جڤاتا وه‌زیرێن هه‌رێما کوردستانێ د جڤینه‌کا ئاوارته دا، رۆژا شەمیێ ١٠٢٥\١\١١، ده‌ربارێ ماف و شایستەیێن دارایی یێن هه‌رێما کوردستانێ جڤیا.
جڤاتا وه‌زیرێن هه‌رێما کوردستانێ ب سه‌رۆکاتیا سه‌رۆکوه‌زیرێ هه‌رێما کوردستانێ مه‌سرور بارزانی بوو و جیگرێ سه‌رۆکوه‌زیرێ هه‌رێما کوردستانێ قوباد تاله‌بانی، وه‌زیرێن کورد یێن حکومه‌تا فه‌ده‌رال و سه‌رۆکێن فراکسیۆنێن کوردستانی یێن ل پەرلامه‌نتۆیا ئیراقێ د جڤینا ئاوارته دا بەرهەڤ بوون.
هندەک ژ فراکسیۆنێن کوردستانی یێن ل پەرلامه‌نتۆیا ئیراقێ د جڤینێ دا ئامادە نەبوون و ل دۆر ڤێ یەکێ سەرۆکوەزیر گۆت: مە هەموو فراکسیۆنێن کوردستانی یێن ل پەرلامه‌نتۆیا ئیراقێ ژ بۆ ڤێ جڤینێ ڤەخوەند بوون. خوەزی هەموو ئالی د ڤێ جڤینێ دا ئامادە ببوونا و مە ب هەڤ را ب ئاشکرایی و رووبروو هەموو مژار ل بەر رۆناهیا راستیان گۆتوبێژ بکرانا.
سه‌رۆکوه‌زیر ده‌ستنیشان کر کو تەعاملا به‌غدایێ ب هه‌رێما کوردستانێ را نه ل گۆری تەعاملا ب قەوارەیک فه‌ده‌رالی و دەستووری یە، بەغدا وەک پارێزگەهەکێ و هندەک جاران هێشتا بچووکتر ژی تەعاملا ب هەرێما کوردستانێ را دکە. ئه‌ڤ هه‌لوه‌ستا به‌غدایێ ئێدی ناهێتە قه‌بوولکرن. ئه‌م وه‌کهه‌ڤیێ و مافێن خوه یێن ده‌ستووری دخوازن.”
سه‌رۆکوه‌زیر مه‌سرور بارزانی به‌هسا پێوه‌ندیێن هه‌ولێر و به‌خدایێ کر و گۆت: “دادگه‌ها فه‌ده‌رالی ته‌نێ د به‌رژه‌وه‌ندیا حکومه‌تا فه‌ده‌رال دا بریار دانه و چو جاران دد به‌رژه‌وه‌ندیا گه‌لێ هه‌رێما کوردستانێ دا بریار نه‌دانه. ئه‌م وه‌کهه‌ڤیێ و مافێن خوه یێن ده‌ستووری دخوازن. دڤێ ئه‌م هه‌موو هه‌ولێن خوه ژ بۆ ڕاستکرنا ڤان پرسگرێکان بدن. ئه‌م نکارن هه‌موو پرسگرێکێن خوه ته‌نێ ب مژارا مه‌عاشان ڤە کورت بکن. مه گه‌له‌ک خالێن دن هه‌نه کو دڤێ ئه‌م ل سه‌ر وان باخڤن. ماده‌یا ۱٤۰ هێشتا نه‌هاتیه بجهکرن، پرسگرێکا هه‌رێمێن کوردستانی یێن ل ده‌رڤه‌یی ئیداره‌یا هه‌رێما کوردستانێ چاره‌سه‌ر نه‌بوویه. پرسگرێکا پێشمه‌رگه وه‌کی پێویست چاره‌سه‌ر نه‌بوویه، پرسگرێکا قه‌ره‌بوویا قوربانیێن ئه‌نفال و قوربانیێن ڕه‌ژیما به‌رێ هه‌موو ژ بیر چوونه.
مخابن به‌غدایێ ب سیاسه‌ته‌کا سه‌رکه‌فتی کاریه پرسگرێکێن مه بچووک بکه. مه ب وێ یه‌کێ مژوول دکه کا گه‌لۆ دێ مه‌هانه مووچەیەیێن گه‌لێ کوردستانێ بدە یان نا؟
ما ئه‌و هه‌موو تشتێن دن چ؟ ۱۰۰ ساله کوردستان قوربانیێ دده، ژ بۆ مه‌عاشان بوویه یان ژ بۆ ناسنامه، ئاخ، نشتمان، وه‌کهه‌ڤی و ئازادیێ بوویه؟
سەرۆکوەزیرێ هەرێما کوردستانێ دەربارێ مووچەیێ کارمەندێن هەرێما کوردستانێ داخواز ژ حکومەتا فەدەرال کر کو پرسگرێکا مووچەیان چارەسەر بکە و گۆت: ئه‌م دخوازن گه‌لێ هه‌رێما کوردستانێ د سالا ۲۰۲٥ئان دا ژ دلگرانییا کا دێ مووچە ژ بەغدایێ وەرن یان نا ڕزگار ببە
سه‌رۆکوه‌زیرێ هه‌رێما کوردستانێ بانگا پاراستنا به‌رژه‌وه‌ندیێن هه‌رێما کوردستانێ کر و گۆت: ل گۆری من و هه‌موو گه‌لێ کوردستانێ ئه‌رکێ وه یێ یه‌که‌م پاراستنا به‌رژه‌وه‌ندیێن گه‌لێ کوردستانێ و پاراستنا ماف و هه‌قێن دارایی یێن گه‌لێ هه‌رێما کوردستانێ یه. هوون گرێدایی چ پارتیێ بن و د چ پۆستێ دا بن، هوون نوونه‌رێن گه‌لێ کوردستانێ نه.
