بارزانی: گەلێ كوردستانێ رەد كر ڤەگەرن ژێر نیرێ ستەم و دكتاتۆریێ
سه‌رۆکێ هه‌رێما کوردستانێ د سالڤه‌گه‌را بریارا 688 ێ یا ئه‌نجوومه‌نا ئاسایشێ دا کو ژ بۆ پاراستنا گه‌لێ کوردستانێ ژ ئێرشێن بالەفرێن ڕژیما بەعس هاتبوو وه‌رگرتن، ڕاگەهاند: “ئه‌و بریارا مرۆڤی ژ بۆ گه‌لێ کوردستانێ قۆناغ و وه‌رچه‌رخانه‌که دیرۆکی بوو و خه‌لکێ کوردستانێ ب وێ کۆچێ ڕه‌د کر كو جاره‌کا دن ڤه‌گه‌رن بن نیرێ سته‌م و دکتاتۆریێ“
نێچیرڤان بارزانی سپاسیا جڤاکا ناڤده‌وله‌تی دكە کو سیھ سال به‌رێ بریاره‌کا ڕاست و دروست دان و دبێژە: ” گه‌لێ کوردستانێ ژی سه‌لماند کو ئه‌گه‌ر ئازادی و ده‌رفه‌ت هه‌بە، دکارە میناکه‌کا باش و جودا پێشکێش بکه“.
سەرۆكێ ھەرێما كوردستانێ د پەیاما خوە دا دبێژە: “هه‌رێما کوردستانێ د ئه‌زموونا سیھ سالێن ده‌رباسبوویی دا دکاری میناکه‌ک باشتر پێشکێش بکه. تەڤی هه‌موو ده‌ستکه‌فتان، شاشی و کێماسی هه‌بوویه و هه‌یه، لێ به‌لێ کێم ژی نینن ئه‌و ئاستەنگ و ته‌نگاسیێن ژ بۆ وێ هاتین چێكرن كو ڕێ ل پێشیا بەر ب پێشڤه‌چوونا زێده‌تر گرت.
په‌یاما سه‌رۆک نێچیرڤان بارزانی د بیرانینا 30 سالیا بریارا ناڤده‌وله‌تی ژمارە 688 دا:
ئیرۆ، ئەم، سالڤه‌گه‌را 30 سالیا ڕۆژه‌کا ب ڕوومه‌ت د دیرۆکا هه‌ڤچه‌رخا گه‌لێ کوردستانێ دا ب بیر تینین. به‌ری 30 سالان وه‌کی ئیرۆ، 1991.04.05 ئه‌نجومه‌نا ئاساییشا ناڤده‌وله‌تی بریارا 688 ده‌رخست. ب وێ یه‌کێ پرۆسه‌یا دابینکرنا ئارامیێ ده‌ستپێکر و ھەرێما ئارام و ناڤچه‌یا دژەفرینێ پێکهات کو پاشی بوو ئەگەرێ پاراستنا به‌شه‌ک زێده‌یێ هه‌رێما کوردستانێ. ئێدی هێزێن ڕژیما وێ ده‌مێ یا ئیراقێ نه‌دکارین نه ل سه‌ر ئەردی و نه ل ئاسمانێ ڤه ئێریشی سه‌ر گه‌ل و ئاخا کوردستانێ بکن.
ئه‌و بریارا مرۆڤی ژ بۆ گه‌لێ کوردستانێ قۆناغ و وه‌رچه‌رخانه‌کا دیرۆکی بوو، داكو ڕێ ل کۆچا ملیۆنی یا خه‌لکێ کوردستانێ یا به‌ر ب تخووبێن ئیران و ترکیێ ڤە بگرە کو خەلكێ كوردستانێ ب وێ کۆچێ ڕه‌دکرن جاره‌کا دن ڤه‌گه‌رن بن نیرێ سته‌م و دکتاتۆریێ. پاشی وێ بریارێ ژ بۆ پاراستنا ئاساییش و ئارامیێ ڕه‌هه‌نده‌کێ ئه‌منی وه‌رگرت، هه‌تا د داویێ ده، وێ بریارێ، ڕه‌هه‌نده‌کێ نوو یێ سیاسی وەرگرت و هلبژارتنێن 1992ێ و دامه‌زراندنا پەرله‌مه‌نتۆ و حکومه‌ت و ئه‌زموونا ده‌فاکتۆیا هه‌رێما کوردستانێ بەرھەمئانین.
چه‌مکا ده‌ستێوه‌ردانا مرۆڤی کو د گه‌ل وێ بریارێ دا كەتە رۆژەڤێ، تەڤی پێشکێشکرنا یارمه‌تیێن مه‌زن د وارێ مرۆڤی دا، ده‌رگه‌هێ ژیانێ و ئه‌زموونه‌کا نوو یا ده‌مۆکراسیێ ل سه‌ر هه‌رێما کوردستانێ ڤه‌کر. ده‌رفه‌ت ئافراند هه‌تا كو ئاڤادانی و چیرۆکا سه‌رکه‌فتنا هه‌ڤبه‌ش و ئه‌زموونه‌کا نوو ل ناڤچه‌یێ دا پێشکێش بکه و وه‌کی هه‌ڤبه‌شه‌کا دیار د گه‌ل جیهانا پێشکه‌تی بهایێن شارستانیێن سه‌رده‌م پێشبخه و ببە پارێزا ده‌مۆکراسی و مافێن مرۆڤان، کولتوورا هه‌ڤدووقه‌بوولکرن و پێکڤه‌ژیان و لێبۆرینیێ کوورتر بکه.
