سهرۆکێ ههرێما کوردستانێ نێچیرڤان بارزانی پێشوازیێ ل داخوویانییا سهرۆکێ سووریێ ئەحمهد شەرع دکه. د ڤێ دهربارێ دا سهرۆک نێچیرڤان بارزانی داخوویانیهک ڕاگەهاند.
پهیاما سهرۆکێ ههرێما کوردستانێ:
ئهز فهرمانا دوهی (١٦\١\٢٠٢٦) ئا کو ژ ئالیێ سهرۆکێ کۆمارا سووریهیێ برێز ئەحمهد شەرع ڤه هاتیه دایین، پێشوازی دکم. ناسکرنا کوردان وهکی جڤاتهک خوهجهی و پاراستنا مافێن وان گاڤهکا گرینگ یا سیاسی و یاسایی یه ژ بۆ ئاڤاکرنا سووریهیهکا نوو و مسۆگهرکرنا مافێن ههموویان.
ڕێزگرتن ل پڕهنگی و وهکههڤیێ وهکی چاڤکانیا هێزێ، نابە سهدهما پارچهبوونێ لێ بنگهها ئارامی و ئاشتیێ یه و ژیانا ههڤبهش یا نهتهوهیی خورت دکه. ههر چهند ئهم ڤێ فهرمانێ بلند دنرخینن ژی، د هەمان دەمێ دا ئهم دوباره دکن کو نرخا تهڤاهی یا ڤان بریاران د پهژراندن و بجیهکرنا وان د دهستوورا بنگههین یا سووریهیێ یا پێشهرۆژێ دا یه دا کو ئهو بهێن پاراستن و بەردوام کرن.
ئهم پشتگریێ ددن ههر ههولدانهکا ژ بۆ ئاڤاکرنا دهولهتهکێ ل سووریهیێ کو ههموو پێکهاتەیان، بێیی جوداهی و پشتگهخستنێ ههمبێز بکه، کو تێ دا مافێن سیاسی و چاندی یێن ههموویان بهێن گارانتیکرن و پاراستن و ئاشتی و ئارامیا ههرێمێ خورت بکه.
ژ بهر ڤێ یهکێ، ئهم بانگ ل ههموو ئالیان دکن کو ب ههڤ را، دووری توندووتووژیێ، ژ بۆ ئاڤاکرنا مهکانیزمایێن زهلال ژ بۆ پێکانینا ڤێ فهرمانێ و ڤهگوههراندنا وێ بۆ سیاسهت و چالاکیهک بهربچاڤ بخهبتن. ههر وها ئهم دوباره دکن کو ههرێما کوردستانێ ژ بۆ ئەولەهی و ئارامیێ ژ بۆ ههر ئالیکاریێ ئاماده یه.
نێچیرڤان بارزانی
سهرۆکێ ههرێما کوردستانێ
۱۷.۰۱.۲۰۲٦
