سه‌رۆکوه‌زیرێ کوردستانێ ڕاگه‌هاند، وان زێده‌باری هه‌بوونا کریز و کێشه‌یان کارین خوه ل سه‌ر پیان بگرن و ئه‌و دخوازن کوردستان ل سه‌ر ڕێیا ڕاست به.
سه‌رۆکوه‌زیر مه‌سروور بارزانی د هەڤپەیڤینا خوە یا دگەل کانالا سکای نیوز یا عه‌ره‌بی به‌رسڤا پرسێن پێشکێشکارا ناڤدار جیزال خووری ددە.
تێکەلیێن دگه‌ل به‌غدایێ
سه‌رۆکوه‌زیر مه‌سروور بارزانی ل سه‌ر تێکەلیێن هه‌ولێر و به‌غدایێ دبیژە: “ب سرووشتا ڕه‌وشێ، تێکەلی باش بوونه، لێ به‌لێ هێشتا ژی پرسگرێکێن ناڤبه‌را مه ب ته‌مامی چاره‌سه‌ر نه‌بوونه، چار سالن حکومه‌تا بەغدایێ چو پاره ژ کوردستانێ ڕا نه‌شاندنه، کوردستان پێویست بوو ژ بازرگانێن په‌ترۆلێ و خه‌لکێ خوه و هه‌تا بانکا ناڤه‌ندی یا ئیراقێ ژی پارە ده‌ین بکه، ئه‌ڤ ژی بوو ئەگەر کو چه‌ند ملیار دۆلار وەکە دەین بەکەڤن سەرهەڤ و ئه‌ڤ ده‌ین وه‌که میرات ژ مه ڕا مان و ئه‌م ژی ڕووبروویی ئاسته‌نگێن کۆرۆنا و کێشه‌یا بازرگانی و داکه‌تنا نرخێ په‌ترۆلێ بوون، ئەڤ هه‌موو تشت ژی بوون ئەگەرا وێ یه‌کێ کو مه نه‌کاری پێنگاڤێن بله‌ز به‌ر ب پێشکه‌تنێ باڤێژن، ب تەنێ مه کاری خوه‌راگرین و ئه‌رکێ خوه د وارێ دایینا مووچه‌یان دا جیبجی بکن.”
سەرۆکوەزی دبێژە کو ت؛کەلیێن وان دگەل سەرۆکوەزیرێ ئیراقی باشن: “ژ بۆنا کو ئەم تێکەلیێن خوه دگه‌ل بەغدایێ باش بکن پێنگاڤ پێنگاڤ ئەم بە ب پێش چوون. مه تێکەلیەک باش دگه‌ل سه‌رۆکوه‌زیرێ ئیراقێ مسته‌فا کازمی هه‌یه و ئه‌م چاڤه‌رێ دکن کو ئه‌م ڤێ تێکەلیێ باشتر و بهێزتر بکن.”
گه‌نده‌لی
ل سه‌ر پرسا گه‌نده‌لیێ، سه‌رۆکوه‌زیر مه‌سروور بارزانی دبێژە: “ئاستا گه‌نده‌لیا کو ل هەرێما کوردستانێ هه‌یه ل گۆر ناڤچه‌یێن دن یێن ئیراقێ گه‌له‌ک کێمتره. ئەم لێدخەبتن کو گەندەلیا هەیە ژهۆلێ راکرن و ئه‌ڤ یەک ژ کار و خه‌باتێن مه پێشینە. ئاستا گه‌نده‌لیێ ب ئاوایه‌کی به‌رچاڤ داکه‌تیه، لێ به‌لێ ب داوی نه‌بوویه، گەندەلی ل پرانیا وه‌لاتان هه‌یه، ل گۆر ناڤچه‌یێن دن، کوردستان د ڕه‌وشه‌کا گه‌له‌ک باشتر دایه. هه‌تا ژ ڕه‌وشا هنده‌ک وه‌لاتێن جیران ژی باشتره.”
کۆچبه‌ری
ل سه‌ر مژارا کۆچا وه‌لاتیان ژی، مه‌سروور بارزانی ئاشکه‌ره کر: “ئه‌م ب هوورگلی و ب ئاوایه‌کی چالاک چاڤدێریا ڤێ مژارێ دکن. ژ بۆ چاره‌سه‌رکرنا ڤێ پرسگرێکێ ئه‌ز دگه‌ل سه‌رۆکوه‌زیرێ پۆلۆنیا و ئالمانیایێ و هه‌تا حکومه‌تا فه‌ده‌رالی یا بەغدایێ ژی ئاخڤتیمه، لێ به‌لێ دو مژارێن دوئالی هه‌نه، یه‌ک ژ وان؛ ئالیێ مرۆڤی یه، یا دویه‌م ژی؛ ئالیێ سیاسی یا ڤێ مژارێ یە.”
