گه‌له‌ک جارا ده‌ما ئالیێن سیاسی دهێنە ره‌خنه‌کرن، به‌حسا پێدڤیا گوهه‌رتنان یان ژی نووکرنه‌کێ تێ کرن. پرانی ئه‌ڤ هه‌ر دو گۆتن ده‌ما ئالیێن سیاسی دکه‌ڤن ده‌راڤک ته‌نگ دا دکه‌ڤنه د رۆژه‌ڤێ دا و دهێنە گۆتوبێژکرن.
ل باکورێ کوردستانێ ته‌ڤگه‌را ئازادیخوازا کورد د پێڤاژۆیه‌ک دژوار را ده‌رباس دبه، گه‌لۆ ل ڤێ ده‌رێ تشتا کو مرۆڤ نابینه و چو جارا نایێ نرخاندن چیه؟ ئه‌ڤ خال گه‌له‌ک گرنگه و دڤێ ژ ڤێ خالا ڤه‌شارتی و یا ناکەڤە د رۆژه‌ڤا سیاسی دا، گۆتوبێژ بێنه ده‌ستپێکرن.
ده‌ما ل باکورێ وه‌لات به‌حسا ته‌ڤگه‌را ئازادیخوازا کوردستانێ تێ کرن، ته‌نێ رێخستنێن سیاسی، پارتییێن کوردا یان ژی ئالیێن کو ل سه‌ر ناڤێ کوردان ته‌ڤدگه‌رن تێنه نرخاندن. لێ د ڤێ مژارێ دا پێدڤیە به‌حسا ته‌ڤاهیا کوردان بێ کرن. ئه‌ڤ یه‌ک گه‌له‌ک ب زانه‌بوون ناهێلن بکه‌ڤه رۆژه‌ڤێ. ژ به‌ر کو، پەکەکێ چارچۆڤه‌یەک سیاسی پێکئانیه و مخابن هه‌رکه‌س د ڤێ چارچۆڤه‌یێ دا نرخاندنا دکه، هه‌تا ره‌خنه‌کرنا پەکەکێ ب خوه ژی د ڤێ چارچۆڤه‌یێ دا تێ گۆتوبێژ کرن. سیاسه‌تا کو، پەکەکێ ئافراندیە دو ئالی په‌یدا کرنه. ل گۆرا وان یان دڤێ تو پشگرێ پەکەکێ بی، یان ژی تو خاینی.
پەکەەک و پارتیێن کو د قادا له‌گال دا چێکرین باندۆرا وان ل سه‌ر کوردا گه‌له‌ک هه‌یه. پرانیا ده‌زگه‌هێن سڤیل د کۆنترۆلا وان دا دخه‌بتن. یانی ب کورتی هه‌گه‌مۆنیا پەەککێ هه‌یه و ئه‌ڤ یه‌ک دبه ئەگەر کو، کورد نکارن ل سه‌ر خه‌ته‌ک نه‌ته‌وی پێشییا خوه ببینن و هه‌ستێن نه‌ته‌وی ئالۆز دبن.
پارتی و رێخستنێن ژ ده‌رڤه‌یێ پەکەکێ ژی، د ته‌ڤگه‌را خوه دا نه گه‌له‌ک ئازادن و پرانیا وان ژ بۆ ده‌ستخستنا پەرله‌مه‌نته‌ره‌کی یان ژی سه‌رۆکاتیا شه‌ره‌داریه‌کێ خوه نێزکی سیاسه‌تا پەکەکێ دکن. پارتیه‌ک یان ژی ئالیه‌ک کو، هه‌ولبده خوه نێزکی سیاسه‌تا پەکەکێ نه‌که ژی گه‌له‌ک بێ باندۆر دمینه و پێشڤه ناچه.
پێدڤیە ل باکورێ کوردستانێ کار و خه‌باته‌کا به‌ربچاڤ بێ کرن داکو هه‌ستا نه‌ته‌وی پێشبکه‌ڤه. گه‌ره‌ک ژ بۆ کوردا نه‌ته‌ویه‌ت ل پێشییا هه‌موو جوره‌یێن ئیدیۆلۆژیک به.
ده‌ما سیاسه‌ت پێشیا خوه نه‌بینه ژ بۆ چاره‌سه‌ریێ و دخەتمە، پرانی به‌حسا نووکرن و گوهه‌رتنێ تێ کرن. چو جارا گوهه‌رتن یان ژی نووکرنا شه‌کلی رێیا سیاسه‌تا کو خه‌تمیە ڤه‌ناکه. تەنێ وه‌ک ده‌مکی ممکنه رحه‌تیه‌کێ په‌یدا بکه.
پێوسته ڤێجا ل باکورێ کوردستانێ مرۆڤ پێشیا خوه ببینه و خه‌له‌کا زنجیرا کو ل پێشیا سیاسه‌تێ گرتی و ناهێله هه‌ستا نه‌ته‌وی پێشبکه‌ڤه بێ شکێناندن. ڤێجا ژ بۆ ڤێ ژی گه‌ره‌ک مرۆڤ به‌رێ خوه بده جڤاتا کورد ب خوه، ره‌وشا هه‌یی و ته‌خریباتێن د جڤاکێ دا ب ناڤێ کورده‌یاتیێ هاتین کرن باش بێن دیتن.
گوهه‌رتن و نووکرن د زهنیه‌تێ دا تێ کرن، گوهه‌رتنا که‌سان و نووکرنا شیعاران تشته‌کی ل گه‌ل خوه ناینه. گه‌ره‌ک خه‌تماندنا کو د رێیا سیاسه‌تێ دا هه‌یی باش بێ دیتن و بێ ڤه‌کرن کو، هه‌ر تشت ب ئاوایێ پێویست بکاربه د رێیا خوه دا هه‌ره و ئاڤ بهه‌رکه.
ژ بۆ ڤێ ژی تشتا کو بێ کرن هێسانە، مرۆڤ سه‌رێ خوه هلده و به‌رێ خوه بده جڤاکا کورد و ل گۆرا ڤێ نرخاندن و شرۆڤه‌یا بکه، دێ راستیا هه‌یی بێ دیتن و هه‌روه‌ها دێ مرۆڤ بزانبه چ پێویسته بێ کرن.
به‌لکی ژی، کێماسیا مه یا مه‌زن ئه‌وه کو، که‌سایه‌ت و ره‌وشه‌نبیرێن هوورگلیێن قۆناخا کو ئه‌م تێرا ده‌رباس دبن ببینن گه‌له‌ک کێمن و یێن تێدگەهن ژی خوه دانه ئالیه‌کی و ژ دوورڤه پرسگرێکان دنرخینن و خوه نێزکی روحێ ته‌ڤگه‌رێ ناکن.
دارا بیله‌ک
15.07.2023
