برێز نێچیرڤان بارزانی سه‌رۆکێ هه‌رێما کوردستانێ، ئیرۆ سێشه‌مێ پشتی نیڤرۆ ۰٤.۰۲.۲۰۲٥ێ ل باژارێ هه‌ولێرێ، د مه‌راسما ده‌ستبکاربوونا فرقه‌یێن ۳ و ٤ یێن به‌ژایی یێن سه‌ر ب وه‌زاره‌تا پێشمه‌رگه ڤه کو، ل سه‌رۆکایه‌تیا هه‌رێما کوردستانێ هاتبوو لدارخستن، گۆتاره‌ک پێشکێش کر.
د ڤێ مه‌راسمێ دا هه‌ر یه‌ک ژ برێزان؛ فه‌رماندارێ هێزێن هه‌ڤپه‌یمانیا ناڤده‌وله‌تی ل ئیراق و سووریێ گه‌نه‌رال کێڤن له‌ئاهی، جیگرێ سه‌رۆکێ هه‌رێما کوردستانێ شێخ جه‌فه‌ر شێخ مسته‌فا، وه‌زیرێ کارووبارێن پێشمه‌رگه، وه‌زیرێ ناڤخوه، سه‌رۆکئه‌رکانێ پێشمه‌رگه و هه‌ژماره‌ک ژ به‌رپرسێن بلند و نوونه‌رێن وه‌لاتێن بیانی ئاماده بوون.
سه‌رۆک نێچیرڤان بارزانی د ئاخافتنا خوه دا به‌هسا گرینگیا ڤێ پێنگاڤا د پرۆسه‌یا یه‌کگرتنا پێشمه‌رگه دا کر.
ناڤه‌رۆکا گۆتارا سه‌رۆک نێچیرڤان بارزانی:
برێز گه‌نه‌رال کێڤن له‌ئاهی،
فه‌رماندارێ هێزێن هه‌ڤپه‌یمانیا ناڤده‌وله‌تی ل ئیراق و سووریێ
ئاماده‌بوویێن هێژا،
به‌یانی باش،
هوون هه‌موو گه‌له‌ک بخێرهاتن بۆ مه‌راسما ده‌ستبکاربوونا فرقه‌یا ۳ و ٤ یێن به‌ژایی یێن سه‌ر ب وه‌زاره‌تا کارووبارێن پێشمه‌رگه ڤه. پشتی کو د جۆتمه‌ها بهوری دا فه‌رمانا هه‌رێمی ژ بۆ دامه‌زراندنا ڤان هه‌ر دو فرقه‌یان ده‌رکه‌ت، ئه‌م گه‌له‌ک که‌یفخوه‌شن کو ئیرۆ وه‌که به‌شه‌ک ژ پێنگاڤه‌کا دن یا پرۆسه‌یا چاکسازی و یه‌کخستنا پێشمه‌رگه د بن سێوانا وه‌زاره‌تا کارووبارێن پێشمه‌رگه یا حکومه‌تا هه‌رێما کوردستانێ ده‌ست ب کار دکن.
ئیرۆ ب ده‌ستبکاربوونا ڤان هه‌ر دو فرقه‌یان ئه‌م دبن شاهدێ پێنگاڤه‌کا نوو و گرینگ د ڤێ پێڤاژۆیا کو ب سالانه بەردەوامە. ئه‌ڤ ده‌ستکه‌فت نه ته‌نێ ده‌ستکه‌فته‌ک ڕێخستنی و ئیداری یه، به‌لکی نیشانا ئیراده‌یا بهێز یا مه یه و به‌رهه‌ما قوربانیدانا مه‌زنه کو گه‌لێ کوردستانێ و پێشمه‌رگه د سالێن ده‌رباسبوویی دا دانه.
برێزان
پێشمه‌رگه نه ته‌نێ هێزه‌کا له‌شکه‌ری یا ئاسایی یه، به‌لکو هه‌رتم سه‌مبۆلا قه‌هره‌مانتی، قوربانیدان و پارێزڤانێ ئاساییشا کوردستانێ و به‌شه‌که گرینگ یا ناسنامه‌یا مه یا نه‌ته‌وی بوویه. ژ ڕۆژا ده‌ستپێکێ یا دامه‌زراندنا خوه ڤه بوویه هێزا شۆره‌شا کوردستانێ و پارێزڤانێ گه‌لێ کوردستانێ. ده‌ما ڕێخستنا ته‌رۆریست یا داعشێ وه‌که مه‌ترسیه‌کا جیهانی ده‌رکه‌ت پێش، پێشمه‌رگه د ئه‌نیا هه‌ری پێش یا هێزێن کو ڕووبروویێ ڤێ مه‌ترسیێ دبوون، بوو.
