ناڤەرۆكا جڤینا بارزانی و گرۆپا پارتی ل ناڤ حكومەتێ
سەرۆك مەسعود بارزانی دگەل گرۆپا پارتیا دەمۆكراتا كوردستانێ (پەدەكێ) یا د ناڤ حكومەتا ھەرێما كوردستانێ دا جڤیا و پشتەڤانیا خوە ژ بۆ كار و خەباتێن وان دیار كر و گۆت كو دڤێ حكومەتا ھەرێما كوردستانێ ل سەر پرۆسەسا چاكسازیێ د ھەموو وران دا بەردەوام بە.
سەرۆك بارزانی ژ تیما پەدەكێ یا د حكومەتا ھەرێما كوردستانێ دا گۆت كو رێبازا بارزانیێ نەمر رێبازا خزمەتكرنا خەلكی یە و ب تایبەتی چینا ھەژاران و دڤێ حكومەتا كوردستانێ ژی گرنگیا خوە بدە سەر خزمەتكرنا خەلكێ كوردستانێ
ڕۆژا شه‌میێ 2021.03.13 ل سه‌لاحه‌ددین سه‌رۆک مەسعود بارزانی پێشوازیا سەرۆكوەزیرێ حكومەتا هه‌رێما کوردستانێ و تیما پەدەکێ ل حکومه‌تا هه‌رێما کوردستانێ دا کر.
د ده‌ستپێکا جڤینێ دا مه‌سروور بارزانی سه‌رۆکوەزیرێ حکومه‌تا کوردستانێ ب کورتی ژ سەرۆك بارزانی را بەحسا کار و خەبات، به‌رنامه‌یێن حکومه‌تێ، پێنگاڤێن پرۆسه‌سا چاکسازیێ د وارێ که‌رتێ نه‌فت و پێشمه‌رگه و وارێن جوودا جوودایێن دن داو، پێنگاڤێن ژ بۆ زێده‌کرنا داهاتا حکومه‌تێ و پێشکێشکرنا خزمه‌تگوزاریان ب وه‌لاتیان كر.
سەرۆكوەزیر ته‌که‌ز ژی ل وێ یه‌کێ کر کو کابینه‌یا حکومه‌تا كوردستانێ وه‌کی تیمه‌کا هه‌ماهه‌نگ و بهێز و ب بێ جووداهیا د ناڤبه‌را ئالیێن پێکهێنه‌ر دا کاروبارێن خوه برێڤه دبه و ھەولا وێ یەكێ ژی دده کو ژ بۆ دابینکرنا داهات و خزمه‌تکرنا خه‌لکێ پشت ب خوه و شیانێن هه‌رێما کوردستانێ ببه‌ستە.
د ڤێ جڤینێ دا سه‌رۆک مەسعود بارزانی گۆتاره‌ک پێشکێشی ئاماده‌بوویێن جڤینێ کر و بال كشاندە سەر ڕه‌وشا سیاسی و پێشهاتەیێن ل سەر ئاستا کوردستان، ئیراق و ناڤچه‌یێ و گرنگیا یه‌کرێزیا ئالیێن سیاسیێن هه‌رێما کوردستانێ و بەھسا پێداویستیێن ڤێ قۆناغێ كر. هه‌روەها ده‌ستخوه‌شی ل هه‌ول و که‌دا تیما پەدەکێ ل حکومه‌تێ کر و ڕاگەهاند كو پێویسته کو گرۆپا پەدەكێ د ناڤ حكومەتێ دا ھەر هه‌موو خوه ب خزمه‌تکارێ گه‌لێ کوردستانێ بزانن و دڤێ ل ناڤ چینێن جڤاکێ و خه‌لکێ هه‌ژارێ وه‌لات دا بن و هه‌موو ھەولێن وان ژ بۆ ھندێ بن کو ده‌ستهلات ب دروستی و ژ بۆ خزمه‌تا جه‌ماوه‌ر بێ بکارانین. سه‌رۆک بارزانی بالکشاند ل سه‌ر وێ یه‌کێ کو ڕێبازا بارزانی ڕێبازا خزمه‌تکرنا خه‌لکیه و پێویسته خه‌لکێ کوردستانێ که‌رامه‌تا خوه د ناڤ حکومه‌تا خوه دا ببینه. د به‌شه‌کێ دن یێ ئاخافتنا خوه دا سه‌رۆک بارزانی پشته‌ڤانیا خوه ژ بۆ حکومه‌تا هه‌رێما کوردستانێ نیشان دا و داخواز کر کو حکومه‌ت ب پێداگری و ب هێز ل سه‌ر پرۆسه‌یا چاکسازیێ به‌رده‌وام بە و ئاماده‌هیا خوه ژی ڕاگەهاند کو ژ بۆ سه‌رخستنا پرۆسه‌یا چاکسازیێ ئه‌وا پێویست بە دێ یارمه‌تیده‌رێ حکومه‌تا هه‌رێمێ بە
