برێز نێچیرڤان بارزانی سه‌رۆکێ هه‌رێما کوردستانێ، پشتی نیڤرۆیا ڕۆژا شه‌میێ ١٦\١١\٢٠٢٤ێ ل باژارێ سلێمانیێ، به‌شداری مه‌راسما ده‌رچوونا چاره‌مین ده‌ورا په‌روه‌رده‌یا ئه‌فسه‌ری ل کۆلێژا له‌شکه‌ری یا قه‌لاچۆلانێ بوو.
د مه‌راسیمێ دا سه‌رۆک نێچیرڤان بارزانی گۆتاره‌ک پێشکێش کر:
ده‌رچوویێن هێژا،
دێ و باڤ و خزمێن هێژا یێن ده‌رچوویان،
به‌شدارێن هێژا..
ڕۆژ باش.
هه‌موو ئالی ب خێر بێن بۆ مه‌راسیما ده‌رچوونا ده‌ورا چاره‌مین یا ڕاهێنانا ئه‌فسه‌ری ل کۆلێژا له‌شکه‌ری یا قه‌لاچۆلان.
ب خێرهاتنا شاناز خان، خانما یه‌که‌م یا ئیراقێ، دکم کو دگەل مە به‌شداری ڤێ مه‌راسمێ دبه.
ژ بۆ مه هه‌موویان جهێ شانازی و که‌یفخوه‌شی یه کو ب سایا ڤێ سازیا پێشکه‌فتی یا له‌شکه‌ری، ئه‌م به‌شداریێ د مه‌راسما ده‌رچوونا گرۆپه‌ک نوو یا به‌ره‌ڤانێن وه‌لات و به‌شه‌کا گرنگ و سه‌ره‌کی ژ داهێنه‌رێن پاشه‌رۆژا گه‌ش یا کوردستان و ئیراقێ دا دکین. ئیرۆ ڕۆژه‌کا تایبه‌ته بۆ هه‌رێما کوردستان و ئیراقێ، کو ئه‌م به‌رهه‌ما که‌دا مه‌زن یا ده‌رچوو و مامۆستایان دبینن.
ئه‌ز گه‌له‌ک دلشا مه کو (۷٦۹) خۆرتێن وه‌لاتێ مه، ب ڕووتینه‌که نوو، چه‌کدار ب زانیاری و دیسیپلینا له‌شکه‌ری ژ ڤێ کۆلێژا له‌شکه‌ری یا ژێهاتی ده‌رچوون. یا کو ژ بۆ مه هه‌موویان خوه‌شتر و سه‌ربلندتره ئه‌ڤه کو ٤۸ ژ ده‌رچوویان کو ئیرۆ ده‌رچوونه ژنن. نها پشتی نه‌ه مه‌هان خوه‌ندن و په‌روه‌رده‌یێ ده‌ردچن و پله‌یا مولازم وه‌ردگرن. خوینه‌که نوو ب هێزێن پێشمه‌رگه یێن کوردستانێ ددن. ئه‌م د وێ باوه‌ریێ دا نه کو، ده‌ما خه‌لکێ کوردستانێ ڤان دیمه‌نێن نوها ببینه هه‌ست ب سه‌ربلندیێ دکن.
ژ دل و جان گه‌رمترین پیرۆزباهی و سپاسیێن خوه پێشکێشی ده‌رچوویێن هێژا و مالباتێن وان دکم کو، د هه‌یاما خوه‌ندن و په‌روه‌رده‌یێ دا پشتگری و جه‌ساره‌ت دانه وان. هه‌روها سپاسیا خوه یا تایبه‌ت پێشکێشی مامۆستا و به‌رپرسێن کۆلێژا سه‌ربازی دکم ژ بۆ هه‌ولێن وان یێن به‌رده‌وام ژ بۆ ئاماده‌کرن و په‌روه‌رده‌کرنا ڤی نفشێ هێڤیبه‌خش و دلسۆز بۆ کوردستان و ئیراقێ.
