برێز نێچیرڤان بارزانی سه‌رۆکێ هه‌رێما کوردستانێ و برێز شێخ جه‌فه‌ر شێخ مسته‌فا جیگرێ سه‌رۆکێ هه‌رێما کوردستانێ د مه‌راسیمه‌کێ دا ل ئاڤاهیا سه‌رۆکاتیا هه‌رێما کوردستانێ ئالا کوردستانێ هلدا. پشترا ژی سه‌رۆکێ هه‌رێما کوردستانێ ب ڤێ مناسه‌به‌تێ گۆتاره‌ک پێشکێش کر:
که‌سووکارێن سه‌ربلند یێن شه‌هیدان،
پێشمه‌رگه یێن قه‌هره‌مان،
هێزێن ناڤخوه یێن دلسۆز،
کوردستانیێن هێژا.
ڕۆژ باش،
ڕۆژا ئالا کوردستانێ پیرۆز به.
ئیرۆ (١٧\١٢\٢٠٢٤) دگه‌ل جیگرێ سه‌رۆکێ هه‌رێما کوردستانێ برێز شێخ جعفه‌ر، ئه‌م ب کێفخوه‌شی به‌شداری ڤێ مه‌راسما بیرانینا ڕۆژا ئالا کوردستانێ دبن.. ئه‌ڤ مناسبه ژ بۆ کوردستانیان ڕۆژه‌کا بلند و پیرۆزه. د ڤێ ڕۆژێ دا ئه‌م حورمه‌تێ ل سه‌مبۆله‌کا زندی یا کو ناسنامه و ڕوومه‌تا وه‌لاتێ مه نیشان دده دگرن و ته‌ڤی جوداهیێن مه، مه هه‌موویان دگەهینه هه‌ڤ و ژ بۆ ئارمانجه‌که پیرۆز مه دکه یه‌ک.
ئه‌ڤ ئالا کو ب ڕه‌نگێن خوه یێن گه‌ش و سپه‌هی و ب تاڤا خوه یا زێرین، په‌یاما تێکۆشین و داخوازێن گه‌لێ کوردستانێ ب هه‌موو پێکهاته‌یێن ڤه ڤه‌دحه‌وینه، وه‌لات، ڕوومه‌ت، یه‌کیتی و چاره‌نووسا هه‌ڤپار یا هه‌موو کوردان ئیفاده دکه.
ده‌ما ئه‌م ل ئالا خوه دنێرن، ئه‌م که‌د و فه‌ده‌کاری، ڕوومه‌ت و سه‌ربلندی، ئازادی و ئاشتی، نووبوون و ئاڤاده‌نی، هێڤی و تێکۆشینا هه‌ڤپار یا گه‌لێ کوردستانێ ب هه‌موو پێکهاته‌یان ڤه دبینن.
ئالا کوردستانێ ل سه‌ر ده‌ستێن دلسۆز ل هه‌مبه‌ر هه‌موو زه‌حمه‌تی و ئاسته‌نگیان خوه‌راگر بوویه، ژ به‌ر وێ ژی گه‌ل و وه‌لاتێ مه ب هێڤی و باوه‌ری به‌ر ب پاشه‌رۆژه‌که گه‌ش ڤه پێنگاڤان داڤێژه.
کوردستانیێن هێژا
ئه‌م ئیسال د ڕه‌وشه‌ک هه‌ستیار و نازک یا هه‌رێمی دا، ئالا کوردستانێ ب بیر تینن. باندۆر و ئه‌نجامێن ناکۆکی و بوویه‌ران ل سه‌ر ئاشتی و ئارامیێ بوویه جهێ نیگه‌رانیه‌ک مه‌زن. له‌وما ئه‌رک و به‌رپرسیاریا مه هه‌موویانه کو ژ بۆ پاراستنا ئاشتی و ئارامیێ بخه‌بتن کو ژ بۆ هه‌رێمێ پێدڤه‌یه‌کا سه‌ره‌کی یه.
ئه‌م ل هه‌رێما کوردستانێ پابه‌ندن ب به‌رده‌وامی دگه‌ل هه‌موو ئالیێن پەیوه‌ندیدار یێن ئیراق، ناڤچه‌یێ و وه‌لاتێن جیهانێ ڕا کار بکن ژ بۆ کێمکرنا ئالۆزیان. ئه‌م دێ ب هه‌ڤ ڕا ژ بۆ خورتکرنا دیالۆگێ و لێگه‌رینا چاره‌سه‌ریه‌کا ئاشتیانه کو، مافێن هه‌موویان بپارێزه و پاشه‌رۆژه‌که ئارام و سته‌بیل ژ گه‌لێن ناڤچه‌یێ ڕا مسۆگه‌ر بکه، بخه‌بتن. ئه‌زموونا کوردستانێ یا د وارێ پێکڤه‌ژیانا ئاشتیانه دکاره ببه میناکه‌ک ژ بۆ ده‌رباسکرنا قه‌یرانان و بده‌ستخستنا ئاشتیێ.
ئیرۆ ده‌ما ئالا کوردستانێ ل سه‌ر مه دادکه‌ڤه، یه‌کتیا مه نیشان دده. هه‌ڤگرتنا هه‌موو ئالیێن سیاسی و پێکهاته‌یێن کوردستانێ ب تایبه‌تی د ڕه‌وشا نها یا ناڤچه‌یێ دا هێز و کلیتا ئارامیا هه‌رێما کوردستانێ یه. له‌وما دڤێ ئه‌م هه‌موو ب هه‌ڤ ڕا ته‌ڤبگه‌رن و به‌رژه‌وه‌ندیێن بلند یێن گه‌لێ خوه د سه‌ر هه‌ر تشتی ڕا ده‌ینن.
