر ژ نها هەمی بەرهەڤیا خوە نیشان دا کو د وارێ پرۆسەسا بئەندامبوونا ناتۆیێ دا هەموو شەرتێن ترکیێ قەبوول بکە.
سەرۆکوەزیرێ سوێدێ، ئولف کریسته‌رسسۆن، د نامەیەکێ دا کو ژ سەرۆكێ ترکیێ رەجەب تەیب ئەردۆگان را شاندیە ئامەدەییا خوە دیار کریە کو دخوازە د زووترین دەم دا سەردانا ئەنقەرەیێ بکە و ل سەر پرسا ئەندامبوونا ناتۆیێ ب سەرۆککۆمارێ ترکیێ را دانوستاندنان بکە و سەرۆکوەزیرێ سوێدێ پێشنیارا هەڤکاریەکا کوور د ناڤبەرا ستۆکهۆلم و ئەنقەرەیێ دا دکە.
کریسته‌رسسۆن ژ بۆ ئەردۆگان دنڤیسه: “ئه‌ز هێڤی دکم کو ئه‌ز و هوون د ده‌مه‌ک نێزیک دا ل سه‌ر ڤێ مژارێ گۆتووبێژه‌ک به‌رفره بکن. هەر دەما ژ بۆ وە باش بە، ئه‌ز ئاماده مه دەمەک زوو دا سەردانا ئه‌نقه‌ره‌یێ بکم.”
ل گۆر رۆژنامەیا سوێدی، ئەفتۆنبلادەت، کریسته‌رسسۆن نامه‌یا خوە دا ته‌که‌زی ل سه‌ر وێ یه‌کێ کریە کو ئه‌و دخوازن ب ترکیێ را د گه‌له‌ک ئاستان دا هه‌ڤکارییەک کوورتر بکن، ب تایبه‌تی د وارێ تێکۆشینا ل دژی ته‌رۆرێ دا، “ئه‌م پرسگرێکێن ئه‌وله‌هیێ یێن ترکیه‌یێ پر ب جدی دبینن و ئەم دخوازن د تێکۆشینا دژی ته‌رۆرێ، ب هه‌موو جوره و دیارده‌یێن وێ ڤە هه‌ڤکاریێ بکن و د ناڤ دا ژی گەفێن پەکەکێ رێخستنا ته‌رۆرێ و هه‌موو رێخستنێن ته‌رۆرێ کو ب وێ ڤەگێدایی نە. حکومه‌تا من، ژ بۆ پێشیێ ل چالاکیێن ڤان کۆمێن ته‌رۆریست بگره دێ ب ترکیه‌یێ را هه‌ڤکاریا دژی ته‌رۆرێ خورتر بکه.”
سەرۆکوەزیرێ سوێدێ د نامه‌یێ دا به‌حسا حکومه‌تا نوو یا سوێدێ ژی دکه و دیار دکه کو وه‌زیرێن نوو هاتینه وه‌زیفه‌دارکرن و ئاماده نه کو بکه‌ڤن ناڤ تێکلیێن سوێد-ترکیێ.