ده‌رچوویێن هێژا
خوه‌سته‌کا وه یا ته‌ڤلیبوونا کۆلێژا له‌شکه‌ری پشتی قه‌داندنا زانینگه‌هێ، ئه‌ڤ نیشانا وه‌فاداریا وه، پێگەهشتنا ڕه‌وشه‌نبیری، هه‌ستا کوور یا وه‌لاتپارێزی و به‌رپرسیاریا وه یا بلنده. وه ڕێیه‌ک هێسان نه‌هلبژاتیه، به‌لکی وە ڕێیا دژوار یا ڕوومه‌ت و سه‌ربلندیێ هلبژارت کو ڕێیا خزمه‌تکرنا وه‌لات و پاراستنا ده‌ستکه‌فت و نرخێن بلند یێن گه‌لێ مه یه.
په‌روه‌رده و پاشخانه‌یا وه یا ئاکاده‌میک و پسپۆریا وه یا زانستی د ژیانا وه دا سه‌رمایه‌ک مه‌زنه. هه‌لبه‌ت دێ هێزێن مه یێن چه‌کدار ده‌وله‌مه‌ندتر بکه و شیان و ژێهاتیبوونا وه یا ژ ڕووبرووبوونا دژواریێن نها و پاشه‌رۆژێ خورتر و زێده‌تر دکه. ئه‌ڤ ده‌ستپێکا وه‌رچه‌رخانه‌ک گرینگه د دیرۆکا پێشمه‌رگه و هێزێن چه‌کدار یێن هه‌رێما کوردستانێ دا.
ب تایبه‌تی و ب شانازیه‌ک مه‌زن به‌شداربوونا که‌چ و ژنێن کوردستانێ د ناڤا ڕه‌فێن پێشمه‌رگه و هێزێن مه یێن چه‌کدار دا د ڤێ ڕۆژێ دا بلند دنرخینم. د دیرۆکا تێکۆشینا گه‌لێ مه دا ژنێن کوردستانێ ئیسپات کرنه کو د ئاڤاکرنا وه‌لات و پاراستنا ئاخ و وه‌لات دا هه‌ڤکارا سه‌ره‌که و ب باندۆرن. د ڤی واری دا گه‌له‌ک قوربانی دانه کو هێژایی ڕێز و شانازییێ نه. هه‌بوونا ژنان د سازیێن له‌شکه‌ری و ئه‌وله‌کاری دا نه ته‌نێ نیشانا پێشکه‌تنا جڤاکا مه یه، به‌لکی ئیسباتا باوه‌ریا مه یا کوور ب وه‌کهه‌ڤی، دادپه‌روه‌ری و هه‌ڤپاریا ڕاسته‌قینه د جیبجیکرنا ئه‌رکێن نه‌ته‌وی و کارێن گرینگ دا یه.
دیرۆکا پێشمه‌رگه تۆماره‌که زێرین یا تژی شانازی یا قه‌هره‌مانی و قوربانیدانا ژ بۆنا کوردستانێ یه. ژ ڕۆژا دامه‌زراندنا خوه ڤه هه‌تا ئیرۆ، پێشمه‌رگه ئه‌ڤ هێزا بروومه‌ته کو، هه‌رتم بوویه مه‌رتاله‌که پۆلا یا بهێز ژ بۆ پاراستنا کوردستانێ و ده‌ستکه‌فتێن وێ. د ڤان ب ده‌هان سالێن بۆری دا ژ بۆ پاراستنا ئازادی، مافێن ڕه‌وا و ڕوومه‌تا گه‌لێ کوردستانێ تێکۆشیانه. کاروانه‌ک درێژ یێ شه‌هیدێن سه‌ربلند و قه‌هره‌مان پێشکێشی کوردستانێ کرنه. ئیرۆ ژی ب هه‌مان ڕوحێ وه‌لاتپارێزی و فه‌داکاریێ ده‌ستکه‌فتیێن ده‌مۆکراتیک و ده‌ستووری یێن گه‌لێ مه دپارێزن، به‌ردوامن و ده‌ست ژێ به‌رنادن. د ڤێ ڕۆژێ دا ئه‌م به‌ژنا خوه ل به‌ر وان شه‌هیدان دته‌وینن کو، خوینا خوه ژ بۆ پاراستنا کوردستانێ و ده‌ستکه‌فتیێن وێ دانه، بیرانینا وان هه‌ر ده‌م زندی دمینه.
