سه‌رۆکێ هه‌ره‌ما کوردستانێ نێچیرڤان بارزانی ل سه‌ر ڤه‌خوه‌ندنا فه‌رمی یا سه‌رۆککۆمارێ فرانسایێ ئه‌مانوێل ماكرۆن چوو پاریسێ (2021.03.30) و ل کۆشکا ئه‌لیسه‌یێ نێزکی دو سەعەتان ب ماكرۆن ڕا هه‌ڤدیتن پێک ئانی.
دئ جڤینێ دا، سه‌رۆک ئه‌مانوێل ماكرۆن دلخوەشیا خوه ب هه‌ڤدیتنا دگەل سه‌رۆک نێچیرڤان بارزانی نیشان دا، ماكرۆن سپاسیا بارزانی کر کو تەڤی وێ ڕه‌وشا دژوار یا کۆرۆنایێ دروست کریه، سه‌ردانا پاریسێ کر. سەرۆكێ فرانسایێ، هه‌روها، تەئكید ل سەر به‌رده‌وامیا پێکڤه‌کارکرن و پشتەڤانیا فرانسایێ، د چارچۆڤۆڤەیا هه‌ڤپه‌یمانیا ناڤده‌وله‌تی دا، ژ بۆ ئیراق و هه‌رێما کوردستانێ كر.
ھەر دو سەرۆكان، ڕه‌وشا ئیراق و هه‌رێما کوردستانێ و ناڤچه‌یێ ب گشتی گۆتوبێژ كر و ژ بۆنا ئارامیا ئیراق و ناڤچه‌یێ و ڕووبرووبوونا گه‌ف و مه‌ترسیێن داعیش، ته‌که‌ز ل سه‌ر پێشخستنا په‌یوه‌ندیان و هه‌ڤکاری و هه‌ڤبه‌شیا ئیراق و هه‌رێما کوردستانێ د گه‌ل فرانسایێ کر، هه‌ر دو ئالی ل سه‌ر گرنگیا هه‌بوونا تێگهشتنا هه‌ڤبه‌ش یا ژ بۆ پاراستنا ئارامیا ل ناڤچه‌یێ ب هه‌ڤره ھەڤھزر بوون.
سه‌رۆک ماكرۆن به‌هسا سه‌ردانا داوی یا پاپایێ پیرۆز فرانسیس یا ژ بۆ ئیراق و هه‌رێما کوردستانێ کر و بالکشاند ل سه‌ر وێ یه‌کێ کو وی بهیستیه كو ئەو سه‌ردان جهێ دلخوەشیا پاپا بویه و ماكرۆن ئەو سەردان ب ڕوودانه‌کا گرنگ دا زانین. ژ ئالیێ خوه ڤه سه‌رۆک نێچیرڤان بارزانی دووپات کر کو سه‌ردانا پاپا یا بۆ ئیراق و هه‌رێما کوردستانێ باندۆره‌کا ئه‌رێنی ل سه‌ر هه‌موو پێکهاتەیێن وه‌لات دا هه‌بوویه.
سه‌رۆک نێچیرڤان بارزانی، ژ بەر پشتگریا سەرۆك ماكرۆن و فرانسایێ د دەمێن دژوار دا ژ بۆ گەلێ كوردستانێ، ب ناڤێ ھەرێما كوردستانێ سپاسیا سەرۆك ماكرۆن كر و ژ بۆنا چاره‌سه‌رکرنا کێشه‌یێن ئیراقێ و دابینکرنا ئارامیێ ل ناڤچه‌یێ دا، بەرھەڤیا هه‌رێما کوردستانێ ژ بۆ کارکرن و ئالیکاری و هه‌ڤبه‌شیا د گه‌ل فرانسایێ و جڤاکا ناڤده‌وله‌تی دیار كر. سەرۆك نێچیرڤان بارزانی، هه‌روەها، هه‌ڤکاریا فرانسا و جڤاکا ناڤده‌وله‌تی یا ژ بۆنا چاره‌سه‌رکرنا کێشه‌یێن هه‌ولێر – به‌غدایێ و پێکڤه‌کارکرن و هه‌ڤبه‌شیا هه‌موو پێکهاتەیێن ئیراقێ د پرۆسه‌یا سیاسی دا ژ بۆ چاره‌سه‌ریێ ب گرنگ و ب پێویست زانی. مه‌ترسیێن ته‌رۆرێ و سه‌رهلدانا داعیشێ مژاره‌کا دن یا جڤینێ بوو کو تێدا ته‌که‌ز ل سه‌ر گرنگیا ئالیکاری و هه‌ماهه‌نگیا د ناڤبه‌را پێشمه‌رگه و ئارتێشا ئیراقێ دا ل ناڤچه‌یێن مادده‌یا 140 یا ده‌ستوورێ کرن داكو ڤالاهیا ئه‌منی دروست نه‌بە و ژ ئالیێ داعیش ڤه وه‌کی ده‌رفه‌ته‌ک نەھێتە بکارانین. د ڤێ ده‌ربارێ دا سه‌رۆک ماكرۆن هه‌ڤرا بوو کو داعیش هێشتا ژی مه‌ترسیه‌کا جددیه و جڤاکا ناڤده‌وله‌تی د ڕووبرووبوونێ دا به‌رده‌وام دبە
پێشهاتێن داویێ، به‌لاڤبوونا کۆڤد – 19 ل فرانسا و ئیراق و هه‌رێما کوردستانێ و ڕێکارێن ڕووبرووبوونا وێ، ڕه‌وشا کۆچبه‌ر و په‌نابه‌ران ل وارگه‌هێن هه‌رێما کوردستانێ و پێویستیا وان یا ب هه‌ڤکاری و یارمه‌تیێن جڤاکا ناڤده‌وله‌تی و چەواییا ڤه‌گه‌راندنا وان بۆ جهێن وان، ڕه‌وشا ئێزدیان ل ناڤچه‌یا شنگالێ، رەوشا کریستیانێن ل ده‌شتا نەینەوا، هلبژارتنێن پێشوەختێن ئیراقێ، ڕه‌وشا ناڤخوه‌یا هه‌رێما کوردستانێ، په‌یوه‌ندیێن ئیراق و هه‌رێما کوردستانێ ل گه‌ل وه‌لاتێن ناڤچه‌یێ و چه‌ند مژارێن دن یێن گرنگ و هه‌ڤبه‌ش، به‌شه‌که دن یێ جڤینا سەرۆكێ ھەرێما كوردستانێ نێچیرڤان بارزانی و سەرۆككۆمارێ فرانسایێ ئەمانوێل ماكرۆن بوون
