سه‌رۆکێ هه‌رێما کوردستانێ نێچیرڤان بارزانی ل سه‌ر ئه‌نفالکرنا بارزانییان گۆت: “ئه‌رکا حکومه‌تا ئیراقێ یه کو ژ بۆ پێکانینا دادگه‌هێ و قه‌ره‌بووکرنا مرۆڤێن قوربانیان، چ پێویست به بکه.”
٤۲ سال د سه‌ر ئه‌نفالکرنا بارزانییان را ده‌رباس بوون.
سه‌رۆکێ هه‌رێما کوردستانێ ب بۆنه‌یا سالڤه‌گه‌را ٤۲یه‌مین یا جیۆسیدا بارزانیان په‌یامه‌ک به‌لاڤ کر.
نێچیرڤان بارزانی د په‌یاما خوه دا بانگل حکومه‌تا فه‌ده‌رال یا ئیراقێ کر کو به‌رپرسیاریا خوه ب جهبینه و کەسووکارێن قوربانییان قه‌ره‌بوو بکه.
نێچیرڤان بارزانی ئاماژه پێ کر کو ئه‌نفالکرنا بارزانییان “خه‌له‌که‌ک ژ زنجیرا تاوانێن ل دژی گه‌لێ کوردستانێ بوو کو ئارمانجا وێ شکاندنا ئیراده و قرکرنا وان بوو.”
نێچیرڤان بارزانی هه‌ر وها ته‌که‌ز کر کو ئه‌ڤ تاوان ل هه‌مبه‌ری به‌رخوه‌دانا گه‌لێ کوردستانێ تێک چوویه.
په‌یاما نێچیرڤان بارزانی وها یه:
ئیرۆ ٤۲ سال د سه‌ر تاوانا هۆڤانه یا ئه‌نفالکرنا ٨ هه‌زار وه‌لاتیێن سڤیل و بێگونه‌ه یێن بارزانی را ده‌رباس دبن.
د ڤێ بیرانینا خه‌مگین دا، ئه‌م به‌ژنا خوه ل هه‌مبه‌ری جانێ پاکێ شه‌هیدان دچەمینن و ب ڕێز و وەفاداری وان ب بیر تینن.
ئه‌نفالکرنا بارزانییان ژ ئالیێ رژێما به‌رێ یا ئیراقێ ڤه، بەردەوامیا زنجیرەیا تاوانێن ل دژی گه‌لێ کوردستانێ بوو کو ئارمانجا وێ شکاندنا ئیراده و قرکرنا گەلێ کوردستانێ بوو. لێ به‌لێ، ئه‌ڤ تاوان ل هه‌مبه‌ری خوه‌راگری و به‌رخوه‌دانا گه‌لێ کوردستانێ تێک چوون بوونە خالەکا رەش ب ناڤ چاڤێن ئەنجامدەران ڤە
دایک، خویشک، هه‌ڤژین و مالباتێن بارزانیان پشتی ڤێ کاره‌ساتێ، ئێش و ئازاره‌که مه‌زن کشاندن. ئه‌و نه‌چار مان کو ل هه‌مبه‌ری ژیانه‌کا دژوار و هه‌ژاریێ ل به‌ر خوه بدن.
ئه‌ز ده‌ستێن وان دایکێن فه‌داکار ماچ دکم کو ب حه‌زکرنا گه‌ل و وه‌لات، زارۆکێن خوه په‌روه‌رده کرن و مه‌زن کرن.
د ڤێ بیرانینێ دا، ئه‌م ته‌که‌زی ل سه‌ر مافێن هه‌موو قوربانییێن ژجینۆسیدا بارزانییان، ئۆپه‌راسیۆنێن ئه‌نفالێ و ته‌ڤاهیا قوربانییێن ب ده‌ستێ رژێما به‌رێ دکن. ئه‌رکێ حکومه‌تا ئیراقێ یه کو ژ بۆ پێکانینا دادپەروەریێ و قه‌ره‌بووکرنا کەسووکارێن قوربانییان، چ پێویست به بکه.
بلا رابردوو و ئێش تەحلییێن ببنە ده‌رس و عیبرەت و هاندەر هەتا هه‌موو پێکهاته‌یێن ئیراقێ ب هه‌ڤ را، ب یەکدوقەبوولکرن، رێزلهەڤگرتن، لێبۆرینێ و ب ئاستی و ب روومەت ب ئازادی و سەرفەرازی بژین و دڤێ وه‌لات، بێیی جوداهی، ببه مالا هه‌ڤبه‌ش ئا هه‌موویان.
سلاڤ ل گیانێ پاک یێ ئه‌نفالکریێن بارزانی و ته‌ڤاهیا شه‌هیدێن کوردستانێ.
ڕێز و ڕوومه‌ت ژ بۆ وان هه‌موو وان جوامێرێن ل هه‌ولێر و ده‌ڤه‌رێن دن یێن کو ب هه‌وارا بارزانیان ڤه چوون و ئالیکاریا وان کرن.
