ئه‌ڤه ده‌مه‌که ل سه‌ر هه‌ڤدیتنێن ده‌زگه‌هێن ده‌وله‌تا ترک و ئەبدولا ئۆجەلان تێ ئاخاڤتن. پێڤاژۆ ب ئاخاڤتنا سه‌رۆکێ مەهەپێ ده‌ڤله‌ت باهچه‌لی کو گۆتبوو : بلا ئۆجالان وه‌رە پارله‌مه‌نتۆیا ترکیێ د جڤینا فراکسیۆنا ده‌م پارتییێ دا باخڤه و بێژه، ئه‌م ته‌رۆرێ خلاسدکن و پەکەکێ فه‌سخ دکن.
لێ دخوه‌یێ هنده‌ک ئاکتۆرێن گرینگ ژ بۆ ئاماده‌کرنا ڤێ پێڤاژۆیێ د سه‌ری دا و ده‌مه‌ک درێژ ل سه‌ر ڤێ پێڤاژۆیا کو، ب گۆتارا باهچه‌لی هاتی ده‌ستپێکری، ڕۆله‌ک تایبه‌ت له‌یزتنه.
ئۆجەلان چه‌وا کو باهچه‌لی داخواز کری، بانگا خوه ڕاگەهاند. د بانگا ئۆجالان دا ۳ خالێن ئه‌ساسی هه‌بوون. هه‌رسێ خال ژی گه‌له‌ک ڤه‌کری و زه‌لال بوون.
ئۆجەلان دبێژه : دڤێ هه‌موو گوروبێن پەکەکێ دەست ژ چه‌کان به‌ردن. دڤێ پەکەکە کۆنگره‌یا خوه ل داربێخه و خوه فه‌سخ بکه. نابە ئێدی به‌حسا سه‌رخه‌بوون، فه‌ده‌راسیۆن، ئۆتۆنۆمی یان ژی خوه‌سه‌ریێ بێ کرن. دێ سیاسه‌تا ده‌مۆکراتک بێ ڕێڤه برن.
نه هه‌وجه‌یه کو، مرۆڤ چو نرخاندنه‌کێ ل سه‌ر ڤان گۆتنێن ئۆجەلان بکه. تشتا کو ده‌وله‌تێ داخواز کری ئۆجەلان ب جی ئانی. قه‌ندیل و ئالیێن دن ئێن گرێدایی پەکەکێ ، هه‌ر چقاس پێشوازی ل بانگا ئۆجالان کرن، لێ نه زه‌لالن و د به‌رسڤێن وان دا ته‌ڤلیهه‌ڤیه‌ک هه‌یه. یانی پەکەکە ب یه‌ک ده‌نگی به‌رسڤا بانگا ئۆجالان ل گۆرا کو وی داخواز کری نه‌دا. دێ ئه‌ڤ یه‌ک پاشه‌رۆژێ دا باش بێ دیتن.
ژ ئالیه‌ک دن ڤە، ژ ده‌رڤەیی پەکەکێ ،هه‌موو ڕێخستن و پارتیێن ته‌ڤگه‌را ئازادخوازا کوردستانێ بانگا ئۆجەلان خالا ده‌ستژێبه‌ردانا چه‌کان ب ئه‌رێنی نرخاندن. ژ ئالیه‌ک دن ده‌ستهلاتا هه‌رێما کوردستانێ ژی ئه‌ڤ پێڤاژۆیا ب بانگا ئۆجەلان هاتی ده‌ستپێکرن ب ئه‌رێنی نرخاند.
