ئێڤاریا ڕۆژا پێنجشه‌مێ ٢٠٢٤/٩/١٢ێ، برێز نێچیرڤان بارزانی سه‌رۆکێ هه‌رێما کوردستانێ به‌شداری د مه‌راسما ۲۰ سالیا هاتنا تیما زه‌یتوون یا کۆره‌یا باشوور بۆ هه‌رێما کوردستانێ کر کو، ژ ئالیێ کۆنسولخانه‌یا کۆره‌یا باشوور یا ل هه‌رێما کوردستانێ ڤه هاتبوو ئۆرگانیزه‌کرن.
سه‌رۆک نێچیرڤان بارزانی گۆتاره‌ک پێشکه‌ش کر و ئه‌ڤ ل ژێر ناڤه‌رۆکا وێ گۆتارێ:
ئاماده‌بوویێن برێز
مێڤانێن ئه‌زیز
ئێڤار باش
ئانیۆ هاسه‌یۆ
هه‌موو ئالی ب خێر بێن بۆ مه‌راسما ۲۰ سالیا هاتنا تیما زه‌یتوون یا ئارتێشا کۆره‌یا باشوور بۆ هه‌رێما کوردستانێ و ده‌ستپێکرنا په‌یوه‌ندیێن ناڤبه‌را هه‌ولێر و کۆره‌یێ دا. ئه‌ز دخوازم ب تایبه‌تی بخێرهاتنا برێز جهۆ سونگ-سۆئۆ بالیۆزێ کۆره‌یا باشوور ل ئیراقێ بکم. ئه‌ڤ سالڤه‌گه‌ر و تێکلیێن کۆره‌یا باشوور ب هه‌رێما کوردستانێ ڕا ژ بۆ مه گه‌له‌ک گرینگن.
په‌یوه‌ندیێن ناڤبه‌را کۆره‌یا باشوور و ئیراقێ ڤه‌دگه‌رن داویا سالێن ۸۰ئان سه‌دسالا بۆری، لێ به‌لێ به‌ریا ۲۰ سالان چو په‌یوه‌ندیێن هه‌رێما کوردستانێ و کۆره‌یا باشوور نه‌بوون. هه‌ردو ئالی ژی ژ هه‌ڤ غه‌ریب بوون. ده‌ما کو یه‌که‌م تیما له‌شکه‌ری یا کۆره‌یا باشوور، تیما زه‌یتوون، د ئیلۆنا ۲۰۰٤ێ دا گەهشتی هه‌ولێرێ ژ بۆ ئالیکاریا هه‌رێما کوردستانێ، ئه‌ڤ گاڤا یه‌که‌م بوو ژ بۆ ئاڤاکرنا په‌یوه‌ندیێن دوئالی.
ئه‌ڤ د ده‌مکێ دا بوو کو، له‌شکه‌رێن کۆره‌یا باشوور، پشتی پرۆسه‌یا ڕزگارکرنا ئیراقێ، بوونه به‌شه‌ک ژ هه‌ڤپه‌یمانیا ناڤده‌وله‌تی ژ بۆ ئالیکاریا پرۆسه‌یا نووئاڤاکرنا ئیراقێ. ئه‌رکا کۆره‌یا باشوور ل ئیراقێ و هه‌رێما کوردستانێ ژی د ناڤ دا، نه ته‌نێ ئه‌رکه‌کی سه‌ربازی و ئابۆری بوو، به‌لکو ئه‌رکه‌کی مرۆڤی و ئاشتیانه بوو کو، ل سه‌ر بنگه‌ها سۆز و هه‌سته‌که کوور ژ بۆ ئالیکاری و هه‌ڤکاریێ هاتیه ئاڤاکرن.
هینگێ ئه‌و وه‌ک دۆست ب ناڤێ زه‌یتوونێ کو، تێ واته‌یا ئاشتی، به‌خته‌واری و درێژکرنا ده‌ستێ ئالیکاریێ، هاتن هه‌رێما کوردستانێ. هێشتا خه‌لکێ هه‌رێما کوردستانێ ئه‌و هه‌ڤۆکا کو ل سه‌ر ئۆتۆبووسێن کو وه‌ک دیاری ژ هه‌رێما کوردستانێ ڕا ئانیبوون ل بیره کو نڤیسی بوو: ئه‌م دۆستێن وه نه. ب هاتنا خوه ڕه گه‌ل و چانده‌ک نوو یا ڕۆژهلاتا ناڤین ناس کرن و گه‌لێ کوردستانێ ژی گه‌له‌ک ئالیێن تایبه‌ت یێن کۆره‌یا باشوور ناس کرن.
