ژبەرهه‌ستیاریا ڤێ قۆناغا دەڤەر، عیراق و هه‌رێما کوردستانێ تێدا ده‌رباس دبه و ب مه‌به‌ستا گۆتوبێژكرنا رەوشا ھەرێمی و یه‌کخستنا هه‌لوه‌ستا ئالیێن سیاسیێن هه‌رێما کوردستانێ، نێچیرڤان بارزانی سەرۆكێ ھەرێمێ كوردستانێ بانگ ل سه‌کره‌ته‌ر، سه‌رۆک و نوونه‌رێن پارتیێن به‌شدار د پارله‌مه‌نا کوردستانێدا كر و رۆژا 2019.10.16 ل باژارێ ھەولێرێ پێ را جڤیا.
ڕه‌وشا ناڤخوه‌یا هه‌رێما کوردستانێ، په‌یوه‌ندیێن هه‌رێما کوردستانێ د گه‌ل حکومه‌تا فه‌ده‌رال، رەوشا ئالۆزا ھەرێمی، باندۆرا ئێریشا لەشكەرێ تركیێ بۆ سەر رۆژاڤایێ كوردستانێ و لێکه‌فتێن وێ یێن ل سه‌ر هه‌رێما کوردستانێ و چەواییا سەرەدەریكرنا ھەرێما كوردستانێ بئ وان بوویەران رە دئجڤینێ دا ھاتن گۆتوبێژ كرن..
ده‌ربارێ ڕه‌وشا ناڤخوه‌یی یا هه‌رێما کوردستانێ، هه‌موو بەشدارێن جڤینێ ل سەر پێویستیا به‌رده‌وامیا ڤان جڤینان ب ئاوایه‌کی ده‌وری ل گۆر به‌رنامه‌یه‌کی دارشتی یەك دەنگ بوون، ژ بۆ ڤێ پێنگاڤێ ژی سه‌رۆکایه‌تیا هه‌رێما کوردستانێ وه‌کی بلندترین دامه‌زراوه‌یا ده‌ستووری و یاسایی و نشتمانیا هه‌رێما کوردستانێ و سێوانا کۆمکرنا هه‌موو ئالیان و پێکهاتان، ب گونجاوترین جھ زانین کو به‌رده‌وامیێ ب ڤێ پرۆسه‌یێ بده.
ده‌ربارێ ڕه‌وشا سه‌رانسه‌ریا عیراقێ و په‌یوه‌ندیێن هه‌رێما کوردستانێ د گه‌ل حکومه‌تا فه‌ده‌رال، جڤینێ ب باشی زانی کو هه‌موو ئالی شیانێن خوه یه‌ک بخن و ب یه‌ک گۆتار د گه‌ل حکومه‌تا فه‌ده‌رال و ئالیێ سیاسیێن عیراقێ گۆفتوگۆ بکن داكو بكاربن مافێن گه‌لێ کوردستانێ مینا؛ بودچه و چاره‌سه‌ریا ناڤچه‌یێن کوردستانیێن ده‌رڤه‌یی ئیداره‌یا هه‌رێمێ و هه‌موو مافێن دن یێن هه‌رێما کوردستانێ ل گۆر ده‌ستورێ و ب ڕێیا گوفتووگۆیه‌کی جددی و دامه‌زراوه‌یی مسۆگەر بكن.
پێکانینا فه‌ده‌راسیۆنا فراکسیۆنێن کوردستانی ل پارلامەنتۆیا عیراقێ و یه‌کخستنا هه‌موو شیانێن كوردان ل بەغدایێ بگرە ژ سه‌رۆکایه‌تیا کۆمار، وەزیرێن كورد د حکومه‌تا فه‌ده‌رال و نوونه‌رێن هه‌رێما کوردستانێ ل پارلامەنتۆیا عیراقێ ، ب پێویست ھات زانین.
جڤینێ تەكێد ل سه‌ر پێویستیا عیراقێ ب ئارامی و به‌رچاڤگرتنا ڕه‌وشا هه‌ستیارا ناڤچه‌یێ و داخوازێن ڕه‌وایێن هه‌موه‌لاتیان و دوورکه‌تنا ژ توندوتیژی و پاراستنا دامه‌زراوه‌یێن ده‌وله‌تێ کر.
ده‌ربارێ ڕه‌وشا سوریێ و ئالۆزیێن سه‌ربازیێن ناڤچه‌یێ، جڤینێ ب گرینگی زانی كو ھەرێما كوردستانێ ھەلوەستەك ل سەر وان بوویەران ھەبە بئ اوایەكی كو پاراستنا به‌رژه‌وه‌ندیێن گه‌ل و ئاخا هه‌رێما کوردستانێ تێدا پاراستی بە و سازیێن ھەرێمێ و ھەموو ئالیێن سیاسی شیانێن خوە یێن سیاسی و دپلۆماسی بكن یەك كو ھەول بدن هه‌ر چ زووتر شەر بێ راوەستاندن و ھەموو پرسگرێك ب ئاشتی و دانووسنادنا بێن چارەسەر كرن ب ئاوایەكی کو مافێن ته‌ڤاهیا پێکهاتێن سوریێ تێدا میسۆگه‌ر بن.
ئالیێن به‌شداربوویێن جڤینێ:
– پارتیا ده‌مۆکراتا کوردستانێ
– یه‌کێتیا نشتمانیا کوردستانێ
– ته‌ڤگه‌را گۆران
– کۆمه‌لا ئیسلامیا کوردستانێ
– یه‌کگرتویا ئیسلامیا کوردستانێ
– هه‌ڤپه‌یمانیا یەکێتیا نه‌ته‌وه‌یی
– پارتیا گه‌شه‌پێدانا تورکمه‌نی
– پارتیا سۆشیالیست ده‌مۆکراتا کوردستانێ
– پارتیا کۆمونستا (شوعی) کوردستانێ
– ته‌ڤگه‌را ئاشووری
– به‌ره‌یا تورکمه‌نی
– پارتیا کارکه‌ر و که‌دکارێن کوردستانێ
– پارتیا چاکسازیا تورکمه‌نی
– ئه‌نجومه‌نا گه‌لێ کلدانی سریانی ئاشووری
– لیستا ملله‌ت
– لیستا ئه‌رمه‌ن