ده‌رچوویێن هێژا
که‌چ و کور یێن ئه‌زیز
ده‌رچوونا وه ئیرۆ نه داویا ڕێ یه، لێ ده‌ستپێکا قۆناخه‌ک نوو و گرینگ د ژیانا وه دا یه. ده‌ستپێکا ڕێیه‌که تژی به‌خشین، فه‌ده‌کاری و خزمه‌تکرنا گه‌ل و وه‌لاته. ئه‌و زانین، زانست و ئه‌زموونا کو، وه د ڤێ کۆلێژا ڕه‌سه‌ن دا ب ده‌ست خستیه ژ بۆ خزمه‌تکرنا وه‌لات و گه‌لێ مه چه‌ک و ئاموورێن ب هێزن. ته‌ڤلیبوون و په‌یوندیکرنا وه یا ب سازیا له‌شکه‌ری ڕا، ژ بۆ پاراستنا ئه‌وله‌کاری، ئاشتی و ئارامیا وه‌لاتێ مه، به‌رپرسیاریه‌که مه‌زن یا دیرۆکی و نه‌ته‌وه‌یی دخه سه‌ر ملێ وه. د ڤێ ڕۆژێ دا ئه‌م سه‌رۆک مام جه‌لال ب بیر تینن کو، ژ سالا ۱۹۹۲ئان ڤه هزرا دامه‌زراندنا ڤێ کۆلێژا له‌شکه‌ری ژ بۆ خزمه‌تکرنا کوردستان و وه‌لات کر بوو.
مه ل هه‌رێما کوردستانێ باوه‌ریه‌که کوور و بهێز هه‌یه کو دڤێ پێشمه‌رگه و هێزێن مه یێن چه‌کدار سازیه‌کا سه‌ربخوه یا نه‌ته‌وه‌یی و پیشه‌یی بن. ژ هه‌ر جوره ناکۆکیێن سیاسی و حزبی دوور بکه‌ڤن. دڤێ ئه‌ڤ هێز عائیدی گه‌لێ کوردستانێ و هه‌موو پێکهاته‌یێن جودا یێن کوردستانێ بن.
پێشمه‌رگه ژی به‌شه‌که سه‌ره‌کی و گرینگ ژ سیسته‌ما به‌ره‌ڤانیا ئیراقێ یه. له‌وما ئه‌رکێ ئیراقێ یه کو، ب هه‌ر ئاوایی و د هه‌موو واران دا پشته‌ڤانیا پێشمه‌رگه بکه و ب هێز بکه. ئه‌م ب به‌رده‌وامی و ب جدی کار دکن بۆ بهێزکرنا شیان و پێشخستنا شاره‌زایێن پێشمه‌رگه، داکو ب باشترین ئاوایی ڕووبروویێ هه‌موو کێشه و گه‌فان ببن و وه‌ک هه‌ر جار ببن مه‌رتالێ پۆلا یێ پاراستنا کوردستانێ.
پێشمه‌رگه یێن قه‌هره‌مان یێن کوردستانێ و هێزێن مه د شه‌رێ دژی ته‌رۆریستان و ڕێخستنا ته‌رۆریست ئا داعشێ دا، ب کریار و خوینا خوه ئیسبات کرن کو د ئاستا به‌رپرسیاریا دیرۆکی و نه‌ته‌وی دا نه. ل هه‌ر ده‌رێ کوردستانێ خوینا پێشمه‌رگه‌یان تێکه‌ل بوو. که‌سی نه‌پرسی کا کیژان که‌سکه و کیژان زه‌ره. هه‌موویان خوینا خوه ژ بۆ خزمه‌تا وه‌لات و کوردستانێ کرن قوربانی. ژ قه‌هره‌مانی، پرۆفه‌سیۆنه‌لی، جه‌ساره‌ت، قوربانیدان و فه‌داکاریا وه‌لات ڕا میناکه‌که باش و نه‌دیتی نیشان دان. د ڤێ قۆناخێ ژی دا کو، هێ ژی ته‌رۆر و توندره‌وی گه‌فێن ڕاستینن و مه‌ترسی نه، ئه‌م ته‌که‌زی ل سه‌ر به‌رده‌وامیا هه‌ماهه‌نگی و هه‌ڤکاریا ناڤبه‌را پێشمه‌رگه، ئارتێشا ئیراقێ و هێزێن هه‌ڤپه‌یمان دکن.