هه‌ر چقاس تیما زه‌یتوون له‌شکه‌ری بوو ژی، لێ به‌لێ ئالیکاری و پشتگریا مرۆڤی پێشکێشی وه‌لاتیێن کوردستانێ دکر. ئه‌ڤ ده‌ستپێکا ڤه‌کرنا نوونه‌راتیا دیپلۆماسی یا کۆره‌یێ ل هه‌رێما کوردستانێ بوو کو، د سالا ۲۰۱٦ئان دا نوونه‌راتیا دیپلۆماسی یا بالیۆزخانه‌یا کۆره‌یێ بۆ ئاستا کۆنسولخانه‌یێ هات بلندکرن.
ته‌ڤی کو نه‌خوه‌شخانه‌یا زه‌یتوون له‌شکه‌ری بوو ژی، لێ ده‌ریێن خوه ژ وه‌لاتیان ڕا ڤه‌کرن و د وارێ ساخلەمیێ دا چاره‌سه‌ری کرن. ل پارکا شه‌هید سامی ئه‌بدولره‌حمان پرتووکخانه‌یه‌ک ڤه‌کرن و ب گه‌له‌ک وه‌زاره‌ت و سازیێن حکومه‌تێ ڕا هه‌ڤکاری کرن. له‌شکه‌رێن ئه‌ندامێ وێ تیمێ ب وه‌لاتیان ڕا تێکلیێن دۆستانه دانین و چاند و که‌ڤنه‌شۆپیێن کۆره‌یی ب گه‌لێ کوردستانێ دان ناسکرن. چه‌ند چیرۆک و ڕێزه‌فیلمێن کۆره‌یی د ناڤ ته‌ماشه‌ڤانێن کورد دا گه‌له‌کی ناڤدار بوون.
ئاژانسا کۆیکا گه‌له‌ک خزمه‌ت کریه و هه‌تا نها ژی خزمه‌ت و ئه‌رکێن خوه ل هه‌رێما کوردستانێ به‌رده‌وام دکه. د ئاڤاکرنا زێده‌تری ٦۰ دبستان، ۱٥ ناڤه‌ندێن ته‌ندروستی، نه‌خوه‌شخانه و پرتووکخانه‌یا زه‌یتوون و گه‌له‌کێن دن دا ڕۆله‌ک گرنگ لیست بوو. ئالیکاری د دامه‌زراندنا ئه‌نستیتویا کوردستان بۆ ڕێڤه‌به‌ریا گشتی و دامه‌زراندن و ئاکتیڤکرنا سیسته‌ما کرینا ئه‌له‌کترۆنیک دا کر. ئه‌ڤ هه‌موو ئو گه‌له‌کێن دن کار و خزمه‌تێن کۆره‌یا ل هه‌رێما کوردستانێ بوون.
ئه‌ڤ ده‌ستپێکا تێکلیه‌کێ بوو کو هین ژی پر دۆستانه یه و پشتی بیست سالان، ئیرۆ ڕۆل، باندۆر، هه‌بوون و شوونتلیێن دۆستێن مه یێن کۆره‌یی د گه‌له‌ک وارێن جودا دا ل هه‌رێما کوردستانێ ب زه‌لالی دیارن. دۆستێن مه یێن دلسۆز و پر باش بوون و ئه‌م سپاسیا هه‌موو ئالیکاریێن وان دکن.