هه‌روها ده‌ستنیشان کر: “ئه‌ز ب هه‌موو باوه‌ریێ دبێژم کو چو که‌سه‌ک ژ وان کۆچبه‌ران ژ به‌ر گه‌نده‌لی و زه‌ختێن جوور ب جوور نه‌چوونه بێلاروسیایێ، وان که‌سان ب هه‌زاران دۆلار دانه قاچاخچیان و بازرگانێن سیاسی و چوونه بێلاروسیایێ و ل وێرێ دهێنە بکارانین وه‌که کارتا ململانا دژی یه‌کێتیا ئه‌ورۆپایێ. ئه‌و که‌س ل په‌ی ده‌رفه‌تا ژیانه‌کا باشتر چوون، نه ژ به‌ر بێکاریێ و وان بانگه‌شه‌یێن کو چو جار ب ڕاستیێ ڤه هه‌ڤ ناگرن، ئەو ژ به‌ر هه‌ژاریێ نەچوونە.”
مه‌سروور بارزانی دا زانین کو خه‌لکێ بیانی ژ بۆ خه‌باتێ دهێنە کوردستانێ و ل سه‌ر ڤێ مژارێ گۆت: “ئه‌ز دخوازم ڤێ یه‌کێ پتر زه‌لال بکم، مه زێده‌تری ملیۆنه‌ک په‌نابه‌ر و کۆچبەر حه‌واندنه و ژ به‌ر ئاساییش و ده‌رفه‌تێن کار و سه‌قامگیریێ به‌رێ خوه دانه هه‌رێمێ و ب هه‌زاران که‌س ژ ئاسیا، ترکیێ، ئیران و به‌شێن دن یێن ئیراقێ هاتنه کوردستانێ و دخه‌بتن. که‌سێن کو چوونه بێلاروسیایێ ژ به‌ر بێکاریێ نه‌چوون، چمکی ب هه‌زاران که‌س ژ بۆ کار هاتنه کوردستانێ، بێگومان قاچاخچی و بازرگانێن سیاسی ئه‌و که‌س خاپاندنه و ژ بۆ مه‌به‌ستێن سیاسی شاندنه بێلاروسیایێ.”
هه‌روها ئه‌شکه‌ره کر: “ژ بەر ڕه‌وشا ژیانا وان ئه‌ز ب خوه گه‌له‌ک نەرەحەتم و ئه‌م ئاماده نه کو ب ئالیکاریا دگه‌ل حکومه‌تا فه‌ده‌رالی ژ بۆ ڤه‌گه‌راندنا وان بخه‌بتن. نها ژ وان ب سه‌دان که‌س ڤه‌گه‌ریان هه‌رێما کوردستانێ و پێشوازی ل وان هات کرن.”
هلبژارتنێن جۆتمه‌هێ
سه‌رۆکوه‌زیرێ کوردستانێ دیار کر: “خه‌لکی ده‌نگێ خوه دان، ژ به‌ر گه‌له‌ک مژاران ڕێژه‌یا به‌شداریێ زێده نه‌بوو، به‌شه‌ک ژ وان کێشه‌یان ته‌کنیکی بوون، گه‌له‌ک که‌س ژ ده‌نگدانێ بێهێڤی بوون، چه‌ند ئەگەر ل پشت نزمبوونا ئاستا به‌شداریێ هه‌بوون، مژاره‌کا دن یا گرنگ هه‌یه و دڤێت ل به‌ر چاڤان بهێتە گرتن، هه‌موو ئه‌وێن ده‌نگێن وان زێده بوونه مه‌رج نینه کو کورسیێن وان زێده بووبه، پێوه‌ندیا وێ ب سیسته‌ما هلبژارتنێ ڤە هه‌بوو، ئیراق یه‌ک بازنه نه‌بوو، فره بازنه بوو، پارتیێن کو پلان و ئامادەکاریێن وان ب هووری نەبوون، ل گۆر ڤێ سیسته‌مێ نه‌کارین کورسیێن پێویست ب ده‌ست بخن، لێ به‌لێ پارتیێن کو ڕێکخستنا وان ئا بهێز هه‌بوو، گه‌له‌ک کورسی ب ده‌ست خستن. ئه‌م هێڤی دکن کو هه‌ر که‌س ڕێز ل ئه‌نجامان بگرن، د داویێ دا ژی، ئه‌ڤ پرۆسه هه‌ر چار سالان جاره‌کێ دوباره دبه.”