سه‌رۆکێ هه‌رێما کوردستانێ نێچیرڤان بارزانی د پانه‌لا ڕووداوێ دا (کو هێشت بانگا ئۆجەلان نه‌هاتبوو ڕاگەهاندن) د ده‌ربارێ ڤێ پێڤاژۆیێ دا ئاخڤی و گۆت: ئه‌ڤ پێڤاژۆ جدی یه. ئه‌ڤ پێڤاژۆ جدی یه و ل ترکیه‌یێ ب ئاوایه‌کی گه‌له‌کی جدی ده‌ست پێ کریه. ئه‌ز باوه‌ر دکم کو پێڤاژۆ پێڤاژۆیه‌کا جدی یه و نه پێڤاژۆیه‌که کو ب ئاوایه‌کی تاکتیکی هاتبه کرن. ڕۆلا مه ڕۆله‌کا ئالیکار دبە و ئه‌م ده‌ستێ خوه ناخن کارووبارێن ناڤخوه یێن ترکیه‌یێ. ڕۆلا مه ئه‌وه کو ئه‌م کاربن ڕۆله‌ک بلیزن ژ بۆ کو ئه‌م ببن ئالیکار دا کو ئه‌ڤ پرسگرێک بێ چاره‌سه‌رکرن لێ تشتێ کو ژ بۆ مه گرینگه و دیاره ژی ئه‌وه کو ئه‌ڤ پرسگرێک ب چه‌کان نایێ چاره‌سه‌رکرن.
نێچیرڤابن بارزانی د به‌رده‌وامیا ئاخڤتنا خوه دا دبێژه کو، بانگا ئۆجالان دێ ببه نه‌خشه‌رێیه‌ک ژ بۆ کو ئه‌ڤ پرسگرێک ب ئاوایه‌کی دورست بێ چاره‌سه‌رکرن. ب یا من، زێده ده‌م پێویسته. به‌ره‌ڤاژی ته‌خمینان کو وسا دفکرن کو د شه‌ڤ و ڕۆژه‌کێ دا بێ چاره‌سه‌رکرن لێ ب باوه‌ریا من د ده‌مه‌که نێز دا ئه‌ڤ بانگ دێ وه‌ره کرن.
دڤێ ئه‌م هه‌موو ئالیێن سیاسی پێشوازیێ ل بانگا برێز ئۆجالان بکن و بکه‌ڤن قاده‌که دن ئا چاره‌سه‌ریا سیاسی ل ترکیه‌یێ دا کو هه‌م ترک و هه‌م کورد و هه‌م ژی هه‌موو پێکهاته‌یێن کو ل ترکیه‌یێ دژین ژێ سوودێ وه‌رگرن. ئه‌م وها هێڤی دکن.
ده‌ربارێ ڕۆلا مه دا، به‌لێ به‌رێ ژی ڕۆلا مه هه‌بوویه و نها ژی مه ژ هه‌ر دو ئالیان را دوباره کریه. هه‌رێما کوردستانێ ئاماده یه هه‌ر ڕۆله‌ک کو پێوه‌ندی ب نێزیککرنا هه‌ر ئالیه‌کی را هه‌به، ئه‌م ئاماده نه…
ژ ئاخاڤتنا سه‌رۆکێ هه‌رێما کوردستانێ تێ خوویاکرن کو، که‌سایه‌تا برێز بارزانی ڕۆله‌ک تایبه‌ت و گرین د ڤێ پێڤاژۆیێ دا له‌یزتیه.
ده‌ستژێبه‌ردانا چه‌کان ب سه‌رێ خوه گاڤا هه‌ری گرینگه. ئه‌ڤ شه‌رێ بێ واته زه‌ره‌ره‌ک مه‌زن دا جڤاتا کورد و ته‌خریباتێن مه‌زن د جڤاتێ دا په‌یداکرن. ژ ئالیه‌ک دن ڤه ڤی شه‌ری ڕێیا پارتی و ڕێخستنێن کوردستانا باکور ب ئاوایه‌کی خه‌تماندیبوو. ده‌ستژێبه‌ردانا چه‌کان گه‌له‌ک باشه و دخوه‌یێ دێ ته‌ڤگه‌را کورد سودێ ژ ڤێ گاڤێ بگره.
