سه‌رۆکێ هه‌رێما کوردستانێ نێچیرڤان بارزانی، رۆژا چارشەمێ ١٦\١٠\٢٠٢٤ ل گه‌ل ئالیێن سیاسی، فه‌رماندار، ئه‌فسه‌ر، مامۆستایێن په‌یمانگه‌هێن له‌شکه‌ری و مالباتێن خوه‌نده‌کاران، به‌شداری مه‌راسما ده‌رچوونا خولا ۲۹ئه‌مین ژ کۆله‌ژا له‌شکه‌ری یا ل زاخۆ یا هه‌رێما کوردستانێ بوو.
پشتی مه‌راسما له‌شکه‌ری، سه‌رۆک نێچیرڤان بارزانی گۆتاره‌ک پێشکێش کر.
گۆتارا سه‌رۆک نێچیرڤان بارزانی:
ده‌رچوویێن ده‌لال
به‌شدارێن هێژا،
ڕۆژ باش، ب خێر هاتن، سه‌رچاڤان هاتن..
ئه‌ز گه‌له‌ک کێفخوه‌شم کو به‌شداری ده‌رچوونا ڕه‌ورسما خولا ۲۹ یا کۆلیژا له‌شکه‌ری یا زاخۆیێ دبم. ژ بۆ مه و هه‌موو کوردستانیان جهێ شانازیێ یه کو ۷۹۲ ئه‌فسه‌رێن جوان خوه‌ندنا خوه یا له‌شکه‌ری، ئەکاده‌میک و پراکتیکی ب داوی دکن.
جهێ که‌یفخوه‌شی و شانازیێ یه کو پشتی بداویهاتنا خوه‌ندنا زانینگه‌هێ، هوون ب ئیراده‌یا خوه هاتن کو خوه‌ندنا خوه یا له‌شکه‌ری ته‌مام بکن و ببن ئه‌فسه‌رێن پێشمه‌رگه. ئه‌ڤ ناڤونیشان حەزکرن و دلسۆزیا وه یا ژ بۆ خزمه‌تا کوردستانێ نیشان دده. هه‌ر بژین و سه‌رکه‌فتی بن.
د ناڤ ڤان ده‌رچوویان دا ٥۰ که‌چێن کورد، ۱۳ ئێزدی و یه‌ک ژی ده‌رچوویێ کاکەیی یه. ئه‌ڤ کێفخوه‌شیا مه یا هه‌ڤپاره. ب گه‌رمی پیرۆزباهیێ ل وه هه‌موویان، مالبات و که‌سووکارێن وه یێن کو ئیرۆ دگەل مە د ڤێ مه‌راسمێ دا به‌شدارن دکم، پیرۆزباهیێ ل وه دکم، هێڤیا سه‌رکه‌فتنێ ژ وه را دخوازم. ئه‌ز ڤێ ڕۆژێ ل گه‌ل مالباتێن وه پیرۆز دکم و ئه‌ز ب وه سه‌ربلندم.
دخوازم ببێژم کو ئیرۆ د ناڤا مه دا که‌سه‌ک وه‌ک باڤه‌کی به‌شداری ڤێ مه‌راسیمێ دبه، ئه‌و یه‌ک ژ فه‌رماندارێن مه بوو کو گه‌له‌ک خزمه‌ت ژ کوردستانێ را کر و مخابن د شه‌رێ ئازادیا ئیراقێ دا بریندار بوو.
وه‌ک مالبات، ئه‌ز ب وی سه‌ربلندم کو ئیرۆ ل ڤره، ئه‌ز وه‌ک مالبات ژێرا دبێژم: “مام، ئه‌م ب وه سه‌ربلندن“ ژ به‌ر کو یه‌ک ژ وان خوه‌نده‌کارێن کو ئیرۆ ل ڤرە و یوک ژ دەرچوویانە، کورێ وی یه و کورێ وی په‌روه‌رده ژ ئالیێ وێڤه باش هاتیه په‌روه‌رده‌کرن و ئه‌و هینی به‌رده‌وامکرنا ڤێ ڕێیێ کر، ئه‌و ڕیا کو باڤێ وی ژ بۆنا ئازادیا ئیراقێ و به‌خته‌وه‌ریا مله‌تێ مه گرتیه و بریندار بوویه، کورێ خوه ژی په‌روه‌رده کریه کو ل سه‌ر وێ ڕێیێ به‌رده‌وام به. مام وه‌جیه، تو ب خێر هاتی، ئه‌ز باوه‌رم، هه‌ولێن ته یێن ژ بۆ خزمه‌تکرنا ئەرتێشا کوردستانێ، دێ وه‌ک ڕووپه‌له‌ک زێرین د تێکۆشینا پێشمه‌رگه و کوردستانێ دا بێ نڤیساندن. هێڤیدارم د ڤان کورسان دا جارا بێ هه‌ژمارا ژنان زێده‌تر ببه.
ده‌رچوویێن هێژا،
پێشمه‌رگه ژ ڕۆژا هه‌بوونا خوه هه‌تا ئیرۆ جهێ سه‌ربلندی، شه‌ره‌ف و به‌رپرسیاریه‌که مه‌زنه. ژ ڕۆژا کو ناڤێ پێشمه‌رگه هاتیه دانین، ڕۆژ ب ڕۆژ باوه‌ریا کورد و کوردستانێ ب دۆزا خوه و مافێن خوه یێن ڕه‌وا زێده‌تر بوویه.
