نێچیرڤان بارزانی سەرۆکێ هەرێما کوردستانێ د سێیەمین کۆربەندا هەولێرێ دا کو، تۆرا مەدیایی یا رووداوێ ڤە هاتبوو ئامادەکرن، د پانەلەکێ دا ل سەر گەلەک پرس و مژارێن گەرم د رۆژەڤا هەرێما کوردستانێ و ناڤچەیێ دا ئاخفت و بەرسڤا پرسێن رێڤەبەرێ پانەلێ دا گەلەک ب زەلالی ئەو پەرس و مژار هەموو بەرسڤدان.
یا ژ هەموویێ بالکێشتر چیرۆکا پاراستنا کوردێن سێ تاخێن باژارێ حەلەبێ بوو کو، نێچیرڤان بارزانی بەحس دکە کا وان چەوا کاری کوردێ حەلەبێ ژ کۆمکوژیێ بپارێزن:
پرسیار: هندەک ڕاپۆرت هاتن به‌لاڤکرن کو وه د ناڤبه‌ینکاریا ڕێلبه‌رگرتنا شه‌ر ل سێ تاخێن حه‌له‌بێ دا ڕۆله‌ک هه‌بوو. گه‌لۆ ناڤبه‌ینکاریا وه د ناڤبه‌را هەسەدە، ڕێڤه‌به‌ریا نوو یا سووریه‌یێ و به‌لکی ترکیه‌یێ دا به‌رده‌وام دکه ل سه‌ر ڤێ مژارێ یان ئه‌ڤ ته‌نێ تایبه‌تی بوو ب وێ قۆناغێ ڤه؟
نێچیرڤان بارزانی: ب ڕاستی د ڕۆژێن ئه‌ول دا نیگه‌رانیا مه یا مه‌زن ئه‌و بوو کا ئه‌م دێ چاوا کاربن وان کوردێن ل حه‌له‌بێ بپارێزن. ب ڕاستی د ڤێ مژارێ دا ترکیه‌یێ ڕۆله‌ک گرنگ لیست. ئه‌م سپاسیا ده‌وله‌تا ترکیه‌یێ دکن کو ل گه‌ل مه ل سه‌ر خه‌تێ بوون دا کو کاربن ب تایبه‌تی د وان دو-سێ ڕۆژێن ئه‌ول دا ب مه را بن. ئه‌م گه‌له‌ک نیگه‌رانێ وان هه‌رسێ تاخێن حه‌له‌بێ کو، کورد لێ دژین، بوون. لێ ترکیه‌یێ ب سپاسی – سپاسیا سه‌رۆککۆمارێ ترکیه‌یێ، وه‌زیرێ کارێن ده‌رڤه و سه‌رۆکێ ده‌زگه‌ها ئیستیخباراتێ دکم – وان هه‌موویان ئالیکاریه‌کا مه‌زن کر کو پرسگرێک چێنه‌به و هه‌ر وسا ژی بوو، پرسگرێک چێنه‌بوو.
پرسیار: پێنگاڤ یا وه بوو؟
نێچیرڤان بارزانی: به‌لێ، پێنگاڤ یا مه بوو. ئه‌ڤ ئه‌رکێ مه یه، ئه‌و برایێن مه نه ل سووریه‌یێ. ده‌ما ڕه‌وش گەهشت وێ ئاستێ کو ئه‌و دێ ڕاستی پرسگرێکان ببن، مه وه‌ک ئه‌رکه‌کی سه‌ر ملێ خوه دیت کو ئه‌م ب چ ئاوایی کاربن ئالیکاریا وان بکن و ئه‌م دێ ئالیکاریا وان بکن ژی. ژ وێ ڕۆژێ هه‌تا ئیرۆ ب هه‌ر ئاوایی سه‌رۆکاتیا هه‌رێما کوردستانێ – نه ته‌نێ ئه‌ز لێ یێن دن ژی د سه‌رۆکاتیا هه‌رێما کوردستانێ دا و ئه‌م ژی – به‌رده‌وام کار دکن دا کو چاوا ئه‌م کاربن ئالیکاریا برایێن خوه ل وێ ده‌رێ بکن. په‌یاما مه ژ بۆ ڤان براده‌ران ئه‌ڤ بوو کو هوون دڤێ د پێڤاژۆیا سیاسی یا سووریه‌یێ دا خوه ببینن. هوون دڤێ ل به‌ندێ نه‌مینن کو گازی وه بکن، هوون دڤێ ب خوه بچن شامێ و د پێڤاژۆیا سیاسی یا سووریه‌یا نوو دا دڤێ کورد به‌شدار ببن.
– د ڕاستیێ دا ئه‌ڤ مژار دو ئالی یه. ئالیێ یه‌که‌م ئه‌وه کو مه هه‌ول دا کوردان بپارێزن و ئه‌م هه‌تا ئاسته‌کێ مه‌زن ب سه‌ر که‌تن. نها هه‌ولدانا مه ئه‌وه کو ئه‌م چاوا د پێڤاژۆیا سیاسی دا ئالیکاریا وان بکن. ئه‌ز ڤه‌دگه‌رم سه‌ر پرسا وه، ئه‌گه‌ر کا ئه‌م هێشتا ژی د ناڤا ڤێ مژارێ دا نه، به‌لێ ئه‌م هێشتا ژی د ناڤا ڤێ مژارێ دا نه و ئه‌م ب هه‌ر ئالی را دخه‌بتن. ئارمانجا مه یا سه‌ره‌که ئه‌وه کو ئەم بگەهن چاره‌سه‌ریه‌کێ د چارچۆڤه‌یا سووریه‌یێ دا. چاره‌سه‌ریه‌کێ کو خوه د چارچۆڤه‌یا سووریه‌یێ دا ببینه. تشتێ کو ل هه‌رێما کوردستانێ ل ئیراقێ هه‌یه، هوون نکارن هه‌مان کۆپیان ببن سووریه‌یێ و جیبجی بکن، ئه‌ڤ نابه و ئاسته‌نگه. لێ ئه‌م باوه‌ر دکن کو ئه‌گه‌ر پێڤاژۆیه‌ک ده‌ست پێ بکه و د ڤێ پێڤاژۆیێ دا هه‌موو پێکهاته‌یێن سووریه‌یێ کاربن خوه ببینن، ئه‌ڤ دێ سه‌رکه‌فتنه‌کا مه‌زن به ژ بۆ سووریه‌یێ و شانسه‌کی مه‌زنه ژی ژ به‌ر کو ئه‌ڤ نه‌ته‌وه گه‌له‌ک ئێش و ئێشکه‌نجه دیتیه. ب ڕاستی هێژا یه کو ژ نها و پێ ڤه ژیانه‌که چێتر بژین.
