هه‌ولدانێن سه‌رۆکێ هه‌رێما کوردستانێ نێچیرڤان بارزانی ژ بۆ یه‌کرێزیا د ناڤا کوردان دا ل باشوورێ کوردستانێ دبه گارانتیا پاراستنا ده‌ستکه‌فتیێن گەلێ کورد ل هەمبه‌ر به‌غدایێ و خوە ئامادەكركن ژ بۆ بەرسینگرتنا ھەر بوویەركە نەخوەستەك كو بقەومە..
نێچیرڤان بارزانی وه‌ک سه‌رۆکێ هه‌رێما كوردستاني، ژ ده‌رڤه‌یێ هه‌موو پارتیان، د گه‌ل جیگر و راوێشکارێن خوه، وه‌ک دەزگەھا سه‌رۆکاتیا کوردستانێ، د ناڤا هه‌ولدانه‌ک گه‌له‌ک جدی و هێژا دا یه و ئەڤە چەند دەستپێشخەری كرن كو ناكۆكیێن ناڤا پارتی و ئالیێن سیاسیێ یێن باشوورێ كوردستانێ دا ھەنە ژ ھۆلێ راكە و ناڤمالا كوردی برێكخستنی بكە..
ل عیراقێ خوه‌پێشاندان رۆژ ب رۆژ گه‌شتر دبن و حوکومه‌تا به‌غدایێ نه‌چار دمینه گوھ بده داخوازیێن خوه‌پێشه‌نده‌ران. ل عیراقێ خوه‌پێشاندان ب ئاوایه‌کی به‌ر ب ئارمانجێن خوه ڤه دچن و ژ بۆ دیالۆگێ وه‌ک ئالیه‌کی تێنه قه‌بوول کرن. حوکومه‌تا عیراقێ ده‌ست ب هه‌ولدانێن چاره‌سه‌ریێ کریه.
ژ ئالیه‌ک دن ڤه، ل هەمبه‌ر له‌یزتکێن وه‌لاتێن وه‌ک ئیرانێ، خوه‌پێشاندان ژ بلی داخوازیێن رۆژانه و جڤاکی به‌حسا ئازادیا سیاسی ل عیراقێ ژی دکن. ئێدی باندۆرا ئیرانێ ل وه‌لاتێ خوه ناخوازن و هه‌تا سه‌ده‌ما گه‌له‌ک ئالۆزیان ل عیراقێ هه‌لوه‌ستا ئیرانێ و هه‌یینا ئیرانێ ل عیراقێ دبینن.
ل هەمبه‌ر هه‌موو روودانان و خه‌ته‌رێن د پێشه‌رۆژێ دا وه‌رن پێش، سه‌رۆکاتیا هه‌رێما کوردستانێ ژ بۆ پاراستنا خاکا کوردستانێ و گه‌لێ کورد د ناڤا هه‌ولدانه‌ک مه‌زن دا یه.
ئاگره‌ک ل عیراقێ پێ که‌تیه. کورد ناخوازن ئه‌ڤ ئاگر بگهه کوردستانێ بۆ ڤێ یه‌کێ ژی هه‌ولدانێن نێچیرڤان بارزانی پتر گرینگ دبن و ئه‌ڤ هه‌ولدانێن پێکانینا یه‌کرێزیه‌کێ د ناڤا ئالیێن کوردستانێ دا ژ بۆ پاراستنا کوردستانێ دبه مه‌رتاله‌ک ب هێز.
د ده‌ستپێکا بوویه‌ران دا سه‌رۆکێ هه‌رێمێ کاری ناڤه‌رۆکا ڤان خوه‌پێشاندانا بخوینه و ل گۆرا ڤێ یه‌کێ ژی سیاسه‌ته‌کی ته‌سبیت بکه. گاڤا یه‌که‌م د گه‌ل هه‌موو ئالیێن کوردستانی ل هه‌ولێر جڤینه‌ک به‌رفره‌ھ کر و به‌حسا خەتەرێن ھەنە کر . بارزانی داخواز کر کو یه‌کتی و یه‌کده‌نگیا کوردا ل هەمبه‌ر به‌غدایێ و ژ بۆ پاراستنا ده‌ستکه‌فتیێن کوردستانی پێوستیه‌که.
هه‌روه‌ها سه‌رۆک بارزانی دگه‌ل ده‌سته‌یا سه‌رۆکاتیا هه‌رێما کوردستانێ سه‌ردانا به‌غدایێ کر و د گه‌ل سه‌رۆکێ عیراقێ، سه‌رۆکوه‌زیر و سه‌رۆکێ پارله‌مه‌نتۆیێ هه‌ڤدیتن پێکانین. د هه‌مان سه‌ردانێ دا سه‌رۆکێ کوردستانێ د گه‌ل پارتی و ئالیێن سیاسی ژی یه‌ک ب یه‌ک هه‌ڤدیتن کرن و هه‌لوه‌ستا کوردستانێ ب وان دا زانین .
پشتی ڤه‌گه‌را کوردستانێ بارزانی ده‌ستپێکر جڤین و هه‌ڤدیتنا ل گه‌ل پارتیین سیاسییێن کوردستانێ کرن. وه‌ک سه‌رۆکێ هه‌رێمێ گاڤێن گه‌له‌ک هێژا ئاڤێتن و هه‌موو ئالیێن سیاسی ئه‌ڤ هه‌لوه‌ستا جه‌نابێ وی گه‌له‌ک ب ئه‌رێنی نرخاندن. سه‌ردانا سه‌رۆکێ کوردستانێ یا بۆ سلێمانیێ بوو سه‌ده‌مه‌ک مه‌زن كو ژ بۆنا چێكرنا یه‌کتیی، یەكرێزی و رێكخستنا ناڤ مالا كوردی دا ئه‌نجامێن هێژا ده‌ستڤه بینه.
خاله‌ک گرنگ ئه‌وه کو ئه‌ڤ هه‌ولدان و پێکانینا یه‌کره‌زیه‌ک د ناڤا کوردان دا، هه‌تا راده‌یه‌کی رێ ل خیانه‌تێ ژی دگره. د مه‌دیایێ دا هاته راگەهاندن کو، ژ بۆ تێكبرنا خوه‌پێشاندانێن رۆژهەلاتێ کوردستانێ لاهۆر شێخ جەنگی هنده‌ک هێز رێکرنه رۆژهلاتێ کوردستانێ دا کو ل گه‌ل هێزێن ئه‌وله‌هیا ئیرانێ ل دژێ خوه‌پێشانده‌رێن رۆژهلاتا کوردستانێ بسه‌کنن.
هێزێن وه‌لاتێن ده‌ردۆرا کوردستانێ ده‌ستێن خراب د ناڤا کوردان دا ژی هه‌نه. یه‌که‌م تشتا بکاربه ڤان ده‌ستێن خراب بێ باندۆر بکه یه‌کرێزی و یه‌کده‌نگیا د ناڤ کوردان دا یه. پێڤاژۆ ل عیراقێ و ئیرانێ گه‌له‌کی زیزه. دیارە کو ئه‌ڤ خوه‌پێشاندان دبن پرسه‌ک هه‌رێمی هه‌تا پرسه‌ک ناڤنه‌ته‌وی ژی.
ڤێ جارێ ب هه‌لوه‌ستا سه‌رۆکێ کوردستانێ کوردا کاری پێشوه‌خت ته‌دبیرا بگرن و د ڤێ ده‌ربارێ دا سیاسه‌تا خوه زه‌لال بکن و بزانبن دێ چ بکن.
2019.11.28
نووچه/ئەنالیز