پێشمه‌رگه ب قه‌هره‌مانی شه‌ره‌کی گران ل کێله‌کا هه‌ڤپه‌یمانیا ناڤده‌وله‌تی ل دژی داعشێ کر و ژ جیهانێ ڕا ئیسبات کر کو نه ته‌نێ هێزا پاراستنا کوردستانێ یه و ژ بۆ پاراستنا پێکڤه‌ژیانا ئاشتیانه یا هه‌موو پێکهاته‌یێن کوردستانێ، به‌لکی ئه‌و مه‌رتاله‌که کو مرۆڤاهیێ ژ ڤێ خه‌ته‌را هه‌ڤپار دپاراست. ژ به‌ر وێ ژی شه‌ره‌فا پاراستنا جیهانێ وه‌رگرت و ب جان و خوین پێرا شه‌ر کر و د داویێ دا ب سه‌رۆکایه‌تیا سه‌رۆک مه‌سعود بارزانی ب سه‌ر که‌ت و ئه‌فسانه‌یا داشێ شکاند.
ب سایا قه‌هره‌مانی و سه‌رکه‌فتنێن مه‌زن، پێشمه‌رگه ل سه‌ر ئاستا جیهانێ بوویه سه‌مبۆلا مێرخاسیێ و جهێ شانازیا گه‌لێ کوردستانێ. ناڤێ پێشمه‌رگه د ناڤ هه‌موو گه‌ل و وه‌لاتێن جیهانێ دا وه‌ک شه‌رڤانه‌کی قه‌هره‌مان ل سه‌ر ناڤێ پاراستنا مرۆڤاهیێ ده‌رکه‌تیه پێش.
برێزان
ئه‌ڤ ده‌ستکه‌فتا ئیرۆ بێیی پشته‌ڤانیا هه‌ڤکارێن مه د هه‌ڤپه‌یمانیا ناڤده‌وله‌تی دا نه ممکون بوو، کو ب ئاوایه‌کی ئەکتیف به‌شداری هه‌ول و پێنگاڤێن برێخستنکرنا هێزێن پێشمه‌رگه بوون، چ ب ڕیا ڕاهێنان، چ ب دابینکرنا پێدڤیێن له‌شکه‌ری و چ ژی ب ئالیکاریا لۆژیستیکی.
ئه‌م ل هه‌رێما کوردستانێ سپاسیێن خوه و پێزانینێن خوه یێن کوور ژ بۆ ڕۆلا دۆستێن مه د هه‌ڤپه‌یمانیا ناڤده‌وله‌تی یا د بن سه‌رۆکاتیا ئامه‌ریکایێ دا ژ بۆ پشته‌ڤانیکرنا مه ل ئیراق و هه‌رێما کوردستانێ د ده‌مێن هه‌ری دژوار دا لیستن، نوو دکن.
هه‌روها، ئه‌م سپاسیا وان دکن کو، د پرۆسه‌یا چاکسازیێ و یه‌کگرتن و ڕێخستنا پێشمه‌رگه دا ئالیکاریا مه کرن. هه‌ڤالێن مه یێن د هه‌ڤپه‌یمانیا ناڤده‌وله‌تی دا، ب تایبه‌تی ئامه‌ریکا و پشترا وه‌لاتێن دن وه‌ک بریتانیا، ئالمانیا، هۆلاندا، ماجارستان، ئیتالیا و فرانسا، به‌شداری دانینا بنگه‌هێن پێویست ژ بۆ یه‌کخستنا پێشمه‌رگه د بن سێوانا وه‌زاره‌تا کارووبارێن پێشمه‌رگه یا حکومه‌تا هه‌رێما کوردستانێ کو، ئه‌ڤ ژی هه‌ڤاهه‌نگی و کاریگه‌ریێ میسۆگه‌ر دکه و پێشمه‌رگه ئاماده دکه کو ببه هێزه‌کا پسپۆر و شه‌فاف. هێزه‌کا کو ب دلسۆزی خزمه‌تا گه‌لێ کوردستانێ ب هه‌موو پێکهاته‌یان ڤه بکه و ببه به‌شه‌که چالاک و ب باندۆر یا سیسته‌ما به‌ره‌ڤانیا ئیراقێ.