هه‌ر وها د ڤێ ڕۆژێ دا دڤێ ئه‌م سپاسیا هێزێن هه‌ڤپه‌یمانیا ناڤده‌وله‌تی یا ل دژی داعشێ ژی بکن ژ بۆ پشته‌ڤانیکرن و ئالیکاریا به‌رده‌وام بۆ ئیراق و هه‌رێما کوردستانێ. ب تایبه‌تی ئه‌م سپاسیا ئالیکاری و پشته‌ڤانیا وان دکن د هه‌ولێن چاکسازی و یه‌کخستنا پێشمه‌رگه د بن سیوانا وه‌زاره‌تا پێشمه‌رگه یا حکومه‌تا هه‌رێما کوردستانێ دا ژ بۆ کو ببه هێزه‌که نشتمانی و پارێزه‌رێن ده‌ستکه‌فتێن هه‌رێما کوردستانێ دگه‌ل هه‌موو پێکهاته‌یێن وێ بن.
ڕاسته د ڤێ قۆناخێ دا و د ڤێ ڕێ دا ئاسته‌نگی و پرسگرێک ل پێشیا پرۆسه‌یێ هه‌نه، لێ ته‌ڤی هه‌ر تشتی، ڕاسته گاڤ هێدی دمه‌شن، لێ پێشڤه‌چوونه‌ک باش هه‌یه. ئه‌م گه‌لێ کوردستانێ و دۆستێن خوه یێن د هه‌ڤپه‌یمانیا ناڤده‌وله‌تی دا پشتراست دکن کو ئیراده‌یا مه یا جدی هه‌یه و هه‌تا سه‌رکه‌فتن و یه‌کگرتنا پێشمه‌رگه ده‌ست ژێ به‌رنادن.
خوشک و برایێن هێژا
پرسگرێک و ئالۆزیێن ل ڕۆژهلاتا ناڤین ئه‌وله‌کاری و ئارامیا ئیراق، هه‌رێما کوردستانێ و ناڤچه‌یێ ب گشتی دخه مه‌ترسیێ دا. ئه‌م ل هه‌رێما کوردستانێ ته‌که‌زی ل سه‌ر وێ یه‌کێ دکن کو، دڤێ ئیراق ژ ناکۆکی و پرسگرێکێن هه‌رێمی دوور بمینه. پێویستیا ئیراقێ ب ئاشتی، ئارامی و گه‌شه‌پێدانا دۆمدار هه‌یه، نه کو ب پتر کریز، ناکۆکی و په‌ڤچوونێن زێده‌تر.
پشتی دیرۆکه‌ک ب ئێش، ئازار و وێرانکرنێ، ب ده‌ستێن شه‌رێن یه‌ک ل په‌ی یێ دن، ئێدی ئیراق نوها پێویستی ب ئاشتی و ئارامیێ هه‌یه، داکو بکاربن خێرووبێر و ده‌وله‌مه‌ندیا وه‌لاتێ خوه ژ بۆ ئاڤادانکرن، گه‌شه‌پێدان و پێشخستنا هه‌موو به‌شێن ژیانێ بکار بینن. خه‌لکێ ئیراق و هه‌رێما کوردستانێ، ب هه‌موو ده‌ڤه‌رێن خوه ڤه، زێده‌تر هێژایی ژیان و خزمه‌تگوزاریێ نه، نه کو ته‌ڤلی وێ ئالۆزیا کو ئیرۆ ل ناڤچه‌یێ هه‌یه ببن.
ئه‌م دووباره دکن کو، هه‌رێما کوردستانێ دێ وه‌ک فاکتۆرا ئاشتیانه ل ناڤچه‌یێ بمینه و ژ بۆ پاراستنا ئاشتی و ئارامی و پێکڤه‌ژیانا ئاشتیانه یا هه‌موو ئالیان دێ ده‌ستێ هه‌ڤکاریێ درێژی هه‌موو ئالیان بکه.
ته‌جروبه‌یا مه یا ب ده‌هان سالان ل هه‌رێما کوردستانێ ئەم فێر کرنە کو، دیالۆگ، لهه‌ڤتێگهشتن و دانووستاندنێن به‌رده‌وام ته‌کانه ڕێیا گونجاو و ڕاسته ژ بۆ چاره‌سه‌رکرنا ناکۆکیان و ده‌رباسکرنا قه‌یرانان. ئه‌م د وێ باوه‌ریێ دا نه کو، بهێزکرنا هه‌ڤکاری و هه‌ڤاهه‌نگیا د ناڤبه‌را هه‌موو پێکهاته‌یێن ئیراقێ دا گارانتیه‌ک ڕاستینه ژ بۆ ئاڤاکرنا ئیراقه‌کا فه‌ده‌رال یا ده‌مۆکراتیک کو ڕێزێ ل پرئالی و جوداهیان بگره و ماف و ئازادیێن هه‌موو پێکهاته‌یان بپارێزه.