من بخوه بیرانینێن خوه‌ش و زیندی دگه‌ل یه‌که‌م سه‌ردانا من بۆ کۆره‌یێ هه‌نه. ئه‌م دێ چو جاری وێ گه‌رماتی و دۆستانیێ ژ بیر نه‌کن کو ده‌ما ئه‌م گه‌هشتن بالافرگه‌ها سیئولێ ب کوردییک گه‌له خوه‌ش و شرین پێشوازی ل مه کرن. نها ژی کو ئه‌م ۲۰ سالیا وێ ده‌ستپێکا گرنگ ب بیر تینن، کۆره‌یا باشوور، گه‌ل، چاند و باندۆرا وێ ژ بۆ گه‌لێ کوردستانێ ب ته‌ڤاهی ناسکریه.
ب گه‌له‌ک کار و خزمه‌تێن کو کۆره‌یا باشوور، تیما زه‌یتوون، ئاژانسا کۆیکا و شریکه‌ت و هه‌ڤپارێن مه یێن کۆره‌یی ل ڤر پێشکێش کرنه و دکن، هین ژی دۆستانیه‌که خورت د ناڤبه‌را مه هه‌ر دو ئالیان دا هه‌یه و به‌رده‌وامه.
ئه‌م ل هه‌رێما کوردستانێ ب ڤان په‌یوه‌ندیان گه‌له‌ک کێفخوه‌ش و سه‌ربلندن. ئه‌م دخوازن و چاڤێ مه ل به‌ندێ یه و ئه‌م ئامادانه کو ل سه‌ر ئه‌ساسێ به‌رژه‌وه‌ندیێن هه‌ڤپار هه‌ڤکاریا خوه د هه‌موو واران دا زێده‌تر به‌رفره‌ه بکن.
برێزان
چیرۆکا سه‌رکه‌فتنا بێهه‌مپا یا کۆره‌یا باشوور ژ بۆ ته‌ڤاهیا جیهانێ پر بالکێش و ئیلهامبه‌خشه. هه‌رێما کوردستانێ و ئیراق دکارن گه‌له‌ک ده‌رسێن ب مفا و کێرهاتی ژێ وه‌ربگرن. کۆره‌یا ژ بەر ئه‌نجامێن پشتی شه‌ری و ئابۆریه‌ک وێران دنالاند، لێ ب ئالیکاریا ناڤنه‌ته‌وه‌یی وێ گرانی و فۆکوسا خوه خسته سه‌ر ئاڤاکرنا مرۆڤان، بینه‌سازیێ و سازیێن بنگه‌هین. د ئه‌نجاما پلانسازیا ستراته‌ژیک، ده‌ستپێشخه‌ری و نووبوونێ دا، کۆره‌یا، ژ وێرانیێ و ڕه‌وشا دژوار و پاشکه‌فتی، بوویه چارده‌هه‌مین ئابۆریا هه‌ری مه‌زن یا جیهانێ. ئه‌و بوویه یه‌ک ژ کاپاسیته‌یێن هه‌ری هێزدار یێن ته‌کنۆلۆژیێ. وێ مۆهرا خوه ل پێشکه‌فتنا ته‌کنۆلۆژی و زانستێ ل چارالیێ جیهانێ خست.
د سالا ۱۹۷۱ئان دا، یه‌ک ژ تشتێن هه‌ری ژیر و ڕاست کو کۆره‌یا باشوور پشتی شه‌ر کر، دامه‌زراندنا ئه‌نستیتویا پێشکه‌فتنا کۆره‌یێ بوو. ئه‌نستیتویێ ب سەرکەفتی سیاسه‌ت و ستراته‌ژیێن ژ بۆ ڤه‌ژین، پێشکه‌فتن، پێشخستنا ئابۆری و ژ نوو ڤه ئاڤاکرنا مرۆڤی و جڤاکا کۆره‌یی ئاماده کر.
پشتی چه‌ند سالان ئه‌نجام و باندۆرا مه‌زن ئا خه‌باتا ئه‌نستیتویێ ب زه‌لالی ل سه‌ر پێشکه‌فتن و مه‌زنبوونا ئابۆریا کۆره‌یێ ده‌رکرت هۆلێ. ئه‌م دکارن ل ڤر ل گۆر ڕه‌وش و پێداویستیێن هه‌رێما کوردستانێ ته‌جرووبه‌یا وان دوباره بکن.
