ئەڤرۆ (٢٠٢٦/٣/٥) ئەم ب رێز و حورمەت ڤە بیرئانینا ٣٥ سالیا سەرهلدانا مەزن یا ئادارا ١٩٩١ێ دکین. ب ڤێ هەلکەفتێ، ئەز پیروزباهیێن گەرم پێشکێشی مالباتێن سەربلندێن شەهیدان، پێشمەرگێن قەهرەمان و هەموو کوردستانیێن ل ناڤخوە و دەرڤەی وەلاتی دکم. سلاو و رێز بۆ گیانێ پاقژێ شەهیدێن سەرهلدانێ و هەموو شەهیدێن کوردستانێ بن.
سەرهلدان وەرچەرخانەکا دیرۆکی و بەرسڤەکا ئێکلاکەر یا گەلێ کوردستانێ بوو د رەتکرنا زۆلم و زۆرداریێ دا و پێنگاڤەک بەر ب ئازادی و سەرکەفتنێ بوو. ئەڤ بیرئانینا پیرۆز د دەمەکێ دایە کو هەرێم د رەوشەکا ئالۆز و هەستیار دا دەرباز دبت. زێدەبوونا ئالۆزیان و ئەنجامێن نەرێنی یێن ناکۆکیان، بەرپرسایەتیەکا مەزن دئێخیتە سەر ملێن مە هەموویان بۆ پاراستنا ئارامی و ئەولەهیا هەرێما کوردستانێ.
د ڤێ بیرئانینێ دا، ئەم جارەکا دی تەکەز دکەین کو هەرێما کوردستانێ، وەکی هەر دەم، دێ بیتە فاکتەرەکێ سەرەکی یێ ئارامی و ئاشتیێ و نابیتە پشکەک ژ چ ناکۆکی و پێشوەچوونەکا لەشکری کو زیانێ بگەهینیتە ژیان و ئەولەهیا وەلاتیێن مە. پاراستنا کیان و قەوارێ هەرێما کوردستانێ و دەستکەفتێن مە یێن دەستووری، بتنێ ب ئێکڕێزی، تەبایی و بەرپرسایەتیا هەڤپشک یا نەتەوەیی یا هەمی هێز و ئالیێن سیاسی و پێکهاتێن کوردستانێ دبت.
بلا ئەڤ بیرئانینە مە هان بدت و هاندەر بت بۆ دەربازکرنا کێشە و ئاریشان و کوورکرنا کلتوورێ پێکڤەژیانێ و لێبۆرینێ. وەفاداری بۆ خوینا شەهیدان ئەوە کو ئەم ب هەڤرا و دەست د دەستێ ئێک دا؛ بۆ پاراستنا ئەولەهیێ و ئاڤاکرنا پاشەڕۆژەکا باشتر بۆ نەوەیێن مە یێن داهاتی کار بکین.
سلاو بۆ بیرئانینا سەرهلدانێ.
ئارامی و ئەولەهی بۆ کوردستانێ.
نێچیرڤان بارزانی
سەرۆکێ هەرێما کوردستانێ
٢٠٢٦/٣/٥