ب ڤێ مناسه‌به‌تێ ئه‌م ته‌که‌زیێ ل سه‌ر گرنگی و پێویستیا بله‌زکرنا پێکانینا کابینه‌یا نوو یا حکومه‌تا هه‌رێما کوردستانێ دکن و تێگهەشتنه‌ک د ناڤبه‌را ئالیێن سیاسی دا هه‌یه کو دڤێ د زووترین ده‌م دا ڤێ ئه‌رکێ ب جهبینن. ل ئیراقێ ئه‌م ئاماده نه ب حکومه‌تا فه‌ده‌رال ڕا هه‌ڤکاریێ بکن دا کو پرسگرێکان ب دیالۆگ و ژهه‌ڤتێگەهشتنێ چاره‌سه‌ر بکن. .
گه‌لێ کوردستانێ یێ هێژا
ئالا کوردستانێ نرخێن مه یێن هه‌ڤپار یێن کو، نێرین و سیاسه‌تا مه ژ بۆ ئاڤاکرنا جڤاکه‌ک سڤیل یا بهێز و یه‌کگرتی نیشان دده.
ژ به‌ر ڤێ یه‌کێ، د ڤێ هه‌لکه‌فتا پیرۆز دا، ئه‌م وه‌لاتیێن هێژا یێن کوردستانێ و پێکهاته‌یێن هه‌رێما کوردستانێ دلنیا دکن کو، ئه‌م دێ به‌رده‌وام بن ل سه‌ر بهێزکرنا پێکڤه‌ژیانا ئاشتیانه، ژ به‌ر کو ب باوه‌ریا مه دیالۆگ و ڕێزگرتن ل پێکهاته‌یێن جڤاکێ بنگه‌ها ئارامیا وه‌لاتن.
ئه‌م ل سه‌ر پاراستنا چاندا ژیانا هه‌ڤبه‌ش، پر ئۆلی و پرنه‌ته‌وه‌یی پابه‌ندن. ئه‌ڤ ژی چاڤکانیا هێز، به‌ده‌وی و سه‌ربلندیا گه‌لێ کوردستانێ یه. وه‌که هه‌ر جار ئه‌م دێ پشته‌ڤانیا پاراستنا ناسنامه‌یا هه‌موو پێکهاته‌یێن هه‌رێما کوردستانێ بکن.
ئه‌م دێ ژ بۆ پاراستنا ئازادی، مافێن مرۆڤان، وه‌کهه‌ڤی و عه‌داله‌تێ کو، پره‌نسیبێن بنگه‌هین یێن ئاڤاکرنا هه‌ر جڤاکه‌ک پێشکه‌تی نه، بخه‌بتن. هه‌ر وها خورتکرنا سازیان و مسۆگه‌رکرنا ته‌ڤلیبوونا ب باندۆر یا پێکهاته‌یان د هه‌موو قادێن ژیانێ دا ئارمانجا مه یه.
ئه‌م ده‌ست ژێ به‌رنادن و ئه‌م دێ به‌رده‌وام بن ل سه‌ر خه‌باتێن خوه یێن ژ بۆنا چاره‌سه‌رکرنا پرسگرێکان ب ڕێیا دیالۆگێ، ژ به‌ر کو ئه‌ڤ ڕێیا مه یا ئێکانه یه ژ بۆ ژناڤبرنا ناکۆکیان و بهێزکرنا هه‌ڤگرتن و پێکڤه‌ژیانێ دگه‌ل بهێزکرنا هه‌ڤکاریێن ناڤچه‌یی و ناڤده‌وله‌تی ژ بۆ نیشاندانا کوردستانێ میناکا ئاشتی، پێشکه‌تن، بهه‌ڤره‌ژیان و ئارامیێ.
وه‌لاتیێن هێژا یێن کوردستانێ،
ته‌ڤی هه‌موو پرسگرێک و ئالۆزیێن ل هه‌رێمێ هه‌نه، ئه‌م د وێ باوه‌ریێ دا نه کو ب ئیراده و هێزا خوه یا یه‌کگرتی ژ بۆ ده‌رباسکرنا ناکۆکیان، ئه‌م دکارن ببن به‌شه‌ک ژ چاره‌سه‌ریێ، نه به‌شه‌ک ژ پرسگرێکان. وه‌رن ئه‌م ب هه‌ڤ ڕا کار بکن ژ بۆ پاراستنا ئاشتیێ و ببن میناکه‌ک ژ بۆ ئاڤاکرنا ئارامی و هه‌ڤکاریا هه‌ڤبه‌ش.
وه‌رن ئه‌م ئالا کوردستانێ بلند بکن و په‌یمانا خوه نوو بکن کو ئه‌م دێ ڕێیا خوه به‌ر ب پاشه‌رۆژه‌ک گه‌شتر به‌رده‌وام بکن. پاشه‌رۆژه‌ک کو هه‌رێما کوردستانێ تێدێ ببه هێڤی د ناڤچه‌یێ دا.
هه‌ر بلند و پیرۆز بە ئالا کوردستانێ.
سلاڤ ل سه‌ر گیانێ شه‌هیدان به. ئه‌م به‌ژنا خوه ل به‌ر وان دته‌وینن و بیرانینا وان هه‌ر ده‌م ب خێر به.
ئه‌ز ژ وه ته‌ڤان ڕا ڕۆژه‌کا خوه‌ش دخوازم، جاره‌که دن ڤێ ڕۆژا پیرۆز، ڕۆژا ئالا کوردستانێ، ل هه‌موو کوردستانیان پیرۆز دکم.
گه‌له‌ک سپاس..
