سیاسی

نێچیرڤان بارزانی: ئەو بریار د وارێ پراکتیکێ دا نا‌هێتە جیبجیکرن

نێچیرڤان بارزانی سەرۆکێ هەرێما کوردستانی د پەیامەکێ دا ل سەر بریارا دادگەها بلند یا فەدەرال یا ئیراقێ دبێژە کو وێ بریارێ بنگەهێن فەدەرال و مافێن دەستووری یێن هەرێما کوردستانێ پتگوه خستنە و دگەل روحێ دەستوور و سیستەما فەدەرالی دا هەڤ ناگرە و نەممکنە ئەڤ بریار د وارێ پراکتیکێ دا بهێتە جیبجیکرن. 

تێکستا پەیاما نێچیرڤان ىارزانی:

د دەمەکی دا کو ئیراق د رەوشەکا سیاسیا ئالۆز دا دەرباس دبە، مخابن، بریارەکا دادگەها بلند یا فەدەرال یا ئیراقێ کو یاسایا نەفت و گازێ یا هەرێما کوردستانی ب نەدەستووری پێناسە دکە، هەرێما کوردستانێ راستی دلگرانیەکا مەزن کر.

ب باوەریا مە ئەڤ بریارا دادگەها بلند یا فەدەرال کو ل گۆر یاسایەکێ سەردەمێ رژێما بەرێ هاتیە دان، بنگەهێن فەدەرال و مافێن دەستووری یێن هەرێما کوردستانێ پشتگوه خستنە و دگەل روحێ دەستوور و سیستەما فەدەرالی دا هەڤ ناگرە و نەممکنە ئەڤ بریار د وارێ پراکتیکێ دا بهێتە جیبجیکرن. 

ئەڤ بریارە، هەروەسا، دێ پرسگرێکێن ناڤبەرا حکومەتا فەدەرال یا ئیراقێ و حکومەتا هەرێما کوردستانێ ل سەر دۆسیەیا نەفت و گازێ ئالۆزتر دکە کو ب درێژیا سالێن بۆری هەولا چارەسەرکرنا وان هاتیە داین و د چەند قۆناغان دا ژی ژ بۆ چارسەرکرنا وان پرسگرێکان پێنگاڤ هاتینە ئاڤێتن.

ب باوەریا مە، دادگەها بلند یا فەدەرال ل شوونا ڤێ بریارێ، پێدڤی بوو بریار بدە کو حکومەتا فەدەرال یا ئیراقی دگەل حکومەتا هەرێما کوردستانێ ل گۆر دەستوورێ ل سەر پرسگرێکان و پرسا نەفت و گازێ بگەهنە چارەسەریەکێ کو د بەرژەوەندیا تمامێ ئیراقێ دا بە.

ئەم ژ دادگەها بلند یا فەدەرال یا ئیراق چاڤەرێ دکن و داخوازێ ژی ژێ دکن کو بریارا خوە د بەرچاڤان را دەرباس بکن و بنگەهێن دەستوور و سیستەما فەدەرالی ل بەر چاڤان بگرن داکو مافێن یاسایی و دەستووری یێن هەرێما کوردستانێ نەهێن بن پێ کرن و نەبنە ئەگەرێ زێدەتر ئالۆزبوونا رەوشا سیاسی کو  زیانێ ب بەرژەوندیێن ئیراقێ  یێن گشتی بگەهینە.

نێچيرڤان بارزانى

سه‌رۆكێ هه‌رێمى كوردستان

2022/2/15

وەکە دهێتە زانین دادگەها بلند یا فەدەرالی یا ئیراقی رۆژا ٢٠٢٢/٢/١٥ د بریارەکا خوە دا ل سەر دۆسیەیا نەفت و گازا هاەرێما کوردستانێ راگەهاند: “یاسایا نەفت و گازێ یا هەرێما کوردستانێ دژی دەستوورا ئیراقێ یە”.

د بریارا خوە دا، دادگەها بلند یا فەدەرالی حکومەتا هەرێما کوردستانێ نەچار دکە کو  وزارەتا نەفت و دیوانا چاڤدێریا دارایی یا ئیراقێ ب تمامی چاڤدێریا گرێبەستێن فرۆشتنا نەفت و گازا هەرێما کوردستانێ بکن.

دادگەها فەدەرالی حکومەتا هەرێما کوردستانی مەجبوور دکە کو مەلەفا نەفت و گازا هەریما کوردستانێ تەسلیمی ئیراقێ بکە.

Back to top button