هه‌لوه‌ستا پەکەکێ
ئالیێن پەکەکێ د به‌رسڤێن خوه دا نه زه‌لالن. ده‌ما مرۆڤ مه‌دیایا پەکەکێ دبینه شێوه‌یێ داینا نووچه‌یێن د ڤێ ده‌ربارێ دا گه‌له‌ک سارن. ئۆجەلان و ده‌وله‌ت دبێژه دڤێ هه‌م گوروبێن پەکەکێ ژ دەست چه‌کان به‌ردن. لێ پەکەکە ته‌نێ ئاگربه‌ستێ ڕادگهینه. ژ خوه ئه‌ڤه ده‌مه‌که ل باکورێ کوردستانێ چو شه‌ره‌ک نینە، شه‌رێ پەکەکێ ل باشوورێ کوردستانێ و ڕۆژاڤایێ کوردستانێ یه. ئۆجەلان ده‌ما به‌هسا جڤینا کۆنگره‌یێ دکه دبێژه ؛ بلا کۆنگره ژ بۆ هلوەشاندنا پەکەکێ بێ جڤاندن. یانی ده‌ستژێبه‌ردانا چه‌کان نه هه‌وجه‌یێ بریاره‌کا کۆنگره‌یێ یه.
لێ دخوه‌یێ دێ ئه‌ڤ پێڤاژۆ گه‌له‌ک درێژ باژۆ. ئیحتمالا مه‌زن دێ هنده‌ک به‌شێن پەکەکێ خوه ب ئاوایه‌کی بدن ئالیه‌کی و گۆتنا ئۆجەلان پێکناینن. هه‌تا به‌شه‌ک مه‌زن دێ هه‌ولبدن ڤێ پێڤاژۆیێ ب ئاوایێن جودا ب ناڤ بکن و ڕۆژا خوه پێ خلاس بکن.
گۆتنه‌ک ب ته‌نێ د بانگا ئۆجالان دا ژ بۆ ده‌ستخستنه‌کا مافێ کوردا نینە. ڤێ یه‌کێ د سه‌ری دا د ناڤا بنگه‌هێ پەکەکێ دا دلشکه‌ستنه‌ک مه‌زن په‌یدا کر.
پێڤاژۆ سه‌ردکه‌ڤه یان سه‌رناکه‌ڤه دێ د قۆناخا ل پێشیا مه دا باشتر بێ تێگهاندن. ژ به‌ر کو گه‌له‌ک پرس هه‌نه.
گه‌لۆ ئه‌ڤ گوربێن چه‌کدارێن پەکەکێ دێ ل کووده‌رێ و چه‌وا ژ دەستژچه‌کان به‌ردن، چه‌کێن خوه ڕاده‌ستی کی دکن؟
به‌شه‌ک کو نکارن ڤه‌گه‌رن ترکیێ دێ ل کوو بمینن ؟
چه‌کدارێن ڕۆژهلاتێ کوردستانێ کو د ناڤا پەکەکێ دانە، دێ کووڤه هه‌رن؟ ئیران چو جارا وان قه‌بوول ناکه. وه‌ک ڤان پرسان گه‌له‌ک پرس هه‌نه کو بێ به‌رسڤن.
لێ ل ڤێ ده‌رێ ل باکورێ کوردستانێ، به‌رپرسیاریه‌ک مه‌زن دکه‌ڤه ل سه‌ر ملێن پارتی و ڕێخستنێن سیاسی. دڤێ ب ئاوایه‌کێ هه‌ولبدن یه‌کرێزیه‌کی د ناڤا خوه دا ئاڤابکن. داکو بکاربن ببن به‌رسڤا داخوازیێن نه‌ته‌وه‌یی یێن کوردا و پێشوازیێ خه‌لکێ کوردێن ب ڤێ بانگێ دلشکه‌تی بوویین ژی بکن.
ئادارا/۲۰۲٥
