ئه‌ندامێن پارتییا ده‌مێ سڕ سوره‌ییا ئۆنده‌ر و په‌رڤین بولدان کو دوهی (٢٨\١٢\٢٠٢٤) ب ڕێبه‌رێ پەکەکێ ئەبدولا ئۆجەلان را هه‌ڤدیتن پێک ئانیبوون، ل سەر هەڤدیتنا خوە داخویانیەک دان رایا گشتی..
داخویانی:
ژ چاپه‌مه‌نیێ و ڕایا گشتی را
داخویانیا شاندەیا ئیمرالیێ:
مه د ۲۸ێ کانوونا ۲۰۲٤ان دا ل ئیمرالیێ ب برێز ئەبدولا ئۆجەلان را هه‌ڤدیتنه‌ک به‌رفره پێک ئانی. ته‌ندورستیا وی باش بوو و مۆرالێ وی پر بلند بوو. نرخێن وی یێن ژ بۆ چاره‌سه‌ریه‌کا مایینده یا پرسگرێکا کورد گرینگیه‌کا ژیانی بوو.
د هه‌ڤدیتنێ دا کو گه‌شه‌دانێن داوی یێن ل ڕۆژهلاتا ناڤین و ترکیه‌یێ هاتن نرخاندن، برێز ئۆجەلان ژ بۆ سه‌ناریۆیێن سبه‌رۆژا تاری یێن هاتینه فه‌رزکرن، چاره‌سه‌ریێن ئه‌رێنی پێشکێش کرن.
چارچۆڤه‌یا گشتی یا ڕامان و نێزیکاتیا وی وها یه:
– ژ نوو ڤه خورتکرنا براتیا ترک-کورد ژ بۆ هه‌موو گه‌لان بوویه به‌رپرسیاریه‌کا دیرۆکی و ژ بۆ هه‌موو گه‌لان ژی بوویه ئه‌رکه‌ک دیارکه‌ر ئا چاره‌نووسێ.
– ژ بۆ سه‌رکه‌تنا پێڤاژۆیێ، پێویسته هه‌موو ده‌ردۆرێن سیاسی یێن ل ترکیه‌یێ بێیی کو ب حه‌سابێن ته‌نگ و ده‌مکی بێن گرتن، ئینسیاتیفەک ئاڤاکه‌ر ته‌ڤبگه‌رن و ته‌ڤکاریێن ئه‌رێنی بکن. یه‌ک ژ زه‌مینا هه‌ری گرینگ ئا ڤان ته‌ڤکاریان ژی بێگومان وێ مه‌جلیسا (پەرلەمەنتۆیا) ترکیێ به.
– بوویه‌رێن ل غه‌زه و سووریه‌یێ نیشان دا کو چاره‌سه‌ریا ڤێ پرسگرێکا کو ب ده‌ستوه‌ردانێن ده‌رڤه دهات خوه‌ستن کوورتر ببه، ئێدی نه‌چار مایه. ئالیکاری و پێشنیارێن ئۆپۆزیسیۆنێ ژی ژ بۆ بده‌ستخستنا سه‌رکه‌تنێ د کاره‌کی ڕاسته‌راست ب گرانیا ڤێ مژارێ را هێژا نه.
– ئه‌و ژیربین و ئیراده‌یا من هه‌یه کو ته‌ڤکاریا ئه‌رێنی یا پێویست ژ بۆ پارادیگمایا نوو یا کو برێز باخچه‌لی و برێز ئه‌ردۆگان هێز ددن وێ بکم.
– هه‌یئەت دێ د دەمک نێزیک دا هه‌م ب ده‌وله‌تێ هه‌م ژی ب ده‌ردۆرێن سیاسی را پارڤه بکه. د ڕۆناهیا ڤان دا ئه‌ز ئاماده مه کو پێنگاڤا ئه‌رێنی یا پێویست باڤێژم و بانگاوازیێ بکم.
– ئه‌ڤ هه‌موو هه‌ولدان دێ وه‌لات بگهینه ئاستا کو هه‌ق دکه و ژ بۆ ڤه‌گوهه‌رتنا ده‌مۆکراتیک ژی دێ ببه ڕێبه‌ره‌ک پر هێژا.
– ژ بۆ ترکیێ و هه‌رێمێ سه‌رده‌ما ئاشتی، ده‌مۆکراسی و براتیێ یه.
ب ڕێز ژ ڕایا گشتی را
په‌رڤین بولدان و سڕ سره‌ییا نده‌ر
٢٩ کانوون ٢٠٢٤
وەکە تێ زانین پشتی کو وه‌زیرێ دادێ یێ ترکیێ، یلماز تونچ، ده‌ستوور دا پارتییا ده‌مێ سه‌ردانا سه‌رۆکێ پەکەکێ ئەبدولا ئۆجەلان بکه، پەرلەمه‌نته‌رێ سته‌نبۆلێ سڕ سوره‌ییا ئۆنده‌ر و پەرله‌مه‌نته‌را وانێ په‌رڤین بولدان دوهی (٢٨\١٢\٢٠٢٤) دانێ سبێ چوون گراڤا ئیمرالیێ و ب سەعه‌تان دگه‌ل ئۆجەلان هه‌ڤدیتن کرن.