وه‌فاداری، دلسۆزی و گرێدانا هه‌ڤوه‌لاتیێن کۆره‌یی ب وه‌لاتێ خوه، ب ئاخ، وه‌لات و گه‌لێ خوه، باوه‌ری و هێڤیا وان ب پاشه‌رۆژه‌که باشتر، که‌د و فه‌داکاریا وان و هۆکارێن دن سه‌ده‌مێن سه‌ره‌که یێن سه‌رکه‌فتنا وه‌لاتێ وان بوون. ئه‌ڤ هه‌موو ژی ژ په‌روه‌رده، فێرکرن و پێگه‌هاندنا ڕاست ده‌ردکه‌ڤن.
ب گشتی، سه‌رپێهاتی و چیرۆکا کۆره‌یێ ژ مه و هه‌موو مرۆڤاتیێ ڕا دبێژه: گه‌ر ئیراده و خوه‌سته‌کا پێشکه‌فتن و ڤه‌به‌رهێنانا ل سه‌ر مرۆڤان و پێشخستنا شیانێن وان هه‌به، هه‌ر گاڤ ده‌رفه‌ته‌ک هه‌یه کو چو مله‌ته‌ک و نه‌ته‌وه‌یه‌ک ل پاش نه‌مینه و هه‌ر تم ڕێیا سه‌رکه‌فتنێ و گه‌هشتنا ب ئارمانجێن بالا ل پێشبه‌ری گه‌لان ڤه‌کری یه.
ب ڤێ مناسه‌به‌تێ، ئه‌م ته‌که‌زی ل سه‌ر هه‌ڤپاریێن خوه یێن ب کۆره‌یا ڕا دکن. هه‌رێما کوردستانێ د هه‌موو واران دا ژینگه‌هه‌کا باش یا ڤه‌به‌رهێنانێ و ده‌رفه‌تێن باش ژ بۆ سه‌کتۆرا تایبه‌ت یا کۆره‌یێ هه‌یه.
ئه‌و دکارن د وارێ پێشخستنا ژێرخانا هه‌رێما کوردستانێ دا، د وارێن زانستی، ته‌کنۆلۆژیێ، چاندی و گه‌له‌ک وارێن دن دا پتر ئاکتیڤ و ب باندۆر بن. ئاسۆیا په‌یوه‌ندیێن مه ژ بۆ مفا و به‌رژه‌وه‌ندیا هه‌ر دو ئالیان دکاره زێده‌تر به‌رفره‌هتر و گشتگیر ببه و ئه‌م دکارن ڤان چالاکیان به‌رده‌وام بکن.
د داویێ دا، پشتی بیست سالان، ئه‌ز دخوازم ل ڤر ژ هه‌ولێرێ ب ناڤێ خوه و خه‌لکێ هه‌رێما کوردستانێ سپاسیا هه‌ر یه‌ک ژ ئه‌ندامێن تیما زه‌یتوون دوپات بکم. ئه‌ز سلاڤێن خوه ژ هه‌ولێرێ ژێ ڕا دشینم، ئه‌ز دخوازم ژ ڤر سلاڤ و حه‌زکرنێن خوه یێن تایبه‌ت ژ گه‌نه‌رال هوانگ ڕا یه‌که‌م فه‌رماندارێ تیمێ، ژ ئه‌فسه‌رێن برێز پارک، کیم، لین و هه‌موو یێن دن ڕا دشینم. ئه‌ز ژ وان ڕا دبێژم: ئه‌م ب ناسکرنا وان پر کێفخوه‌شن، ئه‌م بێریا وان دکن نوها و ل کو ده‌رێ بن، ژ وان ڕه ژیانه‌که درێژ، به‌خته‌وەری و سه‌رکه‌فتنێ دخوازم.
ژ بۆ ڕێکخستنا ڤێ مه‌راسمێ سپاسیا کۆنسولوسێ کۆره‌یا باشوور ل هه‌رێما کوردستانێ و تیما کۆنسولخانه‌یێ دکم و جاره‌که دن بخێرهاتنا وه هه‌موویان دکم.
ئه‌ز ژ وه هه‌موویان ڕا ئێڤاره‌ک خوه‌ش دخوازم. ل کۆره‌یێ ده‌ما کو ئه‌ز چووم فێری ڤێ گۆتنێ بووم: کامساهامندا.
گه‌له‌ک سپاس
