ئەڤڕۆ سپێدێ (٢٤\٣\٢٠٢٦) هێزێن پێشمەرگەی ل سنوورێ دەڤەرا سۆرانێ بوونە ئارمانجا هێرشەکا مووشەکی یا ئیرانێ. د ئەنجاما ڤێ هێرشێ دا، ٦ پێشمەرگە شەهید بوون و ٣٠ یێن دی ژی بریندار بوون.
پەیاما سەرۆک نێچیرڤان بارزانی:
ئەم ب توندى هێرشا مووشەکى یا ئیرانێ یا ئەڤڕۆ سپێدێ بۆ سەر بارەگەهێن هێزێن پێشمەرگەیى ل دەڤەرا سۆرانێ شەرمەزار دکەین، کو د ئەنجامدا هژمارەکا پێشمەرگەیێن قەهرەمان شەهید و بریندار بوون. پرسە و سەرساخیێن خوە یێن کوور ئاراستەیى مالباتێن شەهیدێن سەربلند دکەین و هیڤیا چاکبوونا بلەز بۆ برینداران دخوازین.
هەرێما کوردستانێ هەردەم فاکتەرێ ئاشتى و ئارامیێ بوویە. ئەم پێگیرێن ب سیاسیەتا نەبەشداربوون و دوورکەفتن ژ هەڤڕکیان و چو جاران نەبووینە هەرەشە بۆ سەر ئاسایشا وەلاتێن جیران. ژبەر هندێ، ئەڤ هێرشە ب دەستدرێژیەکا دوژمنکارانە و ڕاستەوخۆ بۆ سەر سەروەریا وەلاتى دهێتە هەژمارتن، کو چو ماف و بنەمایەک بۆ هێرشێ نینە و ب تەمامى ل دژى پرەنسیپێن جیرانیا باشە.
داخوازێ ژ حکوومەتا فیدرال یا عێراقێ و جڤاکا نێڤدەولەتى دکەین، هەولێن خوە چڕتر بکەن بۆ ڕێگریکردن ل دووبارەبوونا ڤان پێشێلکاریان و پاراستنا سەروەریا عێراقێ و هەرێما کوردستانێ.
نێچیرڤان بارزانی
سەرۆکێ هەرێما کوردستانێ
٢٤\٣\٢٠٢٦