ل سه‌ر ڕه‌دکرنا ئه‌نجامێن پرۆسه‌یێ و هه‌ولا کوشتنا سه‌رۆکوه‌زیرێ ئیراقێ مسته‌فا کازمی، سه‌رۆکوه‌زیر مه‌سروور بارزانی گۆت: “ده‌ستپێکێ، ده‌ربارێ ئێریشا ل سه‌ر مالا سه‌رۆکوه‌زیر هاتی کرن، دڤێ ئه‌م ل به‌ندا ئه‌نجامێن لێکۆلینێ بن. مه ئه‌و ئێریش شه‌رمه‌زار کر و پشته‌ڤانیا خوه ژ بۆ سه‌رۆکوه‌زیر نیشان دا، دڤێت لێپرسین ل به‌رپرسێن ڤێ تاوانێ بهێتە کرن، هه‌تا نها ب فه‌رمی ناڤێ که‌سه‌کی نه‌هاتیه گۆتن و ناڤێ چو ئالیه‌کی نه‌هاتیه ئاشکەرە کرن و ب هوورگلی نایێ زانین به‌رپرسێ ڤێ تاوانێ کێ یه و ئه‌م چاڤه‌رێیا ئه‌نجامێن لێکۆلینێ دکن و وی ده‌می هه‌ر که‌س دێ گۆتنا خوه ببێژه.”
هه‌روها دا زانین: “که‌سێن ل دژی پرۆسه‌یا هلبژارتنێ نه و داخوازا دوباره‌کرنێ دکن، ئەو دخوازن ئیراقێ پاشڤه ببن. ئه‌م هێڤی دکن ئه‌وێن د پرۆسه‌یێ دا ئه‌نجامێن پێویست ب ده‌ست نەخستنه ڕێزێ ل ئه‌نجامێن داوی بگرن، ب ئارمانجا خه‌باتا ب هه‌ڤ ڕا و چو ڕێیه‌ک ژی نینە کو ئه‌م ب به‌تالکرنێ ڕازی بن.”
سه‌رۆکۆماری
ل سه‌ر هه‌بوونا نامزاده‌کی دن یێ کورد ژ بۆ سه‌رۆکۆماریا ئیراقێ، مه‌سروور بارزانی ده‌ستنیشان کر: “ئه‌ڤ پۆست پارا کوردانه و هێشتا ل سه‌ر ڤێ مژارێ بریار نه‌هاتیه دایین، هه‌تا نها چو ناڤه‌ک یه‌کئالی نه‌بوویه. وه‌که عاده‌ته‌ک شیعه سه‌رۆکوه‌زیر، سوننی سه‌رۆکێ پەرلامه‌نتۆیێ و کورد ژی سه‌رۆکۆمار دیار دکن. ئه‌م چاڤه‌رێیا وێ یه‌کێ دکن کو ئه‌م بزانن نامزه‌دێ شیعه کی یه، ئه‌م هێڤی دکن که‌سه‌کی کو ژ هه‌موو ئالیان ڤه هاتیه په‌سه‌ندکرن به.”
تێکەلیێن هه‌ولێر و واشینگتۆنێ
سه‌رۆکوه‌زیر مه‌سروور بارزانی ل سه‌ر تێکەلیێن هه‌رێما کوردستانێ و ئەمریکایێ دیار کر: “مە تێکەلیێن باش دگه‌ل ئیداره‌یا ئەمریکایێ هه‌نه.”
هه‌روها ئه‌شکه‌ره کر: “ئه‌ز نکارم ل شوونا ڕایه‌دارێن ئەمریکایێ باخڤم، ئه‌و دکارن ژ بۆ خوه باخڤن، لێ به‌لێ وه‌که دۆست و هه‌ڤپه‌یمان ل ئیراقێ ده‌ستوه‌ردان کرن و ژ بۆ ڕووخاندنا ڕه‌ژیما به‌عسێ د سالا ۲۰۰۳ئان دا ئالیکاری کرن و هه‌ڤکار بوون د شه‌رێ دژی داعشێ دا، ئه‌م هێڤی دکن پێوه‌ندیه‌کا مه یا باش هه‌به، لێ به‌لێ ژ به‌ر وان گه‌فێن کو نها ڕووبروویی ئیراقێ بوونه د هه‌ردو وارێن ئابۆری و ئه‌وله‌هیێ دا کو ئیراق نکاره ب ته‌نا سه‌رێ خوه ل به‌ر خوه بده، پێویستیا وێ یه‌کێ ئینایە هۆلێ کو ئەمریکا و هه‌ڤپه‌یمان ئالیکار بن ژ بۆ ڕووبرووبوونا ته‌رۆر و ئالیکاریکرنا ژ ئالیێ ئابۆریێ ڤه، ئه‌م هێڤی دکن بمینن هه‌تا ده‌ما کو وه‌لات بگەهیتە رەوشەکا باشتر.”
