پەیڤا نێچیرڤان بارزانی د مەراسما پێشوازیكرنا تەرمێ خوەدێژێرازی د. نەجمەدین كەریم
که‌سوکار و مالباتا برێز خوه‌دێژێرازی د. نه‌جمه‌دین که‌ریم!
ئاماده‌بوویێن برێز!
کوردستانیێن خوه‌شتڤی!
ئیرۆ ئه‌م هه‌موو ل ڤێرە ب خه‌مگینی، لێ به‌لێ ب سه‌ربلندی پێشوازیا ته‌رمێ که‌سایه‌تیێ ژێهاتی و تێکۆشه‌رێ کوردستانێ د. نه‌جمه‌دین که‌ریم دکن. د. نه‌جمه‌دین که‌ریم ب سه‌ربلندی ژیا. هه‌ر یه‌ک ژ مه ژی دکاره گه‌له‌ک ب سه‌ربلندی ب بیر بینه. ئیرۆ ژی ئه‌م هه‌موو پێکڤه ب سه‌ربلندی پێشوازیێ ل ته‌رمێ وی یێ پیرۆز دکن.
د. نه‌جمه‌دین که‌ریم که‌سه‌کێ ئازا و بوێر بوو. ئازایه‌تیه‌کا که‌رکووکیانه و گه‌رمیانانه د خوینا وی دا هه‌بوو، هه‌روێ وێره‌کیێ ژی وسا کر كو چه‌ندین هه‌لوه‌ستان بێخه ناڤ دیرۆکا خه‌بات و کار و ژیانا خوه دا. د. نه‌جمه‌دین که‌ریم به‌ری ته‌مامکرنا خوه‌ندنا پزیشکی یا ل ئیراقێ، دبە ئه‌ندامێ یه‌کێتیا قوتابیێن (خوه‌نده‌کارێن) کوردستانێ، پشتی ته‌مامکرنا خوه‌ندنێ ژی ب بێ دودلی وه‌کی پزیشکه‌ک په‌یوه‌ندیێ ب شۆره‌شا ئیلونێ دكە و دبە پێشمه‌رگه. د ده‌مه‌که کورت دا ژی کاری ببە جهێ باوه‌ریا مه‌لا مسته‌فایێ بارزانی ڕابه‌رێ شۆره‌شێ. پشتی شکه‌ستا شۆره‌شا ئیلوونێ، ئەو ئاگادار و به‌شدار بوو د هنده‌ک ژ ئاماده‌کاریێن ژ بۆ به‌رده‌وامیدانا ب شۆره‌شێ و هلکرنا شۆره‌شا گولانێ. پشتی نه‌خوه‌شکه‌تنا بارزانیێ نه‌مر، د. نه‌جمه‌دین که‌ریم وه‌کی پزیشکه‌ک د گه‌ل چوو ئەمریکایێ.
د. نه‌جمه‌دین که‌ریم، د ده‌ما مایینا ل ئەمریكایێ خوه‌ندنا بلند د وارێ خوه دا ته‌مام کر و بوو یه‌ک ژ پزیشکێن باوه‌رپێکری ل سه‌رانسه‌رێ ئەمریكایێ، د وارێ ئاکاده‌می دا ژی پێگه‌هه‌ک بلند هه‌بوو. وی پێشکه‌تنا خوه یا د وارێ پزیشکی دا ژ بۆ په‌یداکرنا دۆستان ژ بۆ چاره‌سه‌ریا کێشه‌یا کورد بکارئانی، هه‌ول ددا زێده‌ترین پشته‌ڤانیان ژ بۆ مافێن ڕه‌وایێن خه‌لکێ کوردستانێ ب ده‌ست ڤه بینه. ب راستی ده‌ما مایینا ل ئەمریكایێ، گه‌له‌ک دۆست ژ بۆ کوردان په‌یدا کرن و به‌رده‌وام کارهێسانی ژ بۆ شاندەیێن پارتیێن کوردستانی دکر کو بکارن به‌رپرسێن ئەمریكایێ ببینن و د گه‌ل وان باخڤن. ب ڤی ئاوایی ب درێژاهیا ژیانا خوه یا ل ئەمریكایێ، د خه‌باتکرنا ژ بۆ کوردستانێ ڤه‌نه‌قه‌تیا و ژ به‌ر کارکرنا خوه یا ژ بۆ کوردستانێ، دۆستایه‌تی د گه‌ل حزب و ئالیێن هه‌موو پا‌رچه‌یێن دی یێن کوردستانێ چێکربوو.
برێزان..