ئاماده‌بوویێن هێژا!
پێکانینا فرقه‌یا ۳ و ٤ یا پێشمه‌رگه ئیرۆ پێنگاڤه‌کا گرینگ و ستراته‌ژیکه ژ بۆ بده‌ستڤه‌ئانینا ئارمانجا مه یا مه‌زن یا ئاڤاکرنا هێزه‌کا یه‌کگرتی یا نشتمانی. هێزکا پسپۆر و برێخستنکری کو کارینا پاراستنا وه‌لات ل هه‌مبه‌ر هه‌ر گه‌ف و مه‌ترسیه‌کێ هه‌یه.
ئه‌ڤ هێز دێ د بن سێوانا وه‌زاره‌تا کارووبارێن پێشمه‌رگه دا کار بکن و پشتراست بکن کو هێزێن مه هه‌ر ده‌م د ئاماده‌باشیێ دا نه ژ بۆ ڕووبرووبوونا هه‌ر گه‌فه‌کێ ل سه‌ر ئاسایشا هه‌رێما کوردستانێ و پاراستنا ئه‌وله‌هی و ئارامیێ.
ڕاسته پشتگریا دۆستێن مه پێویست و گرینگه، لێ ئه‌م باش دزانن کو سه‌رکه‌فتنا ڕاست یا ڤێ پێڤاژۆیێ د داویێ دا ب ئیراده‌یا مه یا ناڤخوەیی ڤه گرێدایی یه. ژ بۆ یه‌ککرنا هێزێن پێشمه‌رگه پێویسته هه‌ر که‌س وه‌ک یه‌ک تیم کار بکه و هه‌ر دوبه‌ندی و ناکۆکیێن کو دبه ئاسته‌نگ ل پێشیا ڤێ پرۆژه‌یا نشتمانی ژ هۆلێ ڕاکن. دڤێ پێشمه‌رگه هێزه‌کا نشتمانی به ژ بۆ پاراستنا کوردستانێ، دووری ده‌ستێوه‌ردانێن سیاسی و حزبی، هێزه‌کا کو ته‌نێ کوردستانێ بپارێزه.
ژ به‌ر وێ ژی داخوازێ ژ پارتییا ده‌مۆکراتا کوردستانێ و یه‌کیتییا نشتمانیا کوردستانێ دکم کو ژ بۆ سه‌رخستنا پرۆسه‌یا چاکسازی و یه‌کخستنا پێشمه‌رگه، هه‌ڤکاری و ئالیکاریا هه‌ری زێده نیشان بدن. سه‌رخستنا ڤێ پرۆسه‌یێ ئه‌رکه‌کی نشتمانی و نه‌ته‌وه‌یی یه ل سه‌ر ملێ مه هه‌موویان و دڤێ هه‌موو ئاسته‌نگی و کێشه‌یێن ل پێشیا پرۆسه‌یێ بێنه چاره‌سه‌رکرن، دا کو د داویێ دا هه‌موو پێشمه‌رگه وه‌ک هێزه‌ک نشتمانی یا کوردستانێ د بن سێوانا وه‌زاره‌تا کارووبارێن پێشمه‌رگه دا بجڤن و د بن یه‌ک سه‌رۆکاتی، یه‌ک فه‌رمانداری و یه‌ک ناڤه‌نده‌ک ڕێبه‌ریێ دا بن.
برێزان!
هه‌ر چه‌نده پێنگاڤێن چاکسازی و یه‌کخستنا پێشمه‌رگه ل گۆر داخواز و هێڤیێن مه نامه‌شن، لێ خه‌بات و هه‌ولێن مه یێن ژ بۆ سه‌رخستنا ڤێ پرۆسه‌یێ ل ڤر نامینن.
