پێشنیڤڕۆیا ئەڤڕۆ چارشەمبێ 2026/3/25، پشتی پشکداریکرنێ د پرسەیا شەهیدێن پێشمەرگە دا، ئەوێن د هێرشا مووشەکییا بەرەسپێدەهیا دوهی یا هێزێن ئیرانێ دا شەهید بووین، رێزدار نێچیرڤان بارزانی، سەرۆکێ هەرێما کوردستانێ د داخویانیەك دا رۆژنامەڤانان.
ل دەستپێکێ وی گۆت: “بەری هەر تشتێ ئەز دخوازم سەرەخۆشیێن خۆ ئاراستەی بنەمالێن شەهیدان بکەم و هیڤیا چاکبوونێ بۆ برینداران دخوازم. ب راستی بوویەرەكا گەلەک خەمگین بوو. ئەز دكارم بێژم کو ئێکسەر پشتی بوویەرێ مە پەیوەندی ب کۆمارا ئیسلامیا ئیرانێ كر. ئەو دان ب وێ چەندێ دكن کو شاشیەک هاتیە کرن و پەیمان دایە کو ڤەکۆلینێ ل سەر ڤی بوویەرێ بکن. هەروەسا هەڤخەمی و پەیامێن سەرەخۆشیێ بۆ هەرێما کوردستانێ هنارتینە. نوکە ئەم ل بەندا هندێ نە بزانین بەرسڤا کۆمارا ئیسلامیا ئیرانێ بۆ هەرێما کوردستانێ دێ چ بە.”
بێگۆمان مە ژ لایێ خۆ ڤە بەری نوکە ب توندی ئەڤ هێرشە ل سەر هەرێما کوردستانێ شەرمزار کریە، چونکی سیاسەتا هەرێما کوردستانێ یا زەلالە؛ ئەم فاکتەرێ ئارامی و سەقامگیریێ نە د دەڤەرێ دا. مە بەردەوام دوپات کریه کو ئەم نابنە چافكانییا گەفێ بۆ سەر چو وەلاتێن جیران، ب تایبەت کۆمارا ئیسلامیا ئیرانێ كو ئئك ژ جیرانێن مە یە. هەر ئەو سیاسەتە ژی مە ژ دەستپێکا جەنگی پێڕەو کریە. ئەم نەبووینە پشکەک ژ وی جەنگی و نابینە پشکەک ژێ. هیڤیا مە ئەوە کو کۆمارا ئیسلامیا ئیرانێ ڤەکۆلینەکا تمام بکەت و هەرێما کوردستانێ ژ ئەنجامێن وێ ئاگەهدار بکەت.”
پاشی د بەرسڤا پسیارەکێ دا دەربارەی بەرپرسیارەتیا حکومەتا فەدەرال یا عێراقێ بەرامبەر وان هێرشێن دهێنە سەر هەرێما کوردستانێ، سەرۆک نێچیرڤان بارزانی راگەهاند: “پێدڤییه حکومەتا عێراقێ دەسهەلاتێن خوە وەک وەلاتەکێ خودان سەروەری بكاربینە. ل دەستپێکێ دڤێت ئەو هێرشە بهێنە راگرتن یێن کو ژ لایێ گروپێن ژیاسادەرچوویی ڤە دهێنە سەر هەرێما کوردستانێ. ئەڤە ئەرکێ حکومەتا فەدەرالی یا عێراقێ یە و پێدڤییه جێبەجێ بکەت.”
د بەرسڤا پسیارەکا دی دا، سەرۆکێ هەرێما کوردستانێ ئاشکرا کر: “ئەم نەبووینە پشکەک ژ جەنگی و نابینە پشکەک ژێ، و هیڤیدارین چو تشتێن دی روونەدەن.” هەروەسا گۆت: “ل ناڤخوەیا عێراقێ هێرش دهێنە سەر هێزێن ئەمنی یێن عێراقێ ژی، نەک بتنێ ل هەرێما کوردستانێ، لێ بێگۆمان پێدڤییه سنوورەک بۆ وان کەس و لایەنان بهێتە دانان یێن کو ژ یاسایێ دەرکەفتین.”