د. نه‌جمه‌دین که‌ریم سالا 2009 ڤه‌گه‌ریا کوردستانێ و بوو ئه‌ندامێ مه‌کته‌با سیاسی یا یه‌کێتیا نشتمانیا کوردستانێ، ب راستی ژی یه‌ک ژ وان که‌سان بوو جهێ باوه‌ریا خوه‌دێ ژێرازی مام جه‌لال بوو، د. نه‌جمه‌دین که‌ریم ژی ژ بۆ خوه‌دێژێرازی سه‌رۆک مام جه‌لال، یا ژ ده‌ست وی دهات ب دلسۆزی دکر.
د. نه‌جمه‌دین ئاشقێ که‌رکووکێ بوو، وه‌کی کو وی ب خوه دگۆت؛ که‌رکووک ژ بۆ وی وه‌کی دله، ژ به‌رھندێ ژی دەما نیسانا سالا 2011ێ بو پارێزگارێ که‌رکووکێ، ب ئه‌شق و گه‌له‌ک ب دلسۆزیێ کار ژ بۆ که‌رکووکێ کر و ب چ ئاوایه‌کی ژی ژ کارکرنا ژ بۆ که‌رکووک و که‌رکووکیان نه‌دوه‌ستیا. ئه‌گه‌ر وێ ده‌مێ بنێرین کو د. نه‌جمه‌دین که‌ریم پارێزگا‌ر بوو، دێ بینین مه‌زنترین گه‌شبوونا که‌رکووکێ ل سه‌رده‌ما وی دا بوویه. نێزیکی 600 خوه‌ندنگه‌ھ هاتنه دروست کرن، سێ ده‌وامیا ل خوه‌ندنگه‌هێن که‌رکووکێ نه‌ما، زێده‌ترێ 30 بنکه‌یێن ته‌ندروستیێ هاتن دروست کرن، 70% ێ جاده‌یێن ناڤا تاخێن که‌رکووکێ هاتن قیر کرن، نه‌خوه‌شخانه‌یا ئازادی ب ئاوایه‌کی گه‌له‌ک باش هاته نووژه‌ن کرن، نه‌خوه‌شخانه‌یه‌کا مه‌زن یا هه‌ڤده‌م ژ بۆ حه‌ویجه هاته ئاڤاکرن، ڕێیا سلێمانی – که‌رکووک – به‌خدا، هه‌روەساا ڕێیا که‌رکووک – هه‌ولێر کرن جۆته‌رێ، به‌نداڤا خاسه‌جایێ چێکر، سالانه نێزیکی 400 پرۆژه ل که‌رکووکێ ب جھ دکر.
د. نه‌جمه‌دین که‌ریم هه‌ول ددا خزمه‌تا هه‌موو که‌رکووکیان بکه ب هه‌موو نه‌ته‌وه و پێکهاتتیان ڤه، لێ به‌لێ د هه‌مان ده‌مێ دا وی ئەو یەك ژی دزانی کو که‌رکووک کێشه‌یا ناڤه‌ندا کوردستانه ل ئیراقێ. ژ به‌ر وێ ژی د گه‌ل سه‌رۆک مه‌سعود بارزانی و سه‌رۆک مام جه‌لال گه‌له‌ک ب دلسۆزی هه‌ول ددا کو وان کێشه‌یان چاره‌سه‌ر بکه.
گه‌له‌ک ژ وان پرۆژه‌یێن کو ب هه‌ڤکاریا مه ل حکوومه‌تا هه‌رێما کوردستانێ ژ بۆ که‌رکووکێ دهاتن ب جهکرن، جه‌نابێ وی گه‌له‌ک ب دلسۆزیێ ڤه دهات و د گه‌ل مه دئاخفت، هه‌رده‌م پێداگری ل وێ یه‌کێ دکر کو دڤێ هه‌ڤکاری بێ کرن بۆ کو پرۆژه‌یێن ل که‌رکووکێ ب ئاوایه‌کی باش بھێنه ب جھ کرن. گه‌له‌ک ب دلسۆزی هه‌ول ددا کو کێشه‌یێن که‌رکووکێ چاره‌سه‌ر بکه، دزانی گرفتا بنگه‌هینا د ناڤبه‌را حکوومه‌تا ئیراق و حکوومه‌تا هه‌رێما کوردستانێ مه‌سه‌له‌یا که‌رکووکێ کو جه‌وهه‌رێ بنگه‌هین یا کێشه‌یانه. لێ به‌لێ مخابن ژ به‌ر پێگێرینه‌بوونا ئالیێن ئیراقی ب مادده‌یا 140 یا ده‌ستوورا ئیراقێ ڤه، هه‌تا نها ژی ئه‌و کێشه ب هه‌لاویستی مایه، ئەڤێ ژی زیانه‌که زێده ژ بۆ هه‌موو ئیراقێ هه‌بوو و هه‌یه.