پێشمه‌رگه ئه‌رکه‌کێ گه‌له‌ک پیرۆزه و به‌شه‌کێ گرنگ یێ ناسنامه‌یا نه‌ته‌وی یا کوردستانێ یه. ژ بۆ پاراستنا مله‌تێ خوه، ژ بۆ پاراستنا کوردستانێ به‌رده‌وامیا مه‌شه‌که درێژ یا تێکۆشینێ یه. ژ به‌ر ڤێ یه‌کێ دەرچووینا وه یا ئیرۆ نه داویا ڕێ یه.
ئیرۆ یا کو هوون ده‌ست پێ دکن، خزمه‌ت و ئه‌رکا وه یا نوو یه دگه‌ل سازیێن حکومه‌تێ ژ بۆ کوردستانێ یه. ئه‌ڤ ژ بۆ وه و ژ بۆ مه هه‌موویان ڕوومه‌ته‌که مه‌زنه. د نه‌ه مه‌هێن ڕاهێنان و فێربوونێ دا، وه ئه‌زموونه‌ک ده‌وله‌مه‌ند ب ده‌ست خست دا کو هوون ئیرۆ بکارن خزمه‌تا وه‌لاتێ خوه بکن.
باوه‌رنامه‌یێن وه نه ته‌نێ ده‌ستکه‌فته‌ک ئەکاده‌میکه، ئه‌و په‌یمانا ڕوومه‌تێ یه، سه‌مبۆلا وه‌فاداریێ و باوه‌ریه‌ک مه‌زنه ژ بۆ خزمه‌تکرنا مله‌ت و وه‌لاتی. ئه‌ڤ نیشانا ئاماده‌بوونا وه یه ژ بۆ هه‌ر قوربانیدانا دۆزا وه‌لاته.
د دیرۆکا ته‌ڤگه‌را ڕزگاریخوازا گه‌لێ کوردستانێ دا، پێشمه‌رگه قوربانیێن مه‌زن دانه. ژ بۆ پاراستنا کوردستانێ و نه‌ته‌وا خوه خوینا خوه دانه و ڕوحێ به‌رخوه‌دانێ پێک ئانینه. ته‌ڤاهیا دیرۆکا پێشمه‌رگه‌یێن قه‌هره‌مان و قوربانیێن مه‌زن ژ بۆ ئازادی و ڕوومه‌تا کوردستانێ، چو جاری نایێ ژ بیر کرن.
به‌شدارێن هێژا،
ب ڤێ مناسه‌به‌تێ د ده‌ربارێ ڕه‌وشا ئالۆز یا ڕۆژهلاتا ناڤین دا، دخوازم ته‌که‌ز ل سه‌ر هه‌لوه‌ستا هه‌رێما کوردستانێ بکم کو ئه‌م ل گه‌ل ئاگربه‌ستێ و چاره‌سه‌ریا ئاشتیانه یا هه‌موو پرسگرێکانن. ئه‌م ناخوازن هه‌رێما کوردستانێ و ئیراق بکه‌ڤن ناڤا ڤان ناکۆکیان. ژ بۆ کو ڕه‌وش ئالۆزتر نه‌به دڤێ هه‌ر هه‌ول ژ بۆ ئاشتییێ بێ دایین.
د داویێ دا سپاسیا تایبه‌ت ژ مامۆستا و به‌رپرس و برێڤه‌برێن کۆلیژا دویه‌م یا له‌شکه‌ری یا زاخۆیێ دکم. خه‌بات، خزمه‌ت و که‌دا وان هێژایی ڕێزگرتنه‌که مه‌زنه. وه‌زیفه‌یا وان پیرۆزه و ڕۆلا وان ژی ژ بۆ پێشده‌برن و پێشخستنا ئه‌رکێ پێشمه‌رگه، په‌روه‌رده‌کرنا کاره‌کته‌ره‌کی نشتمانپه‌روه‌ر ل سه‌ر بنگه‌ها زانستیێن له‌شکه‌ری، نێزیکبوون و هه‌زکرنا وه‌لات پر گرینگه.
ئه‌و ئه‌رک و خزمه‌تا کو هوون دکن، ئاڤاکرنا زانینگه‌ه و ئەکاده‌میێن له‌شکه‌ری، وه‌فاداریا هه‌ری باشه ژ تێکۆشین، قوربانیدان و ڕۆلا دیرۆکی یا پێشمه‌رگه، ژ بۆ باشتربوونا پاشه‌رۆژا پێشمه‌رگه یه.
سلاڤ ل سه‌ر گیانێ هه‌موو شه‌هیدێن تێکۆشینا ژ بۆ کوردستانێ. سلاڤ ژ بۆ شه‌هیدێن نەمر، ژ بۆ هه‌موو له‌هه‌نگێن کو د ئه‌رکا پاراستنا کوردستانێ دا بریندار بوونه. ئه‌م ژ وان را دبێژن، خزمه‌ت و تێکۆشینا وه ل پێشیا مه یه.
خوه‌نده‌ڤانێن هێژا، هێڤیا پێشه‌رۆژه‌که گه‌ش ژ وه هه‌موویان ڕه دخوازم و جاره‌که دن ب گه‌رمی پیرۆزباهیێ ل وه هه‌موویان دکم و د ژیانا خوە دا سه‌رکه‌فتی بن.
گه‌له‌ک سپاس.