برێزان
ب به‌رچاڤگرتنا قۆناخا سیاسی یا هه‌ستیار یا پشتی هلبژارتنێن پارله‌مه‌نتۆیا کوردستانێ کو، هلبژارتنه‌ک سه‌رکه‌فتی بوو و نێزیکی ژ سه‌دی ۷۲ ێ گه‌لێ کوردستانێ به‌شداری هلبژارتنان بوو کو، ئه‌ڤ یه‌ک ژی ب هه‌موو پیڤانان سه‌رکه‌فتنا کوردستانێ بوو. ئه‌ز داخوازێ ژ هه‌مێ ئالیێن سه‌رکه‌فتی دکم کو، به‌رژه‌وه‌ندیێن بالا یێن وه‌لات د سه‌ر هه‌موو تشتا ڕا ده‌ینن و ژ بۆ ئاڤاکرنا حکومه‌ته‌کا بهێز و ب باندۆر ده‌ست ب دیالۆگه‌ک جدی، به‌رپرسیار و ئاڤاکه‌ر بکن. حکومه‌ته‌ک کو به‌رسڤا هێڤیێن گه‌ل بده و بکاربه ب سه‌رفرازی ڕووبروویی خه‌ته‌ر و کێشه‌یێن هه‌یی و پاشه‌رۆژێ ببه.
هه‌روها ته‌که‌زی ل سه‌ر پێویستی و گرنگیا چاره‌سه‌رکرنا کێشه‌یێن ناڤبه‌را هه‌رێما کوردستانێ و به‌غدایێ ل سه‌ر بنگه‌ها ده‌ستوور و ڕێکه‌فتنێن سیاسی یێن ناڤبه‌را هه‌رێما کوردستانێ و به‌غدایێ دا دکم. ئیراقه‌ک کو بکاربه ل هه‌مبه‌ر مه‌ترسیێن ڕه‌وشا ئالۆز یا هه‌رێمی بسه‌کنه، دڤێ ئیراقه‌ک یا هه‌موو پێکهاته‌یان به بێ جوداهی. ئیراقه‌ک کو د وارێ پراتیکێ دا ژی ژ بۆ هه‌موو ئیراقیان به، هه‌ر که‌س هه‌ست بکه کو هه‌م ل هه‌رێما کوردستانێ و هه‌م ژی ل ئیراقێ د بریاردان و برێڤه‌برنا سیاسی و ئیداری یا وه‌لات دا وه‌ک هه‌ڤن و خوه خوه‌دیێ ئیراقێ بزانن.
جاره‌ک دن ژ دل و جان پیرۆزباهیێ ل ده‌رچوویان و مالباتێن وان یێن برێز دکم، ب تایبه‌تی سپاسیا فه‌رمانده و به‌رپرسێن کۆلێژا له‌شکه‌ری یا قه‌لاچۆلان و هه‌موو یه‌ک ب یه‌ک مامۆستا و ڕاهێنه‌ران دکم ژ بۆ خه‌باتێن وان یێن ب دلسۆزی و که‌دا وان یا ژ دل و جان و یا به‌رده‌وام د ئاماده‌کرنا ڤی نفشێ وه‌لاتپارێز دا کو هێڤیا کوردستانێ و پاشه‌رۆژا وه‌لاتێ مه نه.
هێڤیدارم کو هوون هه‌موو د خزمه‌تا وه‌لات و گه‌لێ مه دا سه‌رکه‌فتی بن. ژ بۆ پاراستنا یه‌کرێزی و پێکڤه‌ژیانێ، پێشخستنا چاندا خوه‌ش یا هه‌ڤدوقه‌بوولکرن، پێکڤه‌ژیانا و تۆله‌رانسێ ل کوردستان و ئیراقێ دا یه‌کانه ڕێیا مه یا پاشرۆژێ یه.
خوه‌دایێ مه‌زن وه‌لاتێ مه بپارێزه.
سلاڤ ل سه‌ر گیانێ شه‌هیدان به.
سلاڤ ل وه و ڕۆژه‌ک خوه‌ش ژ وه ڕا دخوازم،
گه‌له‌ک سپاس.