ل ڤێرێ، ل به‌ر ته‌رمێ د. نه‌جمه‌دین که‌ریم دا، جاره‌کی دن دووپات دکین کو دڤێ کێشه‌یا که‌رکووکێ و ناڤچه‌یێن کێشه ل سه‌ر ب ئاوایه‌کی ئاشتیانه و ب دیالۆگ، ل سه‌ر بنگه‌ها ده‌ستوورا ئیراقێ بھێنه چاره‌سه‌ر کرن. هه‌ر چه‌ند ئه‌و کێشه بھێن پاشخستن، ئالۆزتر دبن. ژ بۆ وێ یه‌کێ ژی ئه‌م جاره‌که دن داخواز دکین، پێکڤه ڕوونین و وان کێشه‌یان د چارچۆڤەیا ده‌ستوورا ئیراقێ دا چاره‌سه‌ر بکین.
برێزان…
د. نه‌جمه‌دین که‌ریم، پشتی ژیانه‌کا پرژ کار و تێکۆشینێ، ئه‌م ب ھێلان. ئیرۆ جاره‌که دن هه‌ڤخه‌میا خوه و سه‌رۆکایه‌تیا هه‌رێما کوردستانێ د گه‌ل که‌سوکار و خزمێن وی، د گه‌ل خه‌لکێ خوه‌شتڤیێ باژارێ که‌رکووکێ و هه‌موو گه‌لێ کوردستانێ، دووپات دکم. ل سه‌ر وه‌سیه‌تا خوه، ئیرۆ ب ئاوایه‌کی ده‌مکی ل هه‌ولێرێ ب ئاخێ تێ سپارتن، هێڤیدارین زوو ئه‌و هێڤیا د. نه‌جمه‌دین پێکبێ کو داخواز کربوو ته‌رمێ وی ژ بۆ هه‌تا هه‌تایی ڤه‌گه‌رە باژارێ که‌رکووکێ. هێڤیدارین ڕه‌وشه‌کا وسا ب له‌ز پێکبێ و ئه‌م بکارین ته‌رمێ د. نه‌جمه‌دین ڤه‌گه‌رێنین که‌رکووکێ.
دیسا سه‌رخوه‌شیێ ل که‌سوکارێن د. نه‌جمه‌دین دکم، سه‌رخوه‌شیێ ل سۆزانخان و زارۆکێن وی دکم، هه‌ڤبه‌شێ خه‌ما وانین و هێڤیدارم خه‌ما وان یا داوی بە.
گەلەك سپاس
——-
ئێڤاریا رۆژا 2020.11.06 ب به‌شداریا برێز نێچیرڤان بارزانی سه‌رۆکێ هه‌رێما کوردستانێ، ڕێوره‌سما پێشوازیکرنا ته‌رمێ خوه‌دێژێرازی د. نه‌جمه‌دین که‌ریم، که‌سایه‌تی و سیاسه‌تمه‌دارێ کوردستانێ و پارێزگه‌رێ به‌رێ یێ که‌رکووکێ ژ ئالیێ سه‌رۆکایه‌تیا هه‌رێما کوردستانێ ڤه ل فرۆکخانه‌یا ناڤده‌وله‌تیا هه‌ولێرێ برێڤه‌چوو.
د ڕێوره‌سمێ دا ژ بلی مالبات و که‌سوکار و دۆستێن خوه‌دێژێرازی، برێزان جیگرێ سه‌رۆکوه‌زیرێ هه‌رێما کوردستانێ، نوونه‌رێ سه‌رۆک بارزانی، وه‌زیرێ ده‌رڤه‌یێ ئیراقێ و هه‌ژماره‌که به‌ر ب چاڤا وه‌زیران و نوونه‌رێن هێز و ئالیێن سیاسی و به‌رپرسێن حکوومی و حیزبی ئاماده بوون. پشتی دانینا تاجه‌گولا ل سه‌ر ته‌رمێ خوه‌دێژێرازی، سه‌رۆک نێچیرڤان بارزانی گۆتاره‌ک د ده‌ربارێ ژیان و خه‌بات و ڕۆل و پێگه‌ها د. نه‌جمه‌دین که‌ریم دا پێشکێش کر.
