ل نور سولتانا پایته‌ختا کازاخستانێ، ۱٤مین جیڤنا گارانتۆرێن سووریێ برێڤه چوو و سه‌رۆکێ شاندا حکوومه‌تا سووریێ به‌شار جافه‌ری ژی ئیدیعا کر کو ل سووریێ پرسا کورد نینه و گۆت کو ئه‌و داخوازێن ژ بۆ خوه‌سه‌ریێ ڕه‌د دکن و ئه‌ڤ داخواز جوداخوازی یه.
ل سه‌ر پرسا په‌یامنێرێ ڕووداوێ کامیز شه‌دادی یا، “گه‌لۆ وه پرسا کوردی د گه‌را ۱٤ئه‌مین یا ئاستانایێ دا گۆتووبێژ کر؟” به‌شار جافه‌ری گۆت، “ئه‌گه‌ر مه‌به‌ستا ته پرسا کوردی ل سووریێ یه، چ پرسه‌کا کوردی ل سووریێ نینه، پێکهاته‌یه‌که سووری یه کورد، د ناڤ جڤاکا خوه ده ئه‌م شانازیێ پێ دکن، ئه‌و به‌شه‌که ژ دیرۆک و جۆگرافیا مه ، سه‌رۆکۆمار ل سووریێ هه‌بوون ب ئه‌سلێ خوه کورد بوون، سه‌رۆکوه‌زیر ل سووریێ هه‌بوون ب ئه‌سلێ خوه کورد بوون، مامۆستایێن زانێنگه‌هێ و فه‌رماندارێن ئارتێش و پۆلیسان هه‌بوون ب ئه‌سلێ خوه کورد بوون.”
د ده‌واما به‌رسڤا خوه جافه‌ری گۆت، “پرسا کوردی ل سووریێ نینه، ل جه‌م وه ترکیێ پرسا کوردی هه‌یه ئه‌ڤ تشته‌کی دنه و نه گرێدایی سووریێ یه.”
ده‌ربارێ پرسا دیالۆگا د ناڤبه‌را ڕێڤه‌به‌ریا خوه‌سه‌ر و شامێ دا، نوونه‌رێ سووریێ گۆت، “دیالۆگ د ناڤبه‌را حکوومه‌تا سووریێ ل ئالیه‌کی دن و د ناڤ دا پێکهاته‌یا کورد دا تێ کرن، دیالۆگه‌که سووری -سووری یه ل شامێ تێ کرن، نه ل جنێڤ، نه ل نیۆیۆرک و نه ژی ل پایته‌خته‌که دن تێ کرن. ده‌ریێن شامێ ڤه‌کری نه، ده‌ریێن حکوومه‌تا سووریێ ژ بۆ هه‌ر که‌سێ د ئاڤاکرنا سبه‌رۆژا سووریێ دا به‌شدار ببه ڤه‌کری نه.”
“د داخویانیا هه‌ڤبه‌ش دا ته‌که‌زی ل سه‌ر وێ یه‌کێ هاته کرن، کو هه‌موو ئالی هه‌موو شێوه‌یێن ڕێڤه‌به‌ریا خوه‌سه‌ر ڕه‌د دکن، گه‌لۆ ئه‌ڤ هه‌لوه‌ستا فه‌رمی یا شامێ یا؟” جەعفه‌ری گۆت، “ئه‌ڤ ژی ئارمانجا سه‌ره‌که یا لدارخستنا کۆنگره‌یا سۆچیی بوو کو ب بریاره‌که گرینگ ده‌رکه‌ت، ئه‌و ژی ته‌ڤلیبوونا د ناڤ کۆمیته‌یا نڤیساندنا ده‌ستوور بوو. یێ کو د ڤێ ده‌ربارێ ده خوه‌دی نه‌رین به، دکاره ته‌ڤلی وێ ببه و د هه‌ر پرسه‌کێ ده نه‌رینا خوه پێشکێش بکه. لێ ئه‌ڤ کارووبارێ سووریێ و دڤێ هه‌موو ئالی فێر ببن، کو لگه‌ل بریایێ خوه یێ سووری دیالۆگێ بکن و نه لگه‌ل که‌سێن بیانی ل دژی برایێ خوه یێن سووری. به‌لێ داخویانیا ئیرۆ هه‌موو شێوه‌یێن ڕێڤه‌به‌ریێن خوه‌سه‌ر ڕه‌د کر، ژ به‌ر کو ئه‌ڤ شێوه‌یه‌که ژ شێوه‌یێن جوداخوازیێ یه، له‌وما چ جهێ چ داخوازه‌که جوداخوازیێ ل سه‌ر ل سووریێ نینه.”
به‌شار جەعفه‌ری گۆت ژی، “هه‌لوه‌ستا فه‌رمی ده‌ربارێ دیالۆگێ، هه‌لوه‌سته‌که فه‌رمی یه، وه‌که تو دزانی، جار جاران دیالۆگ تێ کرن، کو حکوومه‌تا سووریێ ژی هێڤی دکه، برایێن مه یێن کورد ڤه‌گه‌رن هه‌مبێزا ده‌وله‌تا سووریێ و خوه نه‌خن ناڤ عه‌ره‌به‌یا ئەمریکا کو ته‌نێ به‌رێ وان دده شکه‌ستێ.
