جه‌ژنا نه‌ورۆزا نه‌ته‌وه‌یی و سه‌رسالا نوو یا کوردی ل ته‌ڤایا نه‌ته‌وه‌یا کورد و هه‌ر کورده‌ک ل هه‌ر جهێ جیهانێ به، هه‌روەها ل ته‌ڤایا گه‌لێ کوردستانێ ب هه‌موو پێکهاته‌یان ڤه پیرۆز دکم. ب گه‌رمی پیرۆزباهیێ ل مالباتێن سه‌ربلند یێن شه‌هیدان، ل پێشمه‌رگه یێن قه‌هره‌مان و هێزێن ئه‌وله‌کاریێ دکم، هێڤیدارم ته‌ڤ ڤێ جه‌ژنێ ب خوه‌ش و ئارام ده‌رباس بکن و جه‌ژنا دلشادی و ئارامیێ به.
نه‌ورۆز سه‌مبۆلا ئازادی، نووبوون و ڤه‌ژینێ یه، جه‌ژنا هێڤی، ئیراده، ڕابوون، به‌رخوه‌دان و نێرینا ژ بۆ پاشه‌رۆژه‌کا چێتره. هه‌ر وه‌کی چاوا مه‌شخه‌لا نه‌ورۆزێ ب درێژاهیا دیرۆکێ چاڤکانیا ئیلهامێ بوویه ژ بۆ گه‌لێ کوردستانێ، ئیرۆ ژی بانگه‌کا نوو یه ژ بۆ یه‌کرێزی، هه‌ڤفێمکرن و هه‌ڤکاریێ ژ بۆنا پاراستنا ماف و ده‌ستکه‌فتیێن ده‌ستووری و فه‌ده‌رالی و قه‌واره‌یا سیاسی یا هه‌رێما کوردستانێ.
جەژنا نەورۆزێ د دەمکێ دا تێ کو ناڤچە و جیهان دی رەوشەکا هەستیار دا دەرباس دبن. دەرباسکرکنا وان ئاستەنگێن رووبروویێ مە دبن ب سەرکەفتیانە پێدڤی ب کارێ هەڤبەش، دیالۆگا ئاڤاکەر د ناڤبەرا ئالییێن سیاسی و پێکهاتەیان ل ناڤخوەیا هەرێما کوردستانێ و دگەلبەغدایێ ژ بۆنا دلرەحەتبوون ژ ئارامی و بهێزکرنا دەمۆکراسی و دادپەروەری و مافێن مرۆڤی هەیە.
ئاشتی و ئاشتیخوازی ژ بۆ کورد و گه‌لێ کوردستانێ مه‌زنترین هێز و باشترین ڕێبازه. ژ به‌ر ڤێ یه‌کێ، ئه‌ز داخوازێ ژ کورد و کوردستانیان دکم کو باوه‌ری و ڕێبازا ئاشتیخوازی یا خوه خورتتر بکن. داخوازێن گه‌لێ کوردستانێ پر زه‌لالن، ئاشتی زه‌مینه‌یه‌ک پر باش چێ دکه ژ بۆ زه‌لالبوونا ڤان داخوازان. ئاشتیخوازی، پرسا کوردی ل جیهانێ بێتر پێش دا دبه. نها پێله‌ک به‌ر ب چێکرنا ئاشتیێ د سیاسه‌تا جیهانێ دا هه‌یه، د به‌رژه‌وه‌ندیا گه‌لێ کوردستانێ دا یه کو وه‌کی گه‌له‌کی ئاشتیخواز ب ڤێ پێلێ را به.
ل هه‌رێما کوردستانێ باوه‌ریا مه ب چاند و نرخێن ژیانا ئاشتیانه، لێبۆرین و هه‌ڤقه‌بوولکرنێ هه‌یه. هه‌رێما کوردستانێ وه‌ک هه‌رتم دێ فاکتۆرێ ئارامی و ته‌ناهیێ ل هه‌رێمێ بمینه و ده‌ستێ دۆستانی و هه‌ڤکاریێ درێژی هه‌موو پێکهاته‌یێن ئیراقێ و وه‌لاتێن هه‌رێمێ و جیهانێ دکه، ژ بۆ پاشه‌رۆژه‌کێ کو تێ دا ئاشتی، ئارامی و پێشڤه‌چووین ژ بۆ هه‌موویان ببه سه‌روه‌ری و ژیان، ڕوومه‌ت و مافێن هه‌موویان بێنه پاراستن.
دەربارێ تێکلیا مه ب حکوومه‌تا فه‌ده‌رال یا ئیراقێ را، جاره‌که دن ئه‌م پێگیریا خوه ب ده‌ستوورێ وه‌ک بنگه‌هه‌ک ژ بۆ چاره‌سه‌رکرنا هه‌موو ناکۆکیان ب ڕێیا دیالۆگ و هه‌ڤفێمکرنا هه‌ڤبه‌ش ته‌که‌ز دکن. ئارامی، گه‌شبوون و پێشکه‌تنا ئیراقێ ب ڕێزگرتنا ل مافێن ده‌ستووری یێن هه‌موو پێکهاته‌یان و بجهکرنا ڕاستینه یا سیسته‌ما فه‌ده‌رالیێ ڤه گرێدایی یه.
ئه‌م ژ نێزیک ڤه هایداری زه‌حمه‌تیان و ڕه‌وشا ژیان و ده‌بارا هه‌موه‌لاتیێن کوردستانێ نه. ئه‌م ته‌که‌ز دکن کو باشترکرنا ڕه‌وشا ژیانا وان کارێ پێشینه یێ سه‌ره‌که یێ هه‌موو ده‌زگه‌هێن هه‌رێما کوردستانێ یه.
ب هاتنا نه‌ورۆزێ را، ئه‌م هێڤیان نوو دکن کو ئه‌ڤ زه‌حمه‌تی دێ ده‌رباس ببن، ئه‌م ڕاده‌ست نابن و ب هێڤی و باوه‌ری به‌ر ب پاشه‌رۆژه‌کا چێتر ڤه گاڤ داڤێژن.
نه‌ورۆز ل هه‌موو گه‌ل و وه‌لاتێن کو ڤێ بیرانینێ پیرۆز دکن پیرۆز به.
هه‌ر سال ب خوه‌شی.
نێچیرڤان بارزانی
سه‌رۆکێ هه‌رێما کوردستانێ
۲۰/۳/۲۰۲٥