ئه‌ڤ پرۆژه‌یا نه‌ته‌وی سۆزه‌که کو مه دایه گه‌لێ کوردستانێ، خوینا شه‌هیدان و نفشێن پاشه‌رۆژێ. ژ به‌ر وێ ژی ئه‌م دێ ب هه‌موو هێز، شیان، ئیسرار و ئیراده‌یا خوه به‌رده‌وام بن ژ بۆ سه‌رکه‌فتنا پێڤاژۆیێ و هێزێن پێشمه‌رگه هه‌رتم سه‌مبۆلا یه‌کرێزی و هێز و مه‌رتال به ژ بۆ پاراستنا کوردستانێ ژ هه‌موو گه‌ف و مه‌ترسیان.
ب ڤێ مناسه‌به‌تێ ئه‌م هه‌ڤکاری و هه‌ڤاهه‌نگیا پێشمه‌رگه دگه‌ل هێزێن ئارتێشا ئیراقێ گرینگ و پر پێدڤی دنرخینن، لێ ئه‌ز داخواز ژ حکومه‌تا فه‌ده‌رال یا ئیراقێ دکم کو ل گۆر ده‌ستوور و یاسا و وه‌ک به‌شه‌ک ژ سیسته‌ما به‌ره‌ڤانیا ئیراقێ ب هێزێن پێشمه‌رگه را ته‌ڤبگه‌ره و ئه‌رکێن خوه ل هه‌مبه‌ر پێشمه‌رگه د هه‌موو واران ده جیبجی بکه.
قه‌هره‌مانتی و قوربانیدانا پێشمه‌رگه و خوینا پاک یا شه‌هیدێن نه‌مر یێن کوردستانێ دگه‌ل پشته‌ڤانیا هه‌ڤکارێن مه یێن د هه‌ڤپه‌یمانیا ناڤده‌وله‌تی دا و هه‌ڤبه‌ندیا مه یا هه‌ڤبه‌ش، دکه کو ئه‌م ئیرۆ ب سه‌ربلندی و ب ڕوومه‌ت ڕێیا خزمه‌تکرن و پێشخستنا کوردستانێ به‌رده‌وام بکن و هه‌ولێن مه یێن ژ بۆ یه‌کخستنا پێشمه‌رگه قه‌ت ڕاناوه‌ستن.
ئه‌ز د وێ باوه‌ریێ دا مه کو، ده‌ستبکاربوونا فرقه‌یێن ۳ و ٤ و به‌رده‌وامی و پێشکه‌فتنا پرۆسه‌سا یه‌کگرتنا پێشمه‌رگه، ته‌ڤی هه‌موو ئاسته‌نگی و پرسگرێکان، جهێ دلخوه‌شیا گه‌لێ کوردستانێ یه و دلخوه‌شیا جانێ شه‌هیدانه.
د ده‌مه‌کێ دا کو ناڤچه د ڕه‌وشه‌ک ئالۆز را ده‌رباس دبه و ئه‌م ڕووبروویێ گه‌له‌ک کێشه‌یان دبن، خه‌لکێ کوردستانێ ب حه‌سره‌ت و هێڤیه‌ک مه‌زن چاڤه‌رێیا نووچه‌یا پێکانینا کابینه‌یا نوو یا حکومه‌تا هه‌رێما کوردستانێ دکن.
ژ به‌ر ڤێ یه‌کێ ئه‌ز بانگ ل ئالیێن سه‌رکه‌تی یێن د هلبژارتنان دا دکم کو ڤێ یه‌کێ بکن کارێ خوه یێ یه‌که‌م و گه‌لێ کوردستانێ ب هه‌موو پێکهاته‌یان ڤه دلخوه‌ش بکن ب سه‌رکه‌فتنا دانووستاندنان و بگەهن ڕێکه‌فتنا پێکانینا حکومه‌تا نوو د زووترین ده‌م دا، حکومه‌ته‌ک کو، به‌رسڤێا داخواز و هێڤیێن وه‌لاتیێن هه‌رێما کوردستانێ بدە.
سپاس و ڕێز ژ بۆ هه‌موو که‌سێن کو که‌دا وان د ڤێ سه‌رکه‌فتنا کو ئه‌م ئیرۆ ژ بۆ پیرۆزباهیێ ل هه‌ڤ جڤیانه.
سلاڤ و حورمه‌ت ژ بۆ گیانێ پاکێ شه‌هیدان،
هه‌ر تم سه‌رکه‌فتی بن پێشمه‌رگه‌یێن قه‌هره‌مانێن کوردستانێ.
