نێچرڤان بارزانی: ئالایێ كوردستانێ ناسنامە و یەكگرتنا گەلێ کوردستانێ یە
نێچیرڤان بارزانی، سهرۆکێ ههرێما کوردستانێ، ۆژا چارشهمێ، ۱۷/۱۲/۲۰۲٥ ێ، بهشداری مهراسیما پیرۆزكرنا رۆژا ئالایێ کوردستانێ کر کو ل سهرۆکایهتیا ههرێما کوردستانێ هاته لدارخستن.
د ڕێورهسمێ دا سهرۆک نێچیرڤان بارزانی ئاخافتنهک پێشکێش کر، ئهڤ ژی ناڤهرۆکا وێ یه:
وهلاتیێن هێژا،
مالباتێن سهربلند یێن شههیدان،
پێشمهرگهی ێن قههرهمان،
ڕۆژا ئالایێ کوردستانێ ل وه ههموویان پیرۆز به.
ئیرۆ کو ئهم ڕۆژا ئالایێ کوردستانێ ب بیر تینن، تهنێ ببیرانینا ڕۆژهکێ د سالنامهیێ دا نینه؛ بهلکو ئیرۆ نووکرنا پهیمانێ یه ژ بۆ وی سهمبۆلێ کو ناسنامهیا ههبوون، دیرۆک، خهبات و هێڤیێن مه یێن ژ بۆ ئازادی و ژیانهكا سهربلند دیار دکه.
ئالایێ کوردستانێ، ناسنامه و یهکگرتنا گهلێ کوردستانێ و بیرانینهک زندی یه. ئهڤ ئالا شاهدێ ڕێیهکا درێژ یا بهفێرههی و بهرخوهدانا گهلێ مه یه. د ڕۆژێن دژوار یێن خهباتێ دا، ل سهر لووتکهیێن چیایان و د ناڤا باژار و گوندان دا، زارۆکێن وه ئهڤ ئالا بلند ڕاگرتن و ب خوینا خوه، ب خهباتا خوه، پاراستنا مافێ ههبوون و ژیانا گهلێ خوه کرن.
ئیرۆ ب شانازی ڤه ئهم دبینن کو ئهڤ ئالا ل سهر سازیێن ههرێما کوردستانێ، ل خوهندنگهه و زانینگههان، ل نهخوهشخانه و ناڤهندان بلند دبه. ئهڤ دهلیلێ وێ سهرکهتنێ یه کو ب خوینا شههیدان و قوربانیدانا پێشمهرگه و بهرخوهدانا گهلێ کوردستانێ ب ههموو پێکهاتێەین خوه ڤه، ب دهست هاتیه.
کوردستانیێن عهزیز،
د ڕۆژا ئالایێ دا، پهیاما مه زهلاله: هێزا ڕاستین یا کوردستانێ د ههڤگرتن و یهکرێزیا مه دا یه. ئهڤ ئالا مه ههموویان دجڤینه، ب جوداهیێن ڕامانێن سیاسی، ئۆلی و نهتهوهیی ڤه. د بن سیوانا ڤێ ئالایێ دا، دڤێ ئهم ههموو مل ب مل بخهبتن ژ بۆ کوردستانهکه ئارام ژ بۆ ههموو نهتهوه و ئۆل و پێکهاتەێن کوردستانێ، دادپهروهرتر و بهێزتر ل ههمبهری ئاستهنگیان.
وهفاداریا ڕاستین ژ بۆ خوینا شههیدان و قوربانیێن گهلێ کوردستانێ تهنێ ب درووشمان نابه، بهلکو ب پاراستنا دهستکهفتیان، ب بجهانینا سهروهریا یاسایێ، ب ئاڤاکرنا سازیێن بهێز و ب خزمهتکرنا باشتر ژ وهلاتیێن ههرێما کوردستانێ را دبه.
جوانێن هێژا یێن کوردستانێ،
ئالایێ کوردستانێ نه تهنێ سهمبۆلا ڕابووری یه، بهلکو ئالایێ پاشهرۆژێ یه. ئهڤ پهیاما هێڤی و ئارمانجێ یه ژ بۆ وه. وهلات پێویستی ب زانست، ئهنهرژی، داهێنهری و خهونا وه ههیه. کوردستان ب زانست و زانینێ، ب خهبات و ههولدانێ، ب ئابۆریهكا بهێز و ب ئاشتیێ تێ ئاڤاکرن.
دهما کو ئهم ب شانازیێ ڤه ئالا خوه بلند دکن، د ههمان دهمێ ده ئهم پێداگریا خوه ب ههڤپشكییا دهستووری د ئیراقهک فهدهرال و دهمۆکراتیک دا دوباره دکن. ئهم دخوازن ئهڤ ئالا ههر دهم پهیاما ئاشتی، دیالۆگ، پێکڤهژیان و جیرانتیا باش بگەهینه. کوردستان وهکه ههردهم دێ ببه فاکتۆرا ئارامی و پرا ل ههڤ تێگهشتنێ.
د ڤێ ڕۆژا پیرۆز دا، ئهم بەژنا خوە ل ههمبهر شههیدێن کوردستانێ دچەمینن کو ئهڤ ئالا ب خوینا خوه نهخشاندنه.
سلاڤ، ڕێز و قهدرگرتن ژ پێشمهرگه یێن مه یێن قههرهمان را کو پارێزڤانێن ڤێ ئاخێ و ڤێ ئالایێ نه.
ئهم سۆزێ ددن کو ئهم دێ ههر دهم پارێزڤانێن یهکرێزی و دهستکهفتیێن خوه بن و ئالایی کوردستانێ ب بلندی ڕابگرن.
ههر بلند به ئالایێ پیرۆز یێ کوردستانێ.
گهلهک سپاس.