بێگومان هه‌رێما کوردستانێ د ئه‌زموونا سیھ سالێن ده‌رباسبوویی دا دکاری میناکه‌ک باشتر پێشکێش بکه. تەڤی هه‌موو ده‌ستکه‌فتان، شاشی و کێماسی هه‌بوویه و هه‌یه، لێ به‌لێ کێم ژی نینن ئه‌و ئاستەنگ و ته‌نگاسیێن ژ بۆ وێ هاتین چێكرن كو ڕێ ل پێشیا بەر ب پێشڤه‌چوونا زێده‌تر گرت. نها ژی ته‌نها بژارده‌یا مه ئه‌وه كو ئەم ب ته‌بایی و پێکڤه‌یی، ب سوودوه‌رگرتنا ژ ئه‌زموونا به‌رێ، ب گوفتووگۆ و هه‌ڤدوتێگهشتن و ڕێکه‌فتنا دگه‌ل حکومه‌تا فه‌ده‌رالیا ئیراقێ و ب پشته‌ڤانی و هه‌ڤبه‌شی و ئالیکاریا جڤاکا ناڤده‌وله‌تی، پێنگاڤان به‌ر ب پاشه‌رۆژه‌که باشتر پاڤێژین.
د ڤێ بیرانینێ دا سلاڤ و ڕێز و سپاسیێن خوه ژ بۆ جڤاکا ناڤده‌وله‌تی دووپات دکین کو سیھ سال به‌رێ وه‌کی ئیرۆ بریاره‌کا ڕاست و دروست دان، گه‌لێ کوردستانێ ژی سه‌لماند کو ئه‌گه‌ر ئازادی و ده‌رفه‌ت هه‌بە، دکارە میناکه‌کا باش و جودا پێشکێش بکه. داخوازێ دکین پشته‌ڤان و هه‌ڤکارێن مه بن هه‌تا كو پێنگاڤێن مه‌زنتر به‌ر ب پاشه‌رۆژه‌کا باشترا هه‌ڤبه‌ش و ئارامی و پێشکه‌تنێ ل گه‌ل ئیراق و ناڤچه‌یێ و جیهانێ دا پاڤێژین، هه‌تا پێکڤه ب هه‌ڤبه‌شی و ئالیکاری، بهایێن بلندێن مرۆڤایه‌تیێ و جیهانا پێشکه‌تی بپارێزین و پێکڤه ڕووبروویێ توندوتیژی و ته‌رۆرێ ببین.
گه‌له‌ک سپاسیا ئیران و ترکیێ دکین کو پێشوازیا سه‌دان هه‌زار په‌نابه‌رێن کوردستانێ کرن. گه‌له‌ک سپاس ژ بۆ وان هه‌موو وه‌لاتێن ب هه‌ر ئاوایه‌کی بە به‌شداری د ده‌رخستنا بریارا 688 یا ناڤده‌وله‌تی و پرۆسه‌یا دابینکرنا ئارامی و دامه‌زراندنا ناڤچه‌یا دژەفرین و ھەرێما ئارامی دابینکرنا یارمه‌تیا مرۆڤی دا کرن و ئیراده‌یا سیاسی ژ بۆ پاراستنا گه‌لێ کوردستانێ نیشان دا. سپاس ژ بۆ نه‌ته‌وه‌یێن یه‌کگرتی و ڕێخستنێن نه‌حکومی. سپاس ژ بۆ ڕایا گشتی یا جیهانێ کو حکوومه‌تێن خوه هان دان هه‌تا گه‌لێ کوردستانێ بپارێزن. ئه‌م چو ده‌مه‌کی وێ پشتگیری و یارمه‌تیا وه ژ بیر ناکین و چاڤێن مه ل به‌رده‌وامیا هه‌ڤبه‌شی و پشتگیری و هه‌ڤکاریێن وه نه.
سپاس ژ بۆ ڕۆژنامه‌ڤان، وێنه‌گرێن جامێر و وێره‌ک و ژ بۆ کانالێن ڕاگەهاندنێ کو ڕۆله‌کا مه‌زن د گەهاندنا ده‌نگێ خه‌لکێ کوردستانێ دا دیتن و وێنه و دیمه‌نێن ئێش و ئازارێن پیر، زارۆک، نه‌خوه‌ش و ژن و زلامێن کۆچبه‌رێن ل ناڤچه‌یێن تخووبیێن دژوار و چیایی، ژ بۆ هه‌موو جیهانێ ڤه‌گوها‌ستن و پشتگیریه‌کا مه‌زنا مرۆڤی ژ بۆ خه‌لکێ کوردستانێ ده‌سته‌به‌ر کرن. سپاس ژ بۆ پشته‌ڤانیا ڕه‌ڤه‌ندا کوردستانی، هونه‌رمه‌ند، ده‌زگه‌ھ و ڕێخستنێن کوردستانی یێن ل ده‌رڤه‌یێ وه‌لات. سلاڤ و ڕێز و حوورمه‌ت ژ بۆ وه هه‌موویان.
نێچیرڤان بارزانی
سه‌رۆکێ هه‌رێما کوردستانێ
2021.04.05
